1 Korintios 15
15
O Kristo ustilo katar o meripe
1Akana phlalalen, den tumen golli katar e lachi viasta kai sikadem tumen. Gaia si e lachi viasta kai tumen lien, ta cheres late sen zurale ando pachape. 2Ta cheres gaia lachi viasta tumen ka aven braduime te pachana zurale, isto gia sar me sikaden tumen, a te na cherenale, samo gia pachaien.
3So mai anglal sikaden tumen si isto so me sikilem, kai o Kristo mulo pala amaro bilachipe, isto gia sar phenel o Pisipe,#Is 53.5-12. 4kai prajosarde le ta kai pala e trin llive ustilo katar o meripe, gia sar phenel o Pisipe,#Sal 16.8-10; Mt 12.40; Ech 2.24-32. 5ta kai sikadilo e Sefaseke, ta mai angle sikadilo e desuduie apostolenge.#Mt 28.16-17; Mk 16.14; Lk 24.36; Jn 20.19. 6Ta mapalal sikadilo mai but katar e panlle stotine phlalenge ande iek drom, ta gola llene zivin llik akana, a nesave lendar mule. 7Ta mapalal sikadilo e Santiagoke, ta mai angle sa e apostolenge.
8Ta mai palal sikadilo mange kai sem sargo iek minono kai ni biandilo ande pe chona.#Ech 9.3-6. 9Me sem o mai minono katar e apostolura ta ni sem lacho ni te ikharen man apostol, soke me cherdem te nakhel bari patnia e khanlliri e Devleki.#Ech 8.3. 10A sem so sem soke o Del si lacho manchar, ta leko volipe manchar ni avila samo gia. Soke me radisardem mai but neko sa ogola, a o chachipe ni sema me, o Del saia kai ande po volipe pomozisarda man te cherav gala ezgode. 11Te sem me o von so sikadam, si isto so tumen pachaien.
I amen ka usta katar o meripe
12A amen te phendam kai o Kristo ustilo katar o meripe, ¿soke nesave tumendar phenen kai e mule ni ka usten katar o meripe? 13Soke te na ustena e mule, ondaka ni o Kristo ni ustiloia katar o meripe, 14a o Kristo te na ustilo katar o meripe, ondaka e lachi viasta kai phendam tumenge ni moldaia la niso ta ni tumaro pachape kai si tumen. 15Te avilaiape gia, amen phendama iek kojaipe katar o Del, soke amen phena kai vou vazdia e Kristo katar o meripe, gua ni avilaia gia te na ustilea e mule. 16Soke e mule te na usten katar o meripe, ondaka ni o Kristo ni ustiloia katar o meripe, 17A o Kristo te na ustiloia katar o meripe, tumaro pachape ni moldaia le niso ta tumen llik akana avilena ande tumaro bilachipe. 18Ondaka i e llene kai mule ando pachape ando Kristo si jasarde. 19Te aduricharaia o Kristo te pomozil amen samo ande gava zivoto, avaia o mai baro zao maskar e llene.
20A o chachipe si kai o Kristo ustilo katar o meripe, ta vou si o mai angluno katar e septelie kai chidiniaon soke si o purvo kai ustilo katar o meripe. 21Gia sar avilo o meripe cheres iek lleno, i gia cheres iek lleno ka usten e mule katar o meripe. 22Gia sar ando Adan sa meren, isto gia ando Kristo saurre ka avel len o zivoto.#Ro 5.12-18. 23A suako lleno ka ustel katar o meripe ando vreme kai die le, mai anglal o Kristo, ta kana o Kristo ka avel, ka usten katar o meripe gola kai pachaie ande lete. 24Ondaka ka avel o son katar e phuv kana o Kristo ka dobil sa e charoine ta suako zor, ta ka del e charoina e Devle, kai si o Dad. 25Soke o Kristo trubul te charoil llik kana sa leke dusmanura ka achen thode telal tala leke porrne,#Sal 110.1. 26ta o mai paluno dusmano kai o Kristo ka dobil si o meripe. 27Soke o Del phenel kai sa thoda tala e porrne e Kristoke. A kana phenel kai sa si ande leke va, llangliolpe kai ande gala orbe inai thodo o Del, soke isto o Del si kai thoda sa tala e va e Kristoke.#Sal 8.6. 28Ta kana sa ka avel tala e va e Kristoke, ondaka isto o Kristo, kai si o Chavo, ka thovelpe tala e va e Devleke, soke o Del si kai dia ande leke va sa e ezgode ta gia o Del ka avel sa ande sa.
29Nesave kristinpe ando than iekhe lleneko kai mulo. A te si de istina kai e mule ni ka usten katar o meripe, ¿soke te kristinpe pala lende? 30¿Ta pala so thova amen suako drom amaro zivoto po meripe? 31Phlalalen, suako llive mo zivoto si po meripe, ta gava si o chachipe sargo o baripe kai cherav pala tumende. 32Ando Efeso mardem man e llenenchar kai sea dive sargo zivirinie. A te avela chachipe kai e mule ni ka usten katar o meripe, ¿So dobisardem golea? te si gia, chera sar phenen nesave llene: ¡Ja ta pia, kai thiara ka mera!#Is 22.13.
33Na muken te kojaven tumen, sar vareko phenda:
E bilache llenenchar kai lla murin e lache ezgode kai sikilan. 34Irin tumen pale kai o drom o chacho ta na cheren ios o bilachipe, soke nesave tumendar ni pinllaren e Devle. Phenav gala ezgode te sai avel tumenge lallao.
Sar ka usten e mule katar o meripe
35Sai avelpe kai vareko sai puchel: ¿Sar ka usten e mule katar o meripe? ¿Sar ka avel lengi esnaga? 36¡Savo dilipe puchen! te sai bariol iek patrin e simicha morabi te merel te sai avel zivoto e patrina, 37so thodolpe ande phuv inai e patrin kai si te likel, so thodol pe phuv si e simicha katar o lliu kai si te bariol o katar varesavi aver simicha. 38Ta o Del mai angle cherel la te dikhol sar vou mangel, ta suako simicha del la e esnaga kai si te avel la. 39Na sa e esnage si sargo iek, iek si e esnaga e manuseki, ta aver si e esnaga e ziviriniengi, aver si e chirikliengi, ta aver si e machengi. 40Ta isto gia si e esnage kai si ando miloso, ta esnage kai si pe phuv, ta suako iek si la lako sukaripe. 41Sar klichil o kham inai isto gia sar klichil o chon o e cheraia, ta i maskar e cheraia ni klichin sa sargo iek.
42Isto gia si kana ka usten e mule katar o meripe. So prajolpe ande phuv si so murilpe, a so ka ustel katar o meripe ni ka murilpe nikada. 43So prajolpe si iek esnaga muli, a so ka ustel katar o meripe si iek esnaga blagosime. 44So prajolpe si iek esnaga e phuviaki, a so ka ustel katar o meripe si iek esnaga duoki. Te si iek esnaga phuviaki, si i iek esnaga duoki. 45Gia phenel o Pisipe:
O Del cherda e muruse, o Adan, ta vou saia o purvo manus kai saia le zivoto, a o Kristo, kai si o nevo Adan, cherdilo duo kai del zivoto. 46Goleke, mai anglal saia e esnaga ta mapalal o duo. 47O purvo manus, saia cherdo katar e phuv ta saia e phuviako, a o duito manus si e milosoko.#Jen 2.7. 48Sa e manusa kai zivin pe phuv si len iek esnaga sargo e Adaneki, kai saia cherdo e phuviatar. A sa gola kai zivin ando miloso si len iek esnaga sargo e Kristoki. 49Goleke, gia sar dikhiva sargo o manus kai saia cherdo e phuviatar, isto gia ka dikhiva sargo gua kai avilo katar o miloso. 50Phlalalen, mangav te phenav tumenge kai ni o mas ni o rat nasti avenj ande charoina e Devleki, ta so murilpe nasti avel kote kai nikada ni ka murilpe niso.
51Me mangav te llanen e volia gurudini e Devleki: Na sa ka mera, saurre ka ava pharrudine. 52Ande iek vreme, gia sar putaol ta phangliol e iak, ande mai paluni tuturuga, soke ka basel e tuturuga, ta e mule ka usten katar o meripe ta nikada ios ni ka meren ta amen ka ava pharrudine.#1 Ts 4.15-17. 53O Del ka pharruvel gala esnage amare, kai meren ta murinpe, pe esnage kai ka zivin ostade ta nikada ni ka meren. 54Kana ka nakhen gala ezgode amenchar, ka cherdol so phenel o Pisipe: ¡O meripe ka avel zatrime!#Is 25.8. 55Meripe, ia ni dobi ios. Ia Inai tut ios zor te dukhave amen#Os 13.14. 56Soke e duk e merimaki si o bilachipe, a e zor e bilachimaki bariol cheres o zakono e Moiseseko. 57¡A fala e Devleke kai cherel amen te dobi ande amaro Gazda o Jesukristo!
58Goleke, phlalalen kai voliv tumen, llan zoriaia ta radi suako drom mai but ta mai but e Gazdake, ta llanen kai sa so radin e Devleke inai samo gia.
Currently Selected:
1 Korintios 15: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
