1 Juan 2
2
1Chavalen, me pisiv tumenge gala ezgode te na cheren o bilachipe. A te avel iek tumendar kai cherda o bilachipe, si amen abogado angla o Dad, o Jesukristo o chacho.#Ro 6.11-14. 2Vou si o kurbano pala amaro bilachipe, ta inai samo pala amaro bilachipe, vou si kurbano i pala sa o sueto. O zakono.#1 Jn 4.10.
O zakono katar o volipe
3Te gurudam amen e Devleke zakonura, ondaka ka llana kai de istina pinllara le.#Jn 14.15,21,23. 4A te phenel vareko: Me pinllarav le, ta ni guruvel leke zakonura, gua si kojamno ta ande lete inai chachipe. 5Goleke, gua kai kandel leke alava, ande lete de istina si e Devleko volipe, goleke amen llana kai sam lea. 6Gua kai phenel kai llal e Devlea, morabi te llal sar llelo o Jesukristo.
7Phlalalen, gala alava kai pisiv tumenge inai neve, si isto gola kai sea tumen mai anglal. Gala si e alava purane kai asunden mai anglal. 8A me pisiv tumenge iek alava neve kai si chachune ando Kristo ta i ande tumende, soke o truniariko nakhel ta akana kletosarel o villelo chachuno.#Jn 13.34; 15.12.
9Te phenel vareko kai si ando villelo ta murzil pe po phlal, gua lleno si ando truniariko. 10Gua kai volil pe phlale llal ando villelo ta niso nasti peravel le.#Ro 13.12-14. 11Ta o gua kai murzil pe po phlal, llal ando truniariko ta ni llanel kai llal, soke o truniariko korrada le.
O chachuno pachape
12Chavalen, pisiv tumenge soke o Del prostisarda tumaro bilachipe pala leko anav. 13Dadalen, pisiv tumenge soke tumen llanen kai vou saia mai anglal. Pisiu tumenge e terne, te llanen kai dobisarde e llavolo.
14Pisiu tumenge chavalen soke akana pinllaren e Dade. Pisiu tumenge, dada, soke akana pinllaren gole kai saia mai anglal. Ta pusiu i tumenge e ternenge, soke sen zurale ta e Devleke alava si ande tumaro lio ta i soke dobisarden e llavolo.
15Na volisaren e sueto ta niso so si ande le. Vareko te volil e sueto, e Devleko volipe inai ande lete.#Stg 1.27. 16Soke sogo si ando sueto, o kurvaluko e mislura bilache o istardipe, ni aven katar o Dad, aven katar o sueto. 17A o sueto nakhel ta sa leke mislura bilache. A gua kai cherel e Devleki buchi achel ostade.
18Chavalen, gava si o son e vremeko. Sar tumen asunden o Antikristo si te avel, ta akana likiste but antikristura, goleke amen llana kai si o vreme katar o son. 19Likiste amendar, a ni sea amarendar, soke te avilea amarendar achilea amenchar; a likiste amendar te llangliolpe kai inai saurre amarendar.
20O Santo thoda pe tumende o Duo ta llanen sa e ezgode.#1 Kor 2.10-16. 21Me pisiv tumenge inai soke ni pinllaren o chachipe, tumen llanen o chachipe ta ni iek kojaipe nasti avel katar o chachipe. 22¿Ko si kojamno? o kojamno si gua kai phenel kai o Jesus inai o Kristo. Gava si o Antikristo soke phenel kai ni pinllarel e Dade ta ni e Chave. 23Fiko te phenel kai ni pinllarel e Chave, inai le e Dade. A gua kai phenel kai pinllarel e Chave, i e Dade si le.
24Goleke tumen guruven ande tumaro lio so asunden mai anglal, soke te asunden le ta te guruvenle, o Chavo ta i o Dad ka achen tumenchar. 25Gava si o alav kai dia amen o Jesukristo: O zivoto ostade.
26Me pisiv tumenge cheres gola llene kai mangen te kojaven tumen. 27A pe tumende si o Santo Duo kai o Jesukristo bichalda tumenge, ta ni trubul tumen niko te sikavel tumen soke o Duo kai vou dia tumen sikavel tumen katar suako ezgoda ta so sikavel si o chachipe na o kojaipe goleke achen ande iek than e Jesusea. 28Akana chavalen, achen e Kristoia, te sai avel amen vera kana vou ka sikadol ta te na jan lallao angla le kana vou ka avel.
O mukliardipe katar o bilachipe
29Tumen llanen kai o Jesukristo si lacho goleke tumen morabi te llanen kai gola kai cheren o lachipe, gola si chave e Devleke.
Currently Selected:
1 Juan 2: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
