1 Timoteo 4
4
O sikadipe kojamno
1A o Duo phenel bristomaia kai ande llivesa kai si te aven mai angle, nesave llene ka muken o pachape ta ka thoven sama e duonenge kai si kojamne ta e sikadimake kai avel katar e llavolura. 2Ka pachan e llenen kojamnen kai inai lenge lallao katar o bilachipe kai cheren. 3Gala llene ni muken te zininpe ta ni te jan nesavo jape kai o Del mukla e llenenge kai pachan ta e llenenge kai pinllaren o chachipe ta kai den fala pala gua jape. 4Soke sa so cherda o Del si lacho, ta morabi te na muka te diam fala e Devle,#Jen 1.31. 5soke o alav e Devleko ta o molipe cheren le chisto. 6Sikau gala ezgode e phlalen, ta ka ave iek lacho sluga katar o Kristo Jesus iek lleno kai sikol katar e alava e pachamake ta katar o lacho sikadipe kai tu sikilan ta kande.
7A muk pe iek rig e paramiche e suetoke kai si dile, ta thov tut te chere o lachipe. 8Soke o rado kai cheren e llene te sai zuriaol e esnaga ta te avel sasti si lacho e esnagake, a o volipe si lacho varesave ezgodake soke del amen o lachipe ande gava zivoto ta i ande o gua zivoto kai ka avel mai angle. 9Ta gava si iek chachipe but baro, ta sa morabi te pachan le. 10Ta pala gava radi ta trudi amen, soke amari vera si ando Del o llundo kai braduil saurren, ta mai but e llenen kai pachan.
11Sikau gala ezgode, ta phen saurrenge te kanden len. 12Na muk nika te phenel kai ni mol tut pala cho ternipe. E llene kai pachan morabi te sikon tutar sar de orba ta sar san, sar voli, sar pacha, ta sar si cho pachape ando Del. 13So me llav incha tute thov tut te chiti o Pisipe e phlalenge kai si ando pachape de len zor ta sikav len. 14Arak o lachipe kai o Del dia tut kana e phure thode pe va pe cho soro ta molisaile. 15Cher gala ezgode ta le sama lendar te sai dikhen e llene kai suako llive cherdo mai lacho.
16Arak so chere ta so sikave averen, ta lla orta ande sa gala ezgode. Te cherdan gia, ka bradui tu tut ta i golen kai asunen tut.
Currently Selected:
1 Timoteo 4: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
