1 Timoteo 5
5
Sar morabi te ave saurrenchar
1Na thov tut silno iekhe phurea. De lea orba te sikol ta cher le sargo kana de orba che dadea ta de orba e ternenchar sargo che phlalenchar. 2A e phuriorrenchar morabi te den orba sargo kana si tumari dei; a e diskinie kai si terne, dikhlen sargo kana si che phiorra.
3Pomozisar e phivlien kai inai len kate te llan te pomozin len. 4A iek phivli te si la chaurre o unukura, von si te sikon te sai pomozin pe familia, soke i voi len pomozisarda, gava si drago e Devleke. 5E chachuni phivli si goia kai achili korkorre ta kai laki vera si ando Del ta mangel letar ta molilpe ollivesea ta orachaia. 6A e phivli kai si ando kurvaluko, lako zivoto si mulo. 7Ta sikau len i gala ezgode, te na dosarel len niko. 8Soke o lleno kai ni brigilpe katar pire llene, ta mai but katar pi familia, golea phenel kai inai le pachape ta si mai bilacho neko e llene kai ni pachan.
9E phivlien kai tumen morabi te pomozin si gola kai si lenge mai but katar e sovardes burs ta kai avila len samo iek rrom. 10Si te aven pinllarde kai cheren o lachipe, kai llangle te bariaren pe chaurren, kai avile pachivale e llenenchar kai den ande lako cher, kai jalade e porrne e llenenge kai si katar o santo foro, kai pomozisarde e llenen kai nakhen nuzde, ta kai llangle te cheren suako lachipe.
11A na thov te pomozil e khanlliri e phivlien kai si mai terne, soke von kana nakhel o vreme so lenge si drago ka cherel len te durion katar o Kristo, ta pale ka mangen te zininpe 12ta si dosale, soke ni cherde so phende. 13Ta ni cheren niso, sorro llive ta llan cher cherete ta ni radin; ta inai samo kai ni radin, inllaren bune, ta aminpe ande suako ezgoda ta den orbe kai ni trubul te den. 14Goleke mangav te zininpe e phivlia kai si terne te aven len minone, te radin ande po cher ta gia e llene kai ni pachan ni ka avel len te sai dosaren amen. 15Soke nesave phivlia durile katar o Kristo ta llele pala o Satanas.
16Varesavi diskinia kai pachal ando Jesus ta te si la phivlia ande laki familia, morabi te pomozil len te na aven iek pharipe e khanllirake, ta gia e khanlliri sai ka pomozil ogole phivlien kai chachimaia inai len katar te mangen.
17E phure kai gazdarin sukar ande khanlliri trubul te volin len dui droma mai but, ta mai anglal e llenen kai lengo rado si te den orba e Devleki ta kai sikaven. 18Soke o Pisipe phenel gia:#Dt 25.4; Mt 10.10; Lk 10.7.
Muk e guruve te jal kana ustavel o lliu te trebol le. Ta phenel i gia:
O lleno kai radil trubul te pochinen leke.
19Na thov sama kana ka dosaren iekhe phure te na avena dui o trin llene kai dikhle so vou cherda.#Dt 17.6; 19.15.
20Gola kai pale si ando bilachipe, morabi te de pe lende angla sa, te sai daran i ogola llene.
21Mangav tutar angla o Del, ta angla o Jesukristo, ta angla e suechura kai si esvirime, te kande gala alava ta te ave chacho saurrenchar, na samo e llenenchar kai si chuke drago. 22Mislisao dui droma te mangea te thove che va pe vareka te moli tut, te na ave ande iek than ande avereko bilachipe. Morabi te ave chisto katar suako bilachipe.
23Soke but droma nasuao katar cho lli, na pi samo pai, pi i iek zalogicha mol.
24O bilachipe nesave llenengo dikhol mai anglal te cherdol e kris, a averengo bilachipe dikhol mapalal. 25Isto gia, e lache ezgode kai cherdon dikhon bristomaia, ta gola kai inai lache nasti ka achen gurudine ostade.
Currently Selected:
1 Timoteo 5: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
