1 Samuel 24
24
1Kana o Saul irisailo katar o maripe e filisteonenchar, phende leke kai o David saia po pusto ando En Gedi. 2Ondaka o Saul ikharda trin milie murusen katar sa o foro Israel, ta llelo te rodel e Davide ta leke llenen pe pechine En Gedi. 3Ta kana o Saul avilo kai iek rindo bakrengo kai pase saia iek anadipe, o Saul dia andre te sai ucharel pe porrne. Ta o David ta leke llene sea gurudine pasa o anadipe. 4Ta e llene katar o David phende e Davideke:
Allive o Del cherel so jala sovel kana phenda kai ka del che dusmanonen ande che va. Cher lea sogo mangea. Ta o David ustilo ta po chorial chinda iek kotor katar o gertachi e Sauleko.
5Ta dukhadilo ande po lio soke chinda iek kotor katar o gertachi e Sauleko, 6ta phenda pe llenenge:
¡Te na del o Del te vazdau mo va pe mo gazda o charo! ¡Vou si o charo soke o Del esvirisarda le!
7Gale alavenchar o David ni mukla pe llenen te den po Saul. Ta o Saul likisto katar o anadipe, ta llelotar. 8Mapalal o David likisto katar o anadipe urkindo, ta phenela:
¡Mo gazda o charo! Ta kana o Saul dikhla pala pe, o David dia changenchar, 9ta phenda leke:
¿Soke asune golen kai phenen chuke kai me mangav cherav chuke bilachipe? 10Dik sar allive o Del thoda tut ande me va ando anadipe. Ta me llene phenena mange te mundarav tut, a me prostisardem tut soke phendem: Vou si o charo, o Del esvirisarda le.
11Dik dade, mande si o kotor katar cho gertachi. Isto me chindem le ta ni mundardem tut, te sai llane kai me ni kamam te mundarav tut. ¿A soke tu rode man te mundare man? 12O Del te chinel e kris maskar amende, ta te thovel kasti mange, a mo va nikada ni ka vazdiniaol pe tu. 13Sar phenena e purane: O bilachipe avel katar e llene bilache, goleke mo va nikada ni ka vazdiniaol pe tu. 14¿Ka rodel te marel o charo katar Israel? ¡Man, kai sem sargo iek llukel mulo o sargo iek pisom! 15O Del te krisil amen. Vou te dikhel dal sem dosalo o iok, ta te arakhel man tutar.
16Ta kana o David getosarda te del orba, o Saul urkindo phenda:
¡Chaurrea, David! ¿Tu san kai de orba? Ta o Saul thodape te rovel.
17Ta o Saul phenda leke:
Chachimaia phene, soke tu cherdan mange o lachipe a me pochinav chuke e bilachimaia. 18Allive sikadan mange kai cherdan mange o lachipe, soke o Del thoda man ande che va ta ni mundardan man. 19Soke ¿Ko ka malavel pe dusmano ta ka mukel le te llaltar? O Del te blagosil tut pala so cherdan mange. 20Akana llanav ka tu ka charoi, ta kai e charoina katar Israel ka avel zurali ta i bari ande che va. 21Ja mange sovel ando anav e Devleko kai ni ka zatri me vicha, ta kai ni ka ikane mo anav katar mi familia.
22Ondaka o David jala sovel e Sauleke. Mapalal o Saulo irisailo kai po cher, ta o David ta leke llene lleletar ando than gurudino.
Currently Selected:
1 Samuel 24: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
