1 Samuel 22
22
1O David llelotar kotar ta naslo kai o anadipe ando burdo katar o Adulam. Kana leke phlal ta sa leki familia llangle kai saia vou, avile lete te dikhen le. 2Ta i avile lete sa e llene tristome, e llene kai sea unllile, ta sa e llene kai ni saia len zor te zivin. Ta o David cherdilo lengo gazda, ta sa gola kai llana lea sea preko star stotine murusa.
3Ta o David kotar llelotar ande Mizpa katar o Moab, ta phenda e charoke katar o Moab:
Mangav tutar te sai achen tumenchar mo dad ta mi dei lligo ni ka llanav so ka cherel o Del manchar.
4Ta o David anda pe daden angla o charo katar o Moab, ta von achile kote sa o vreme kana o David saia ando cher e boñikonengo. 5A o profeta o Gad phenda e Davideke:
Na achi ando cher e boñikonengo. Lla ande phuv katar o Juda. Ta o David llelotar, ta avilo kai o vos katar o Jaret.
O mundaripe katar e popura
6O Saul asunda kai llanglinaila kai saia o David ta e llene kai sea lea. Ta o Saul saia besindo telal tala iek kas ta ande leko va saia iek lansa, ta sa leke sluge sea truial letar. 7Ta o Saul phenda pe slugenge:
Asunen chave katar o Benjamin: ¿So mislin tumen, kai o chavo e Jeseeko ka del tumen phuvia ta umalia drakhenge, ta ka thovel tumen gazda katar milia boñikura, ta gazda katar stotina boñikura, 8kai pala gua tumen achilen pe orba te den pe mande, ta niko tumendar ni phenel mange kai mo chavo ta o chavo e Jeseeko thodepe zanio te sai mundaren man?
9Ondaka o Doeg katar o Edom, kai saia maskar e sluge mai preche katar o Saul, phenda e Sauleke:
Me dikhlem e chave e Jeseeko kana saia ando Nob, kana avilo kai o Ajimelek, o chavo katar o Ajitub. 10O Ajimelek puchla e Devle pala o David, ta dia e Davide jape ta dia le o jarni katar o filisteo o Goliat.
11Ta o charo bichalda llenen te sai anen e Ajimeleke ta sa e poponen katar o Nob, kai von sea katar leki familia. Ta sa avile kai o charo. 12Ta o Saul phenda e Ajimelekeke:
Asun man, chavo e Ajitubeko.
Kate sem, phenda o Ajimelek.
13Ta o Saul phenda leke:
¿Soke tu ta o chavo e Jeseeko achilen pe orba te mundaren man? Tu dian le marrno ta iek jarni, ta i puchlan e Devle pala le, te sai rodel man te mundarel man, sar cherel le akana.
14Ondaka o Ajimelek phenda e charoke:
¿Ko maskar e sluge si o mai orta angla o charo neko o David kai si leko llamutro ta gazda katar e boñikura kai arakhen e charo, ta o mai chachuno ando cher e charoko? 15Gaia inai e purvo drom kai me puchav pala o David, te na dosarel man o charo ta te na dosarel mi familia, soke me kai sem cho sluga ni llanav niso katar gaia ezgoda.
16A o charo phenda leke:
¡De istina phenav chuke Ajimelek, kai tu ta chi familia ka meren!
17Ondaka o charo phenda pe slugenge kai arakhena le:
¡Mundaren e Devleke poponen! I von pomozin e Davide, soke kana llangle kai vou nasela mandar, ni phende le mange. A e sluge daraile te mundaren e Devleke poponen.
18Ta o charo phenda e Doegeke:
¡Mundar len tu! Ondaka o Doeg o edomita dia silnomaia pe popura, ta mundarda kote ojtovardes ta panch poponen kai inllarena o efod cherdo katar o lino.
19Mapalal dia ando Nob, kai saia o foro katar e popura, ta mundarda e jarnienchar e murusen, e diskinien, e minonen ta i e minonen kai piena kolin. Mundarda guruven, magarchen ta bakren. 20A iek chavo katar o Ajimelek kai ikhardola Abiatar, naslo katar o mundaripe ta llelo kai o David. 21Ta o Abiatar phenda e Davideke kai o Saul mundarda e poponen katar o Del. 22Ta o David phenda e Abiatareke:
Me llanava kai o Doeg o edomita kai saia kote gua llive, saia te phenel le e Sauleke. Pe ma si e dos kai sa chi familia muli. 23Achi manchar, na dara. Gua kai rodel te mundarel man, i tut ka rodel te mundarel, goleke achi manchar, ta niso bilacho ni ka avel pe tu.
Currently Selected:
1 Samuel 22: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
