2 Korintios 11
11
O Pablo ta e poraukura kojamne
1¡Terpin mange akana cherricha dilipe! Sargo te avela, terpin mange. 2Soke o volipe kai si man pala tumende avel katar o Del. Goleke tumen morabi te aven angla o Kristo sargo iek chei kai si mangli te zinilpe iekhe chavea, a gua chavo si o Kristo. 3Si mange iek dar kai sai cheren isto so cherda e Eva kai kojada la o sap pe bizaimaia, ta i tumen sai kojavel ta sai duriavel tumare mislura lache ta chiste kai si tumen katar o Kristo.#Jen 3.1-5,13. 4Soke tumen kana avel vareko te del tumenge orba katar iek Jesus kai inai isto gua kai amen diam tumenge orba, tumen len le dragostimaia, ta len aver duo kai inai isto gua Duo kai lien, ta len aver lachi viasta kai inai isto goia lachi viasta kai lien, ta drago tumenge gola llene. 5Goleke, me ni acharav man mai minono neko gola bare apostolura kai avile mapalal. 6Me i te na dava orba but sukar, llanav mai but ezgode neko von, ta gala ezgode kai phenav sikadamlen tumenge suako drom pe suako ezgoda kai chera.
7¿Sai avelpe kai cherdem bilachipe kana phendem tumenge e lachi viasta ta ni manglen te pochinen mange, ta me cherdem man mai minono te sai cherav tumen mai bare? 8Liem katar aver khanllira lenge love te sai radiu tumenge. 9Ta kana sema maskar tumende ta trubula man vareso, nikada ni manglem tumendar te pomozin man soke e phlal kai avile katar e Masedonia die man so trubula man, soke ni kamlem te avav iek pharipe tumenge, ta gia ka cherav le suako drom.#Flp 4.15-18. 10Gia sar pachau kai pinllarav o chachipe e Kristoko, isto gia llanav kai niko ni ka lel mandar gaia veselia ande sa e phuv katar e Akaia. 11¿Soke dav orba gia? ¿Sai avelpe kai ni voliv tumen? ¡O Del llanel kai voliv tumen!
12Goleke me ka cherav so cherav te na dav iek than gole llenen kai roden te aven len o baripe kai si amen, 13soke von si iek apostolura kojamne ta furiadon sargo apostolura e Kristoke. 14Ta gaia ezgoda kai cheren inai chudo, soke isto o Satanas furiadol sargo iek suecho e villeloko, 15goleke, gola kai pomozin le mangen te dikhon sargo llene kai cheren o lachipe. ¡Ta lengo son ka avel prema e ezgode kai cheren!
O Pablo nakhel bari patnia soke si apostol
16Pale phenav tumenge: niko te na mislilpe kai me sem dilo, a te mislina kai sem dilo, muken man te dav orba sargo iek dilo, ta gia i me te faliu man cherricha, 17gia ka dav orbe dile kai e Gazdake inai drago. 18¡Goleke, sar si but llene kai falin isto von pe, i me ka cherav le! 19Tumen sen but bizai a terpin dragostimaia e dilenge, 20ta terpin gole llenenge kai cheren tumen te aven esluge, kai len tumare ezgode, kai kojaven tumen, kai cheren baripe angla tumende ta kai chalaven tumen ando mui. 21I te avela mange lallao te phenaule, amen sama but kovle tumenchar.
A te avile von tromane te falinpe, i me ka cherav le i te avela gaia ezgoda iek dilipe. 22Te si von ebreura, i me sem ebreo. Te si von israelitura, i me sem. Te si von katar e vicha e Abraameki, i me sem katar e vicha e Abraameki. 23Te si von esluge e Kristoke, me semle mai but neko von, i te avava iek dilo kai phenav gaia orba. Me radisarden mai but neko von, man phangle mai but droma neko len, man chalade mai but droma e bichoia neko len, ta but droma sema pasa o meripe.#Ech 16.23. 24Panch droma e judiura marde man, ta suako drom chalade man tranda ta inia droma e bichoia.#Dt 25.3. 25Trin droma marde man e kastenchar, ta iek drom chudie e barrenchar ande mande, ta trin droma achili tala o pai e bari llimia kai llava ande late, ta nakhlem iek riat ta iek llive andre ande mora ta maka tasivav.#Ech 14.19; 16.22. 26Pe but riga llelem, nakhlem paia ta maka merav, sema maskar e chor ta maka mundaren man, sema maskar e llene katar mi phuv ta i von maka mundaren man, ta i maskar e llene kai inai judiura. Ta sema pasa o meripe ando foro pe droma ande mora ta i pasa o meripe maskar e llene kai cherenape kai sea phlal.#Ech 9.23; Ech 14.5. 27Radisardem but, nakhlem bari patnia, but droma ni sovava, nakhlem bok ta i trus ta aver droma ni jalem niso, but droma nakhlem patnia cheres o sil ta ni saia man so te thovav pe ma.
28Ta cheres gala ezgode ta i aver, suako llive phariol pe ma e briga katar sa e khanllira. 29A vareko te nasuaol, i me nasuaivav, a te cherena te perel vareka, me joliaivav. 30Te si te faliu man ande vareso, ka faliu man ande mo kovlipe. 31O Del ta Dad katar amaro Gazda o Jesukristo kai si blagosime ostade, llanel kai phenav o chachipe. 32Kana sema ando Damasko, o baro sudo kai gazdarila ande phuv katar o charo o Aretas, thoda boñikura pe udara e foroke, te sai phanden man, 33a sea nesave llene kai fuliarde man ande iek kotaricha katar iek putardipe kai saia po zido e foroko, ta gia naslem katar lenge va.#Ech 9.23-25.
Currently Selected:
2 Korintios 11: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
