1 Samuel 30
30
O David dobil e amalekitonen
1Pala o trito llive kana o David ta leke llene avile ando Siklag e amalekitura die ando Negev ando Siklag, ta zatrisarde le ta phabarde le, 2ta inllarde phangle e diskinien ta sa e llenen kai sea ando foro, katar o mai terno llik o mai purano. A ni mundarde nika, samo inllarde len po drom.
3Kana o David ta leke llene avile, malade o foro phabardo ta ni sea e diskinie ta ni e minone soke inllardea len phangle. 4Ondaka o David ta e llene kai avena lea rovde lligo ni achila len ios blaga te roven. 5E dui diskinie katar o David, e Ajinoam katar e phuv o Jezreel ta e Abigail kai saia e rromi e Nabaleki katar o Karmel, i len inllarde len phangle e amalekitura.#1 S 25.42-43. 6Ta o David brigisailo but soke o foro mangela te chudel barra ande lete pala e bari zalba kai saia len pala pe chaurre ta pala pe chorra. A o David lia zor katar po Gazda lo Del. 7Ondaka o David phenda e popoke o Abiatar, chavo katar o Ajimelek:#1 S 22.20-23.
An mange o efod, me moliv man chuke. Ta o Abiatar anda o efod e Davideke.
8Ta o David puchla e Devle, ta phenda:
¿Morabi te rodav gole choranen? ¿Ka resav len? Ta o Del phenda leke:
Lla ta rode len, soke ka rese len ta ka mukliare e phanglen.
9Ondaka o David ta e sov stotine llene kai sea lea avile po pai katar o Besor, ta nesave lendar achile kote. 10Ta o David ta star stotine llene llele angle, a ogola dui stotine llene sea chinie drometar ta nasti nakhle o pai katar o Besor. 11Ta malade ando vos iekhe llene ejipsio, ande le angla o David, die le te jal marrno ta te piel pai. 12Ta i die le te jal iek kotor marrno cherdo katar e maslinke suke ta dui krangura katar e drak suki. Kana jala, avili leki zore, soke cherena trin llivesa ta trin racha kai ni jala ta ni piela niso. 13Ta o David puchla le:
¿Ko san, katar ave? Ta o terno ejipsio phenda:
Me sem sluga katar iek amalekita, ta cherel trin llive kai mo gazda mukla man chudino, soke sema nasualo, 14soke llelam po maripe ando Negev katar e kereteura, katar o Juda ta o Negev katar o Kaleb, ta phabardam e Siklage.
15O David puchla le:
¿Ka inllare man kai gola chorane? Ta o ejipsio phenda e Davideke:
Samo te ja mange sovel ando anav e Devleko kai ni ka mundare man ta ni ka muke man kai mo gazda, ondaka me ka inllarav tut lende.
16Ta o ejipsio inllarda e Davide kai sea e amalekitura, ta von sea rispime ande sa goia phuv. Jana ta piena ta cherena slava, soke sea vesele pala sa so liea katar e phuv katar e filisteura ta katar e phuv katar o Juda. 17Ta o David marda len kana pharrona e zore llik thiarinako kana perela o kham. Ta mundarda saurren, samo star stotine terne nasle pe deve.
18Ta o David mukliarda sa so lie e amalekitura, ta i mukliarda pe duie rromien. 19Sa so chorde e amalekitura ta sa e chaurren ta e chorren, sa anda le o David. 20Ta i lia o David sa e bakren ta e guruven. Ta e llene kai anena len phenena kai sa gala ezgode si e Davideke.
21Ta kana o David irisailo po pai katar o Besor, e dui stotine llene kai achilea kote chinie e drometar, avile angla o David ta leke llene. Ta kana avilo o David puchla len sar sea. 22A e llene bilache kai llelea e Davidea jolaile ta phende kai e llenen kai ni llele po maripe, saia te na len niso katar e ezgode kai lie katar e amalekitura, samo te len pe diskinien ta pe chaurren ta mapalal te llantar. 23A o David phenda:
Phlalalen, na cheren gia e ezgodenchar kai o Del dia amen, soke o Del arakhla amen ta cherda te dobi gale choranen kai mardepe amenchar. 24Niko ni ka asunel tumen, soke sa morabi te len isto gua kotor, gola kai llan po maripe ta i gola kai achen te arakhen e ezgode marimake.
25Katar gua llive angle, gua achilo zakono ando Israel llik allive.
26Ta kana o David avilo ando Siklag, katar e ezgode kai lie katar o maripe, bichalda e phurenge katar o Juda kai sea leke amale, ta phenda lenge:
Gala ezgode liam katar e dusmanura e Devleke. 27Ta i bichalda ezgode kai lie katar e amalekitura e llenenge kai sea ando Betel, ando Ramot katar o Negev, ando Jatir, 28ando Aroer, ando Sifmot, ando Estemoa, 29ando Rakal, ta i golenge kai sea ande forura katar o Jerameel ande forura katar e kenitura, 30ande Jorma, ando Korasan, ando Atak, 31ando Jebron, ta sa e forura kai saia o David pe llenenchar.
Currently Selected:
1 Samuel 30: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
