2 Kronikas 32
32
O Senakerib del ando Juda
2 R 18.13—19.37; Is 36—37
1Kana nakhle sa gala ezgode vesele sar kana thodape te charoil o Ezekias, o Senakerib charo katar e Asiria, dia pe forura zidome katar o Juda ta mangla te dobil len.
2Kana o Ezekias dikhla kai o Senakerib avela te del po Jerusalem, 3ta chidinailo pe gazdenchar, pe boñikonenchar ta die pe orba te phanden o pai kai dela ando foro. 4Ondaka avile but llene ta phangle sa e paiorra kai nakhena katar goaia phuv, soke phenena: ¿Soke e charura katar e Asiria ka malaven but pai kana ka aven?
5Mapalal o Ezekias vazdia pale e zidura kai sea peradine, vazdia chera ios mai bare, ta cherda aver zido avri katar o foro. Zuriarda e Milo, ando foro e Davideko, ta phenda te cheren but jarnia ta eskudura. 6Thoda kapitanura angla e boñikura, ta chidia len pe plasa pasa o udar e foroko, ta phenda lenge: 7¡Den tumen zor! ¡Na daran katar o charo e Asiriako ta katar o baro sueto kai avel lea! ¡Amenchar si iek but mai zuralo! 8Le pomozin e llene, a amen pomozil amaro Gazda o Del, kai marelpe lenchar te arakhel amen. Ta o foro uzdisailo lengi vera ando charo e Judaeko, o Ezekias.
9Mapalal, kana o charo katar e Asiria o Senakerib thovelape truial katar o Lakis sa pe boñikonenchar, bichalda nesave llenen te phenen e Ezekiaseke, charo katar e Judea ta sa e llenenge kai sea ando Jerusalem:
10Gia puchel o Senakerib, charo e sirionengo: ¿Ande ka uzdin tumen, kai achen ando Jerusalem kana amen sam truial tumendar? 11Te si kai o Ezekias phenel tumenge kai o Gazda tumaro Del ka braduil tumen katar me va. Kojavel, soke gia ka cherel tumen te meren bokhatar ta trusatar. 12¿Inai gava o Ezekias kai perada e thana vazdine ta e altarura. Kai phenda e llenenge katar o Juda ta o Jerusalem:
Samo angla gava altar ka blagosin ta pe lete ka phabaren o taimano? 13¿Ni llanen so cherdam me ta me dada e foronenge kai si ande phuvia katar o sueto? ¿E dela katar gola phuvia braduisarde len katar me va? 14¿Savo del braduisarda gale phuvien katar mi zor? ¿Soke mislin tumen kai o Del sai braduil tumen? 15Te na kojavel tumen o Ezekias. Na thoven sama kana o Ezekias ka phenel tumenge te uzdin tumen ando Del. Te si kai e dela ni braduisarde gale phuvien, ¡sar ka braduil tumen tumaro Del!
16Ta e boñikura katar o Senakerib phende but ezgode bilache katar o Del o Gazda ta katar leko sluga o Ezekias. 17Ta i pisisarda lila kai kusela e Gazda o Del e Israeleko, soke phenela gia:
E dela katar aver phuvia nasti braduisarde len katar mo va, ni o Del e Ezekiaseko nasti ka braduil pe foro katar mo va.
18Ta phenena le ande chib katar o Juda e foroke katar o Jerusalem kai sea pe zidura. Ta e boñikura katar o Senakerib dena orba urkindo te daraven len ta gia te lel peke e foro. 19Dena bilachi orba katar o Del e Jerusalemeko sargo kana dena orba katar e dela avere phuvienge, dela kai isto e manusa cherde len.
20Goleke o Ezekias ta o profeta o Isaias chavo katar o Amoz molisaile e Devleke ta mangle katar o miloso te pomozil len. 21Ondaka o Del bichalda iekhe suecho kai mundarda e boñikonen mai tromane katar e Asiria ta i e gazden katar e boñikura ta e kapitanonen. Ta o charo katar e Asiria irisailo kai pi phuv ando lallao, ta kote isto leke chave mundarde le e churiaia kana dia ando cher katar leko del.
22Gia o Gazda o Del braduisarda e Ezekiase ta e llenen katar o Jerusalem te na gazdaril pe lende o charo katar o Asiria o Senakerib, ta ni iek katar lenge dusmanura. Ta o Del dia len pas pe suako rig. 23Ondaka but llene ande ezgode dine e Gazdake o Del, ta ezgode but sukar e charoke katar o Juda, o Ezekias. Goleke o Ezekias cherdilo but baro angla sa e phuvia.
O Ezekias sastol katar pi muka
2 R 20.1-11; Is 38.1-22
24Ande gua vreme o Ezekias nasuailo ta saia po meripe. A molisailo e Devleke, ta o Del sastarda le, ta sikada leke iek ezgoda. 25A o Ezekias, makar saia blagosime, leko lio cherdilo barikano, goleke o Del jolailo pe lete, po Juda ta po Jerusalem.
26Mapalal o Ezekias keisailo ta lea sa e llene katar o Jerusalem. Goleke ande sa e llivesa kana zivila o Ezekias e joli e Devleki ni avili pe lende.
O barvalipe katar o Ezekias
27O Ezekias saia but barvalo ta glamno. Saia le but rup, sunakai, barra sukar, merisura, eskudura ta ezgode but sukar. 28Vazdia chera te guruven o lliu, e mol ta o zeitino. Vazdia chera te arakhen e zivirinie ta lacharda thana e guruvenge. 29Avila le forura, ta sea le but bakre ta gurumia, soke o Del blagosisarda le ta dia le but barvalipe.
30O Ezekias ucharda e paiorra katar o Gijon, ta cherda te llal o pai karing e rig kai perel o kham ando foro katar o David. Ta ande sa so cherda o Ezekias llela leke sukar.
O Ezekias lel e llenen bichalde katar e Babilonia
2 R 20.12-19; Is 39.1-8
31Ta kana e gazda mai preche katar e Babilonia bichalde llenen te dikhen e bare ezgode kai nakhle ande phuv, o Del mukla korkorre e Ezekiase te dikhel so saia ande leko lio.
O meripe katar o Ezekias
2 R 20.20-21
32Sa so cherda o Ezekias, leke lache ezgode kai cherda, sa si pisime ando lil katar o profeta o Isaias chavo katar o Amoz, ta ando lil katar e charura e Judaeke ta e Israeleke. 33O Ezekias mulo ta prajosarde le pasa leke dada, po than mai glamno ando limori katar e chave e Davideke. Mapalal charoisarda leko chavo o Manases.
Currently Selected:
2 Kronikas 32: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
