1 Samuel 25
25
O meripe katar o Samuel
1Ta o Samuel mulo, ta sa e israelitura chidinaile te roven pala le. Prajosarde le ande leko cher ande Rama. Mapalal o David llelotar po pusto katar o Paran.
O David ta e Abigail
2Saia ando foro katar o Maon iek lleno but barvalo kai sea le trin milie bakre ta milia busnien. Leki buchi saia ando foro katar o Karmel, ta kote vou chinela e bal katar e bakre. 3Gava lleno ikhardola Nabal ta saia katar e vicha katar o Kaleb. Vou saia iek lleno bilacho kai ni dela liubao nika, a leki rromi saia but sukar ta i bizai. Voi ikhardola Abigail.
4Ta o David po pusto asunda kai o Nabal chinela e bal katar e bakre. 5Ondaka o David bichalda dese chaurren ta phenda lenge:
Llan ando foro o Karmel kai o Nabal, ta phenen leke kai me bichalav leke salami, 6ta phenen leke gia: Te avel e pas pe tute ta i pe chi familia, ta pe sa so si tut. 7Asundem kai akana si tut llene kai chinen e bal katar e bakre. Tu llane kai che chobanura sea amenchar ta amen avilam pachivale lenchar, ta sa o vreme kana von sea ando Karmel ni trubula len niso. 8Puch che slugen, ta von ka phenen chuke kai gua si o chachipe. Akana me mangav tutar te ave i tu pachivalo gale chaurrenchar, te de len so avela tut, soke me sem sargo cho chavo.
9Kana e chaurre kai bichalda o David avile kai o Nabal, phende leke sa so phenda o David ta ni phende niso ios. 10A o Nabal phenda lenge:
¿Ko si o David? ¿Ko si gua chavo e Jeseeko? Si but sluge kai nasen katar pe gazda. 11¿Mo marrno, mo pai o mo mas kai chiradem me slugenge kai chinen e bal katar me bakre, ka dav len e llenenge kai ni llanav katar si von?
12Ta e chaurre irisaile po drom, ta kana avile kai o David, phende leke sa so phendaia lenge o Nabal. 13Ondaka o David phenda pe llenenge:
¡Suako lleno tumendar te lel po jarni! Ta sa e llene katar o David lie o jarni, ta i o David lia po jarni. Ta e llene kai llele e Davidea sea preko star stotine murusa, ta dui stotine llene achile te arakhen e ezgode.
14A iek sluga katar o Nabal llelo kai e Abigail e rromi katar o Nabal, ta phenda lake:
O David bichalda nesave llenen te den salami e Nabale, a vou ni avilo pachivalo lenchar. 15Gala llene sea but lache amenchar, ta sa o vreme kana amen sama lenchar ando vos, ni trubula amen niso. 16Von arakhena amen ollivesea ta orachaia, ta i arakhena amare bakren. 17Akana mislisao so ka chere, soke cho rrom si but joliariko, ta niko nasti del orba lea. Amen llana kai o David ka avel te zatril le ta leke familia.
18Ondaka e Abigail lia dui stotine marrne, dui morcha pherde mol, panch bakre peke, saranda kile simiche peke, stotina drakha suke, dui stotine simochine suke, ta sa thoda len pe magarche, 19ta phenda pe slugenge:
Llan tumen anglal, me ka llav mapalal. Ta voi niso ni phenda e Nabaleke.
20E Abigail lleli pe iek magarcho po than gurudino katar o burdo. Ta o David ta leke murusa avena angla la, a voi likisti te maladol lenchar.
21Ta o David mislisailo kai samo gia arakhla e ezgode katar o Nabal po pusto, ta ni lia letar niso, soke o Nabal pochinda leke bilachipe po lachipe. 22Ta o David jala sovel gia:
¡Te dukhavel man o Del te na zatriva thiara sa so si le ta te na mundarava sa e murusen katar leki familia!
23Ta kana e Abigail dikhla e Davide, fulisti sigardi katar o magarcho ta dia changenchar angla o David. 24Ta e Abigail chudiape pe leke porrne, ta phenda leke:
¡Gazda murno, te perel pe ma e dos! Me moliv man chuke, muk man te dav orba tuia ta asun e alava katar chi sluga. 25Na thov sama katar e ezgode kai cherel o Nabal, soke vou si dilo gia sar si leko anav. A me, chi sluga ni dikhlem e chaurren kai tu bichaldan. 26Gazda murno, angla o Del o llundo phenav chuke kai o Del ni mukla tut te mundare che dusmanonen. Daboida te aven sa che dusmanura sargo o Nabal, ta sa gola kai mangen te cheren chuke o bilachipe. 27Akana, le chuke o japorre kai anda chi sluga, te de len e llenenge kai phiren tuia, 28ta prostisar che sluga. Chachimaia si kai o Del ka thovel tut ta che familia ande charoina, soke tu mareto pala o Del, goleke na cher nikada ni iek ezgoda bilachi. 29Te si kai fiko mangel te mundarel tu, o Del ka arakhel tu ta ka chudel dur tutar che dusmanonen, sargo kana chuden barra e ondaia. 30Ta kana o Del ka cherel sa o lachipe kai phenda kai ka cherel me gazdake, ta kana ka thovel tut te gazdari ando Israel, 31ondaka ni ka ave keime pala nisavo mundaripe kai cherdan, o kai chindan e kris isto tu te ikane chi duk. Goleke kana o Del ka del tut o lachipe kai phenda, de tut golli katar chi sluga.
32Ta o David phenda lake:
Blagosime te avel o Gazda, o Del e Israeleko, kai allive bichalda tut te malave man, 33ta i tu te ave blagosime pala o bizaipe kai si tut, soke cherdan te na mundarav ta te na chinav e kris isto me te ikanav mi duk. 34Jav chuke sovel ando anav e Devleko katar o Israel, kai te na sigardana te ave allive, thiara ni achilaia e Nabale ni iek lleno.
35Mapalal o David lia e ezgode kai anda leke e Abigail, ta phenda lake:
Lla chuke chere esmiro. Dikhe kai asundem so phendan mange ta avilem pachivalo tuia.
36Ta kana e Abigail irisaili chere, o Nabal cherela iek baro jape gia sar cherena le e charura, ta saia korro mato. Goleke voi ni phenda leke niso llik thiarinako. 37Thiarinako kana o Nabal saia traso, e Abigail phenda leke sa gala ezgode ta leko lio phagilo, ta achilo sargo iek barr. 38Ta kana nakhle des llive, o Del dia po Nabal ta o Nabal mulo. 39Kana o David asunda kai o Nabal mulo, phenda:
¡Blagosime te avel o Del kai pochinda e Nabaleke o bilachipe kai cherda mange, ta ni mukla man te cherav o bilachipe, ta cherda leke isto so vou mangela te cherel mange!
40Ta kana e sluge katar o David avile ando Karmel te den orba laia, phende lake:
O David bichalel amen tute, soke vou mangel te ave leki rromi.
41Ondaka e Abigail bangili lligo ni lako chikat dodisarda e phuv, ta phenda:
Me sem iek sluga e Davideki, ta me ka jalavav e porrne katar leke sluge.
42Ta kana phenda gala alava, sigarda te llal panlle cheenchar kai radina lake, ta llelitar palal pala e sluge pe iek magarcho, ta voi zinisaili pala o David.
43Ta i o David lia e Ajinoama katar o Jezreel te avel leki rromi. Ta e Abigail ta e Ajinoam sea leke rromia, 44soke o Saul pe chea e Mikala kai saia rromi e Davideki, dia la pala e Palti chavo e Laiseko katar o Galim.
Currently Selected:
1 Samuel 25: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
