2 Kronikas 26
26
O Uzias charoil
2 R 14.21-22; 15.1-7
1Ondaka sa o foro lia e Uziase kai sea leke desusov burs, ta thode le te charoil po than pe dadeko. 2Ta vou, mapalal kana mulo leko dad, vazdia pale o foro o Elat ta dia le pale e Judaeke.
3Kana o Uzias thodape te charoil sea leke desefta burs. Charoisarda ando Jerusalem pinda ta dui burs. Leki dei saia e Jekolias katar o Jerusalem.
4O Uzias saia orta angla o Del sargo leko dad o Amasias. 5Ande llivesa katar o Zakarias, o Uzias rodia e Devle sa pe liea, goleke ande gua vreme o Del cherda te llal leke sukar.
6O Uzias mardape e filisteonenchar, ta perada e zidura katar o Gat, o Jabnia ta Asdod. Ta vazdia forura ande phuv katar o Asdod, maskar e filisteura. 7O Del pomozisarda le te dobil e filisteonen, e araben kai zivina ando Gur baal ta te dobil e meunitonen. 8E amonitura pochinena love e Oziaseke, ta cherdilo but pinllardo llik kai ando Ejipto, soke leko gazdaripe bariloa but.
9Ando Jerusalem vazdia chera vazdine upral po udar kai bangarel o drom, upral po udar katar e Bari Umal, pasa o drom kai bangarel, ta zuriarda len. 10Ta i vazdia chera vazdine po pusto, ta putarda but bunaria soke sea le but guruva ande Sefela ta pasa e burdura. Sea le murusa kai radina ande vostanura drakhake ta ande thana kai bariona septelie, soke saia leke drago te radil ande phuv.
11E Uziase sea le but boñikura kana llana po maripe prema sar sea fulade ando lil katar o Jeiel, katar o pismiri katar e charoina ta katar o Maaseias, o lleno kai radila e Jananiaseke, iek gazda e charoko. 12Sa e gazda katar e familie, murusa tromane ta boñikura zurale, sea dui milie. 13Gazdarila pe trin stotine ta efta milie boñikura lacharde te llan po maripe te sai pomozin e charo kana saia te marelpe. 14O Uzias dia pe boñikonen eskudura, jarnie, ta ezgode marimake. 15Ta ando Jerusalem ikande ezgode marimake cherde bizaimaia, ta thode len ande chera vazdine ta ande zidura mai bare te sai chuden kotar llide ta barra bare. Cherdilo but pinllardo, soke o Del pomozisarda le gachin, kai leko gazdaripe cherdilo but zuralo.
16A kana saia zuralo ta gazdarila but, leko lio cherdilo barikano ta inllarda le ande zatrania. Ta ni kandia e Devle soke dia ando cher e Devleko te phabarel o taimano po altar katar o taimano. 17A palal pala le avilo o popo Azarias ta lea ojtovardes popura e Devleke tromane, 18die po charo, ta phende leke:
Charo Uzias, tu nasti phabare o taimano e Devleke, samo e popura chave katar o Aaron si thode te cheren le. Glamno charo, like katar o santuario, soke gia ni kande e Devle, ta ni ka blagosil tut o Del pala so chere.#Ek 30.7-8; Nm 3.10.
19E Uziase saia le iek insensario te phabarel o taimano, ta jolailo pe popura. Ondaka isto kote, ando cher e Devleko, pasa o altar katar o taimano ta angla e popura, likisti e lepra pe leko chikat. 20Kana o baro popo o Azarias ta ogola popura, dikhle kai pe loko chikat saia e lepra, sigarde te ikanen le kotar. Isto vou mangela te likel kotar, soke o Del dukhada le.
21O Uzias achilo nasualo katar e lepra llik kana mulo. Goleke zivisarda ande soba fuladi, ta ni mukle le te del ando cher e Devleko. Leko chavo o Jotam arakhela o cher katar e charoina, ta dikhela e ezgode katar o foro.
22Sa so cherda o Uzias, e purve ezgode ta so cherda mapalal, si pisime ando lil katar o profeta o Isaias chavo katar o Amoz. 23Kana o Uzias mulo, prajosarde le pe dadenchar ando limori katar e charoina, soke phende: Vou saia nasualo katar e lepra. Mapalal charoisarda leko chavo o Jotam.#Is 6.1.
Currently Selected:
2 Kronikas 26: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
