2 Relles 25
25
O Jerusalem perel
Jer 39.1-7; 52.3-11
1Kana nakhle inia burs sar kana thodape te charoil o Sedekias, ando desto llive katar o desto chon, o Nabukodonosor charo katar e Babilonia, avilo sa pe boñikonenchar te marelpe e foroia katar o Jerusalem, ta truisarda le. Thoda o pero angla le ta vazdia bare phurda te sai den po foro.#Jer 21.1-10; 34.1-5; Ez 24.2. 2Ta thodepe truial katar o foro llik kai o desuiekto burs katar o charo o Sedekias. 3Kana nakhle inia llive katar o starto chon ande gua burs, e bok barili ando foro ta ni saia len so te jan. 4Ondaka cherde iek putardipe po zido katar o foro, ta makar e kaldeura sea truial, o charo ta sa e boñikura nasle orachaia. Likiste katar o udar kai saia maskar e dui zidura, po vostano e charoinako, ta lleletar po drom katar o Araba.#Ez 33.21. 5A e boñikura katar e kaldeura rodie e charo e Sedekiase ta resle lete ande bari umal katar o Jeriko. Sa leke boñikura mukle le ta rispisaile. 6Ta e kaldeura phangle e charo ta ande le angla o charo katar e Babilonia kai saia ando Ribla, ta kote krisisarde le. 7Ta angla o Sedekias chinde e kor katar leke chave, ikande leke akha, ta phanglo lanchonenchar inllarde le ande Babilonia.#Ez 12.13.
O Nabukodonosor zatril o cher e Devleko
2 Kr 36.17-21; Jer 39.8-10; 52.12-30
8Kana nakhle desunia burs sar kana thodape te charoil o Nabukodonosor, o charo katar e Babilonia, ando eftato llive katar o panchto chon, o Nebuzaradan, o gazda katar e boñikura kai arakhena e charo, avilo ando Jerusalem, 9ta phabarda o cher e Devleko, o cher e charoko, sa e chera katar o foro ta sa e chera katar e llene mai preche.#1 R 9.8. 10E boñikura katar e kaldeura kai avile lea perade e zidura kai sea truial katar o Jerusalem. 11Ta e llenen kai achilea ando foro, e llene kai dena liubao e charo katar e Babilonia, ta sa e llenen kai radina, o Nebuzaradan ikanda len katar o foro ta inllarda len phangle ande Babilonia. 12Samo mukla e mai chorren te sai radin ande drakha ta ande phuv.#Dt 4.27-28; 28.36.
13E kaldeura phagle e direkura tuchne kai sea ando cher e Devleko. Phagle o than kai upral saia o baro lelleno tuchno, ta inllarde o tuch ande Babilonia.#1 R 9.8. 14Ta inllarde e braserura, o sastri kai ikanena lea e angara, e ezgode kai mundardon lenchar e memelia, e roia bare ta e ezgode cherde katar o tuch kai radina lenchar ando cher e Devleko.#1 R 7.45; 2 Kr 4.16. 15Ta o gazda e boñikonengo kai arakhela inllarda pea sa e braserura ta e tasura sunakune ta rupune. 16E dui direkura, o baro lelleno, ta o than kai saia upral o lelleno kai o charo o Salomon cherdaia, nasti phariade len sa. 17Suako direko llik upre saia le ojto pole, ta saia le iek mreza cherdi katar o tuch ta truial sargo e granade, kai llik upre sea le mai but katar trin pole. Ta i o gua direko saia le sa gola ezgode tuchne.
E llene kai achile ando Juda nasen ando Ejipto
18O gazda katar e boñikura kai arakhena phangla e bare popo e Seraiase, ta e popo e Sofoniase, ta trine llenen kai arakhena o udar katar o cher e Devleko. 19Ta katar o foro phangla e gazda katar e boñikura, panlle llenen kai sea sluge katar o charo, e mai preche pismiria katar e boñikura kai llinena e llenen katar e phuv, ta sovardes katar e mai bare llene kai sea ando foro. 20O Nebuzaradan inllarda sa gale llenen angla o charo katar e Babilonia kai saia ande Ribla. 21Kote o charo katar e Babilonia mundarda len ande Ribla ande phuv katar o Jamat. Gia tradie e foro e Judaeko katar lengi phuv.
Nesave nasen ando Egipto
Jer 40.7-10; 41.1-3,16-18
22O Nabukodonosor thoda e Gedaliase, chavo katar o Ajikam unuko katar o Safan, te gazdaril pe llene kai achile ando Juda. 23Ta kana e gazda e boñikonenge katar o Juda asunde kai o Gedalias saia thodo gazda, avile lete ande Mizpa. O Ismael chavo katar o Natanias, o Jojanan chavo katar o Kareaj, o Seraias chavo katar o Tanjumet o netofatita, ta o Jaazanias chavo katar iek maakateo. Sa avile pe boñikonenchar. 24Ondaka o Gedalias jala sovel lenge ta pe llenenge gia:
Na daran te aven sluge katar e gazda e kaldeura. Achen ande phuv. Cherdon sluge e charoke katar e Babilonia, ta ka llal tumenge sukar.
25A ando eftato chon, o Ismael chavo katar o Netanias unuko katar Elisama, kai saia katar e familia e charoinaki katar o Juda, avilo dese murusenchar ta mundarde e Gedaliase, e judionen, ta e kaldeonen kai sea lea ande Mizpa. 26Ta sa e llene, katar o mai terno llik kai o mai phuro, ta i e gazda e boñikonenge, daraile katar e kaldeura ta nasle ando Ejipto.#Jer 43.5-7.
Mukliaren e Joakine ta den le liubao ande Babilonia
Jer 52.31-34
27Kana nakhle tranda ta efta burs sar kana tradie e Joakine o charo katar o Juda, ando llive bis ta efta katar o desuduito chon, thodape te charoil ande Babilonia o Evil Merodak kai saia pachivalo e Joakinea. Ta ando purvo burs sar kana thodape te charoil, ikanda e Joakine katar o phandipe, 28dia le liubao ta besalda le po mai glamno trono katar e charura kai sea lea ande Babilonia. 29Ta o Joakin premenisailo e patave kai sea pe lete ando phandipe, ta beslo te jal e charoia sa po zivoto ande Babilonia. 30Ta o charo pravarda e Joakine ande sa leko zivoto.
Currently Selected:
2 Relles 25: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
