2 Kronikas 34
34
O charo o Josias
2 R 22.1-2
1Kana o Josias thodape te charoil sea leke ojto burs, ta charoisarda ando Jerusalem tranda ta iek burs. 2O Josias saia orta angla e akha e Devleke ta saia sargo o David, ta ni likisto katar po drom chacho.
O Josias lacharel e ezgode
3Kana nakhle ojto burs sar kana o Josias thodape te charoil, ta saia but terno, rodia e Devle, o Del katar leko dad o David. Ta kana sea leke desudui burs thodape te chistol e foro katar o Juda ta katar o Jerusalem. Ikanda e thana vazdine ta e slike katar e Asera ta e dela sastrune. 4Ikanda e altarura katar o Baal, pharrada e slike katar o kham kai sea upral, pharrada e slike katar e Asera ta e slike sastrune, lligo ni cherda len prajo, ta o prajo chudia le pe limoria katar gola kai diea lenge kurbanura.#2 R 21.3; 2 Kr 33.3. 5Ta phabarda pe lenge altarura e kokala katar lenge popura, ta gia chistosarda o foro katar o Juda ta katar o Jerusalem.#1 R 13.2. 6Isto gia cherda ande forura katar o Manases, o Efrain, o Simeon llik kai o Neftali ta ande riga kai sea pase. 7Kana getosarda te zatril sa e altarura e slike katar e Asera, te pharravel sa e delen ande sa o Israel, irisailo ando Jerusalem.
Malaven o lil katar o zakono
2 R 22.3—23.3
8Kana nakhle desojto burs sar kana o Josias thodape te charoil, ta kana chistosarda e phuv ta o cher e Devleko, o Josias bichalda e Safane chavo katar o Asalias, kai saia o gazda katar o foro o Maseias, ta e Ioaje chavo katar o Joakaz kai pomozila, te lacharen o cher e Gazdako leko Del. 9Von llele kai o mai baro popo o Jilkias, ta die le e love kai chidiea pala o cher e Devleko. Kai o Manases, o Efrain, sa so achela katar o Israel, sa o Juda, o Benjamin ta e llene katar o Jerusalem diea e levitonen kai arakhena e udara e chereke. 10Dielen e llenenge kai cherena o rado ta kai arakhena o cher e Devleko, ta gola llene dena e love e llenenge kai radina ta lacharena o cher. 11Ta dielen e llenenge kai radina ande kasta ta ande barra te sai chinen barra ta kasta te sai thoven len ande chera kai e charura katar o Juda zatrisardea.
12Gala llene radina sukar. E llene kai gazdarina ando rado sea o Iajat ta o Abdias, kai sea levitura katar e chave e Merarieke. O Zakarias ta o Mesulam kai sea katar e chave katar o Koat katar e levitura kai llanena te basalen ande basalde. 13Ta i dikhena e llenen kai anena e ezgode, ta dikhena sa o rado. Maskar e levitura sea pisminura, gazda ta levitura kai arakhena e udara.
14Kana ikanena katar o cher e Devleko e love kai andea, o baro popo o Jilkias malada o lil katar o zakono e Devleko kai cherda te den len o Moises. 15Ondaka phenda le e Safaneke kai saia pismiri, ta phenda leke:
Maladem ando cher e Devleko o lil katar o zakono. 16O Safan inllarda o lil kai o charo, ta kana phenela leke sar maladele, phenda leke:
Che sluge cherda sa so dian alav.
17Chidie e love kai sea ando cher e Devleko ta dielen e llenenge kai cheren o rado.
18Ta o Jilkias dia man iek lil. Ta kana phenda le, chitisarda o lil e charoke. 19Ondaka o charo samo asunda e alava katar o zakono, pharrada pe patave, 20ta o charo phenda e Jilkiaseke, e Ajikameke chavo katar o Safan, e Abdoneke chavo katar o Mikaias, e Safaneke o pismiri, ta e Asaiaseke sluga e charoko, ta phenda gia:
21Llan te puchen e Devle pala ma, pala o foro kai achel ta pala sa o Juda andar so phenel o lil kai malade. Soke o Del sai te avel but joliariko pe amen soke amare dada ni thode sama ta kandie so phenel gava lil.
22Ondaka o Jilkias, o Ajikam, ta e llene kai ikharda o charo, llele kai e porauka Julda, rromi katar o Salum, chavo katar o Tikva ta unuko katar o Jarjas kai arakhela e patave katar o cher e Devleko. E Julda zivila ando duito pero katar o Jerusalem, ta die orba laia, 23ta voi phenda lenge:
Gia phenel o Del e Israeleko: Phenen e lleneke kai bichalda tumen, kai me o Del e Israeleko.
24Ka cherav gale foroke ta e llenenge kai zivin ande le, te perel pe lende e zatranie kai liken ando lil kai chitisarde angla o charo katar o Juda, 25soke mukle man ta phabarde o taimano avere delenge. Joliarde man pala e ezgode bilache kai cheren. Goleke e joli ka si man pe gava foro ni ka achel. 26Phenen gia e charoke katar o Juda kai bichalda tumen te puchen man, kai me o Del e Israeleko vachardem:
Soke thodan sama ande so phenel o lil, 27dukhada tut kana phendem katar e zatrania kai ka cherav pe gava foro ta e llenenge kai zivin ande le, ta soke pharradan che patave ta rovdan angla ma, i me asundem tut. Me o Del phenav le chuke. 28Goleke ka mere ande pas ta ni ka dikhe che akhenchar e zatrania kai ka cherav gale foroke. Kana o charo asunda so phenela o Del, 29ikharda e phuren katar o Juda ta o Jerusalem te chidiniaon lea. 30Mapalal sa e murusa katar o Juda ta sa e llene katar o Jerusalem, sa e popura sa o foro katar o mai minono llik o mai phuro, sa llele e charoia ando cher e Devleko. Kote o charo bare avazea chitisarda lenge o lil katar e alava kai malade ando cher e Devleko. 31Mapalal o charo thodape pe porrne ta achilo po alav e Devlea kai ka llal orta angla o Del. Ka guruvel leko zakono ta ka cherel leki volia sar si pisime ando lil. 32Ta cherda te achen po alav sa e llene kai sea ando Jerusalem ta e llene katar o Benjamin. Ta e llene katar o Jerusalem cherde so achile po alav e Devlea, o Del lenge puranengo. 33Mapalal o Josias ikanda katar e phuv e Israeleki suako ezgoda gado, ta cherda e llenen te blagosin e Gazda o Del. Ta ande llivesa kana zivisarda o Josias, o foro ni mukla o rado e Gazdake o Del lenge puranengo.
Currently Selected:
2 Kronikas 34: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
