1 Relles 22
22
O Mikaias poraukil kai o Ajab ka avel peradino
2 Kr 18.1-34
1Trin burs nakhle ta ni saia maripe maskar e siriura ta o Israel. 2A pala o trito burs, o Josafat, charo katar o Juda, avilo kai o charo katar o Israel. 3Ta o charo katar o Israel phenda pe slugenge:
¿Ni llanen tumen kai o Ramot katar o Galaad si amaro ta amen ni cherdam niso te la le katar o charo katar e Siria?
4Ta puchla e Josafate:
¿Mange te ave manchar te da po Ramot katar o Galaad?
Ta o Josafat phenda leke:
Me ta me boñikura sam sargo tu, mo foro sargo cho foro, ta me gra sargo che gra. 5Ta o Josafat phenda e charoke katar o Israel:
Puch allive e Devle.
6Ondaka o charo katar o Israel chidia e profetanen kai sea preko star stotine llene, ta puchla len:
¿Morabi te dav po Ramot katar o Galaad, o iok?
Ta von phende leke:
De pe lete, soke o Del ka cherel te dobi.
7A o Josafat phenda:
¿Inai kate aver profeta e Devleko te sai pucha i le?
8Ta o charo katar o Israel phenda e Josafateke:
Si aver profeta kai amen sai manga letar te puchel e Devle. Vou si o Mikaias, chavo katar o Imla. A me nasti dikhav le, soke nikada ni poraukil mange ezgode lache, samo ezgode bilache.
A o Josafat phenda leke:
Na phen gia.
9Ondaka o charo katar o Israel ikharda iekhe sudo, ta phenda leke gia:
¡An oma e Mikaiase, chavo katar o Imla!
10Ta o charo katar o Israel ta o Josafat o charo katar o Juda, besena pe pe estoliche ta sea furiade pe patavenchar charoinake kote kai chistona o lliu pasa o udar katar e Samaria. Ta e poraukura porokina angla lende. 11Ta o Sedekias, chavo katar o Kenaana, cherda singa sastrune, ta phenda:
Gia phenda o Del, gale singenchar ka chalave e sirionen lligo ni ka mundare len.
12Ta sa e poraukura poraukina gia:
De po Ramot katar o Galaad ta ka dobi, soke o Del ka del ande che va e foro.
13Ta o bichaldo kai lleloia te ikharel e Mikaiase, phenda leke:
Sa e poraukura phenen ezgode lache e charoke. Isto gia phen i tu sargo von kai ka dobil.
14Ta o Mikaias phenda leke:
¡Ando anav e Devleko jav sovel kai samo ka phenav e ezgode kai o Del ka phenel mange!
15Ondaka avilo kai o charo, ta o charo puchla le:
Mikaias, ¿morabi te da po Ramot katar o Galaad, o iok?
Ta o Mikaias phenda leke:
Lla, soke o Del ka cherel te dobi, ta ka del le ande che va.
16A o charo phenda:
¿Gachin droma morabi te mangav tutar te ja sovel ando anav e Devleko, kai so ka phene si o chachipe?
17Ondaka o Mikaias phenda:
Dikhlem sa e llenen katar o Israel
rispime pe burdura,
sargo bakre kai inai len chobano.
Ta o Del phenda:
Gala inai len gazda,
te irilpe esmiro suako lleno kai po cher.#Nm 27.17; Mt 9.36; Mk 6.34.
18Ta o charo katar o Israel phenda e Josafateke:
¿Ni phendem chuke me, kai gava lleno nikada ni poraukil mange ezgode lache, samo ezgode bilache?
19Ta o Mikaias phenda:
Asun so phenel o Del. Me dikhlem e Devle besindo pe po trono, ta lea sa e suechura katar o miloso pe porrne pe leki chachi ta pe leko stingo. 20Ta o Del puchla:
¿Ko ka cherel te llal ta te perel o Ajab ando Ramot katar o Galaad? Nesave phenena iek ezgoda, ta aver phenena aver ezgoda. 21Ondaka likisto iek duo#22.21 ande chib ebrea phenel: o duo ta thodape angla o Del, ta phenda leke:
Me ka cherav le te llal. Ta o Del puchla le: ¿Sar ka chere le? 22Ta o duo phenda leke:
Me ka avav duo kojamno ando mui e profetonengo. Ta o Del phenda leke:
Lla, ta cher le 23Ta akana llane kai o Del thoda iek duo kojamno ando mui katar sa che poraukura, ta kai o Del chinada o bilachipe chuke.
24Ondaka o Sedekias chavo katar o Kenaana avilo pasa o Mikaias ta chalada le pe leki cham, ta phenda leke:
¿Soke llelotar mandar o duo e Devleko te del orba tuia?
25Ta o Mikaias phenda:
Ka llanele kana ka gurudo katar iek soba ande aver.
26Ondaka o charo katar o Israel phenda:
¡Phanden e Mikaiase ta inllaren le angla o Amon o gazda e foroko, ta angla mo chavo o Joas! 27Phenen kai me phendem te thoven le ando phandipe, ta samo te den le te jal marrno ta te piel pai ande patnia lligo ni ka iriv man esmiro.
28Ta o Mikaias phenda:
Te irisailan esmiro,
gua si soke o Del ni dia mange orba.
Ta i phenda:
¡Asunen sa e phuvia! 29Ta o charo katar o Israel llelo e Josafatea o charo katar o Juda, ando Ramot katar o Galaad. 30Ta o charo katar o Israel phenda e Josafateke:
Me ka dav kote kai marenpe furiado ande aver patave te na pinllaren man, a tu furiado che patavenchar. Ta o charo katar o Israel thoda pe pete aver patave te na pinllaren le, ta dia kote kai marenpe.
31A o charo katar e Siria bichalda pe tranda ta dui gazda katar e bordona, ta phenda lenge te na marenpe ni barea ni minonea, samo e charoia katar o Israel. 32Kana e gazda katar e bordona avile kai o Josafat, phende:
Vou si o charo katar o Israel. Ta truisarde le te marenpe lea. Ondaka o Josafat urkisarda. 33Kana dikhle e gazda katar e bordona kai vou ni saia o charo katar o Israel, durile letar. 34A iek lleno chudia iek llida ta e llida dia ando charo katar o Israel maskar e patave sastrune. Ta phenda pe boñikoke kai inllarela o bordon:
Irisao ta ikan man katar o maripe soke ranisarde man.
35A o maripe saia but baro gua llive, ta o charo achilo ande po bordon angla e siriura, ta kana perela o kham mulo, ta leko rat perela po bordon. 36Kana perela o kham, ando pero asundilo iek urkipe kai phenela:
¡Suako lleno te irilpe kai po foro, ta kai pi phuv! 37O charo mulo ta ande le ande Samaria, ta kote prajosarde le.
38Ta jalade o bordon po bunari katar e Samaria kote kai avena e kurvichke te jalavenpe. Ta e llukela piena o rat e charoko, gia sar phendaia le o Del.#1 R 21.19.
39Sa so cherda o Ajab, o cher cherdo katar o marfil kai vazdia, ta sa e forura kai vazdia, si pisime ando lil katar e ezgode kai cherde e charura katar o Israel. 40Mulo o Ajab, mapalal charoisarda pe leko than leko chavo o Okosias.
O Josafat charoil ando Juda
2 Kr 20.31-37
41O Josafat, chavo katar o Asa, thoda te charoil ando Juda kana saia o starto burs katar o Ajab, o charo katar o Israel. 42Kana o Josafat thodape te charoil sea leke tranda ta panch burs, ta charoisarda bis ta panch burs ando Jerusalem. Leki dei saia e Azuba, chei katar e Silji.
43O Josafat saia orta angla o Del sargo leko dad o Asa, soke cherda o lachipe angla e akha e Devleke, a ni lia e thana vazdine soke o foro dela kurbanura pe delenge ta phabarena o taimano kote.
44O Josafat achilo ande pas e charoia katar o Israel. 45Sa so cherda o Josafat si pisime ando lil katar e charura e Israeleke. 46O Josafat chudia katar e phuv e murusen kai kurvinape pala pe dela kai achilea ando vreme leke dadeko o Asa. 47Ni saia charo ando Edom, saia samo iek gazda po than e charoko.
48O Josafat cherda llimie sargo gola kai sea ando Tarsis, te sai anel sunakai katar o Ofir. Ta nasti llele soke phagile ando Ezion Geber. 49Ondaka o Okosias phenda e Josafateke:
Muk te llan ande llimie murne sluge che slugenchar, a vou ni kamla.
50O Josafat mulo ta prajosarde le ando foro e Davideko, ta pe leko than charoisarda leko chavo o Joram.
O Okosias charoil ando Israel
51O Okosias chavo katar o Ajab, thodape te charoil ando Israel ande Samaria kana cherela desefta burs kai o Josafat charoila ando Juda. 52Ta ni saia lacho angla o Del, soke cherda sa e ezgode bilache kai cherda leko dad ta leki dei, ta i so cherda o Jeroboam chavo katar o Nabat kai cherda te cherel o bilachipe o Israel, 53radisarda ta blagosisarda e Baale gia sar cherda le leko dad, goleke joliarda e Gazda, o Del katar o Israel.
Currently Selected:
1 Relles 22: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
