2 Kronikas 28
28
O Ajaz charoil ando Juda
2 R 16.1-20
1Kana o Ajaz thodape te charoil, sea leke bis burs. Charoisarda desusov burs ando Jerusalem. A ni saia orta angla o Del sar saia leko dad o David, 2soke cherda e ezgode bilache kai cherde e charura katar o Israel. Ta cherda slike bilade katar o Baal, 3phabarda o taimano ande bari umal katar o Ben Inom. Dia pe chaven kurbano e delenge ta chudia len ande iag sar cherenale e forura kai o Del chudiaia katar e phuv. 4Dia kurbanura e delenge ta phabarda o taimano pe thana vazdine, pe burdura ta telal katar suako baro kas.
5Goleke o Del cherda te dobil le o charo katar e Siria, ta e siriura dobisarde len ta phangle bute llenen kai inllarde len ando Damasko. Ta i o Del cherda te dobil le o charo katar o Israel kai mundarda lendar bute llenen. 6Soke o Pekaj samo ando iek llive mundarda stotina ta bis milie murusen kai sea tromane, soke muklea e Devle, o Del katar lenge purane.#2 R 16.5; Is 7.1. 7Ta o Zikri kai saia iek boñiko katar o Efrain, mundarda e Maasiase, e sluga e Azikrame ta e Elkanae, o lleno mai preche katar o charo. 8Ta e boñikura katar o Israel phangle dui stotine milie llenen katar o Juda, diskinie, chaurre ta chorra. Ta lia peke but ezgode ta inllarde len ande Samaria.
9Saia kote iek profeta e Devleko kai ikhardola Obed, ta likisto angla e boñikura kana dena ande Samaria, ta phenda lenge:
O Del tumare puranengo jolailo po Juda goleke cherda te dobin len. A tumen mundarden iekhe jolinaia, kai avili llik kai o miloso. 10Ta akana mangen te cheren tumare sluge e llenen katar o Juda ta o Jerusalem. A ¿ni sen tumen dosale angla tumaro Del? 11Goleke, irin e llene kai phanglen, soke von si tumare phlal. O Del si but joliariko pe tumen.
12Ondaka o Azarias chavo katar o Jojanan, o Berekias chavo katar o Mesilemot, o Ezekias chavo katar o Salum, ta o Amasa chavo katar o Jadlai, kai sea e mai bare gazda katar o Efrain thodepe angla e boñikura kai irinape katar o maripe, 13ta phende:
Na anen karinga e llenen phangle, soke pala gua ka dosarel amen o Del. So mangen te cheren tumen samo ka bariarel amari dos, ta o Del ka joliaol but po Israel.
14Ondaka e boñikura mukle e llenen kai phanglea ta irisarde angla e gazda ta angla o foro e ezgode kai liea lendar. 15Ta gola murusa arakhle e llenen e phanglen, ta katar e ezgode kai liea lendar ikande patave te premeninpe e llene kai sea nange. Die len minie, jape, pai, sastarde golen kai sea ranime, ta inllarde pe magarchura ogolen kai ni saia len zor llik kai o Jeriko, o foro katar e palmere, ta mukle len kote pe familienchar. Mapalal irisaile ande Samaria.
16Ondaka o Ajaz bichalda llenen e charoke katar e Asiria te mangen te pomozil le, 17soke o Edom pale diaia ande phuv ta dobisardaia e Judae ta inllardea llenen phangle. 18Ta i e filisteura diea ande forura kai sea ande bari umal ta ando Negeb katar o Juda, ta liea e forura katar o Bet Semes, o Aialon, o Gederot, o Soko, o Timna ta o Gimzo ta e forichura kai sea truial ta thodeape te zivin ande lende. 19Soke o Del mangla te dukhavel e Judae, pala so cherdea o Ajaz, charo katar o Israel. Soke cherda te cherel o Juda o bilachipe ta vou ni kandia e Devle.
20O Tiglat Pileser, charo katar e Asiria avilo te marelpe e Ajazea, ni pomozisarda le ta ni dia le zor. 21A o Ajaz ikanda e ezgode but kuch katar o cher e Devleko, katar o cher e charoko ta katar e chera e gazdenge te del len e charoke katar e Asiria, a galea ni lia niso soke ni pomozisarde le. 22Ta o Ajaz makar saia ande bari dar, ni keisailo ta ios bilachipe cherda angla o Del. 23Dia kurbanura e delenge katar o Damasko, goleke dobisarde le. O Ajaz mislila kai gia sar e dela katar e Asiria pomozisarde len te dobin le, ka pomozin i le, ta cherela lenge kurbanura. Gua cherda te jasaol vou ta sa o Israel. 24O Ajaz chidia sa e ezgode katar o cher e Devleko, pharrada len pe kotora, phangla e udara katar o cher e Devleko ta phenda te chere altarura e delenge pe suako rig katar o Jerusalem. 25Ta vazdia thana vazdine ande sa e forura katar o Juda te sai phabaren o taimano e delenge, ta gia joliarda e Devle, o Del leke puranengo.
26Sa e ezgode kai cherda o Ajaz e purve ta gola kai cherda mai palune, si pisime ando lil katar e charura e Judaeke ta e Israeleke. 27Kana mulo, prajosarde le pe dadenchar ando Jerusalem, a ni prajosarde le ando limori katar e charura e Israeleke. Mapalal charoisarda pe leko than leko chavo o Ezekias.#Is 14.28.
Currently Selected:
2 Kronikas 28: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
