1 Samuel 20
20
O Jonatan pomozil e Davide
1Mapalal o David naslo katar o Naiot katar e Rama, ta avilo kai o Jonatan, ta phenda leke:
¿So cherdem me? ¿Savo bilachipe cherdem? ¿Savo bilachipe cherdem che dadeke, kai vou rodel man te mundarel man?
2Ta o Jonatan phenda leke:
¡Ni ka avelpe gia! ¡Ni ka mundarel tut! Thou sama kai mo dad ni cherel niso bi te phenel le mange mai anglal. ¿Soke mo dad ka guruvel mandar gaia ezgoda? ¡Ni ka avelpe gia!
3Ta o David pale phenda leke:
Jav chuke sovel kai cho dad llanel kai tu voli man, goleke ni phenel chuke te na tristosao. ¡Angla o Del o llundo phenav le chuke, kai o meripe si pasa ma!
4Ta o Jonatan phenda e Davideke:
¿So mange te cherav me pala tu?
5Ta o David phenda e Jonataneke:
Thiara si mesechina ta morabi te jav e charoia. Muk man te gurudivav ando vos llik aver thiara kana ka perel o kham.#Nm 28.11.
6Te si kai cho dad puchel fiso mandar, phen leke kai me manglem tutar te llav sigardo ande mo foro o Belen, soke ande murni familia sa den o kurbano kai cheren suako burs. 7A te si kai vou phenel chuke: Sukar, gua si kai vou inai joliariko. A te na, gua si kai de istina mangel mundarel man. 8Trubul te ave posteno che slugaia, soke cherdan che sluga te jal chuke sovel ando anav e Devleko te achel po alav tuia. Te si o bilachipe ande ma, mundar man isto tu, inai soke te inllare man kai cho dad.
9Ta o Jonatan phenda leke:
¡Ni ka avelpe gia! Te llanava kai mo dad mangel mundarel tut, me ka phenav le chuke.
10Ta o David phenda e Jonataneke:
¿Sar ka llanav dal cho dad del orba tuia silnomaia?
11O Jonatan phenda e Davideke:
Aide kai o vos. Ta e dui llele kai o vos.
12Ondaka o Jonatan phenda e Davideke:
Ando anav e Devleko katar o Israel, phenav chuke, kai thiara isto ande gava saiato, ka puchav me dade so mangel te cherel tuia. Te si kai vou phenel kai ni ka mundarel tut, me ka bichalav llenen te phenen le chuke, 13a te si kai vou mangel mundarel tut, te dukhavel man o Del te na phenava le chuke ta te na pomoziv tut te nase. ¡Te arakhel tut o Del sargo arakhla me dade! 14A te ziviva, te avel chuke zalba mandar, sargo o Del kai si leke zao amendar, te na merav, 15te na le chi zalba katar mi familia nikada. Kana o Del ka zatril che dusmanonen, na muk te len mo anav katar e vicha e Davideki.#2 S 9.1. 16Gia o Jonatan jala sovel e vichake katar o David, kana phenda:
¡O Del te krisil e dusmanonen katar o David!
17Ta pale o Jonatan mangla katar o David te jal leke sovel, soke volila le but, volila le sargo isto vou pe. 18Mapalal o Jonatan phenda e Davideke:
Thiara si mesechina, ta ka thoven sama kai tu ni san pe chi estolicha. 19Pala o trito llive ka dikhen kai tu ni san. Goleke, lla kai o than kai gurudilan o goia drom, ta thov tut pasa e pechina kai ikharen la e Ezel. 20Me ka chudav trin llide kote, sargo kana sikivav te chudav llide. 21Mapalal ka phenav me slugake te anel e llide. Te phenava leke:
E llide si pasa tu, lla ta le len, gua si te na ave brigime, soke jav chuke sovel ando anav e Devleko, kai ni ka avel pe tute ni iek bilachipe. 22A te phenava me slugake:
E llide si mai dur, gua si kai morabi te llatar, soke o Del mangel te llatar. 23Tu ta me achilam po alav, ta o Del llanel le.
24Ondaka o David gurudilo ando vos, ta kana avili e mesechina, o charo beslo te jal o marrno. 25Ta o charo beslo pe pi estolicha pasa o zido sargo cherela le suako drom, ta o Jonatan beslo pasa o Abner kai beslo pasa o Saul, ta pe estolicha kai besela o David, niko ni saia. 26Ta o Saul ni phenda niso, soke mislila kai o David ni saia chisto, ta kai goleke ni avilo. 27Thiarinako, kana saia o duito llive katar e mesechina, pale ni saia niko ande estolicha kai besela o David. Ta o Saul puchla e Jonatane:
¿Soke o chavo e Jeseeko ni avilo arachi po jape, ta i allive ni avilo?
28Ta o Jonatan phenda e Sauleke:
O David mangla mandar te mukav le te llal ando Belen, 29phenda mange:
Moliv man chuke, muk man te llav soke mi familia del o kurbano kai cheren ando foro, ta mo phlal phenda mange kai me morabi te avav, goleke muk man te llav. Ta me phendem leke te llal.
30Ondaka o Saul jolailo but e Jonatanea, ta phenda leke:
¡Tu, kai san chavo katar iek diskinia bilachi! ¿So misli tu, kai me ni llanav kai tu voli e Jeseeke chave, ta gua si lallao chuke ta i che dake? 31Sogo zivila o chavo e Jeseeko, tu ta chi charoina ka aven ande bari dar. ¡Goleke bichal llenen te anen le karinga, soke vou morabi te merel!
32Ta o Jonatan phenda pe dadeke, e Sauleke:
¿Soke ka merel? ¿So cherda vou?
33Ta o Saul lia iek lansa ta chudia la ando Jonatan te rranil le. Galea o Jonatan acharda kai o Saul de istina mangela mundarel e Davide. 34Ta o Jonatan ustilo joliariko katar e sinia, ta ni jala o marrno katar o duito llive e slavako, soke saia leke baro zao katar o David, soke o Saul kuslaia le. 35Thiarinako rano o Jonatan llelo iekhe chaurrea ando vos, ando saiato kai achiloia pe orba e Davidea. 36Ta o Jonatan phenda e chaurreke:
Praste te an e llide kai ka chudav. Ta kana o chaurro prastela, o Jonatan chudia e llide mai dur katar o chaurro.
37Ta kana o chaurro avilo po than kai peli e llida, o Jonatan urkisarda e chaurreke bare avazea:
¡E llida si mai incha tutar!
38Pale o Jonatan urkisarda e chaurreke:
¡Praste, na achi! O chaurro lia e llida ta anda la kai o Jonatan.
39A o chaurro ni acharda niso, samo o Jonatan ta o David llanena so saia gua. 40Mapalal o Jonatan dia kai o chaurro e ezgode marimake, ta phenda leke te inllarel len ando foro.
41Ta kana o chaurro llelotar, o David likisto katar e rig kai saia pasa o burdo, dia changa pe phuv trin droma, ta o Jonatan ta o David chumidiepe ta rovena. A o David rovda mai but. 42Ta o Jonatan phenda e Davideke:
Lla esmiro, soke amen jalam sovel ando anav e Devleko te avel o Del ostade maskar amende ta maskar amare chave. Ta o David ustilo ta llelotar, ta o Jonatan irisailo kai o foro.
Currently Selected:
1 Samuel 20: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
