1 Korintios 14
14
1Roden te avel tumen volipe, ta mangen katar o Santo Duo te del tumen mai anglal te anen poroka e Devleki. 2Kor del orba ande aver chibia, del orba e Devlea ta na e manusenchar, soke niko ni acharel leke. Ande po duo phenel ezgode gurudine ta niko ni acharel len. 3A ko anel e poroka e Devleki, bariarel o pachape e llenengo soke acharen leke ta len zor. 4Ko del orba ande aver chibia, cherel le te bariarel piro pachape, a ko anel e poroka e Devleki, bariarel o pachape e khanllirako.
5Me manglema sa tumen te diena orba ande aver chibia, a avilaia mange mai drago te diena orba cheres e poroka e Devleki, soke gaia ezgoda si mai preche neko te den orbe ande aver chibia, te na avela vareko te phenel so phenda o gua lleno kai dia orba ande aver chibia, ta gia e khanlliri te bariol ando pachape. 6Phlalalen, mai preche avela te phenav tumenge so sikavel amen o Del ta te sikiva katar o chachipe, te dav tumenge orba katar e poroka e Devleki ta te dav tumenge orba katar varesavo sikadipe, soke ni blazila tumenge niso te llau te dikhav tumen ta te dav tumenchar orba ande aver chibia.
7E ezgode kai basaldon sargo o firo o e arpa, ni basen sargo iek, soke te avelape gia ni achardola sar asundol suako iek. 8A e tuturuga te na basela bristo kana si o maripe, niko ni lacharelape te marelpe. 9Isto gia si tumenchar, soke kana tumen den orba alavenchar kai nasti achardon ¿sar ka llangliolpe so tumen phenen? ¡Gava si sargo te den orba e balaviake! 10Ni llanav pe gachin chibia si pe phuv, ta suako chib si la lake alava. 11A me te na pinllarava gola alava, me ka avav gole lleneke kai del orba manchar sargo avere phuviengo, ta i vou mange ka avel sargo avere phuviengo. 12Goleke, soke tumen pe gachin mangen e bucha e Duoke, roden mai anglal gola bucha kai mai bariaren o pachape e khanllirako.
13Goleke, ko del orba ande aver chibia morabi te mangel e Devletar te phenel so si gola alava kai dia orba te sai acharen le i ogola llene. 14Soke me te moliv man ande aver chib, si de istina kai moliv man me duoia, a mo achardipe achel mulo. 15Goleke, ¿so morabi te cherav? morabi te moliv man e duoia ta i me achardimaia. Morabi te llilabau e duoia ta i me achardimaia. 16Soke tu te blagosi e Devle samo e duoia, ta varesavo lleno te asunela tut, nasti ka molilpe tuia ta te phenel: gia te avelpe, soke ni ka acharel niso. 17Tu sar dian fala sai cherdanle but sukar, a gua lleno kai asunda tut, ni ka pomozil le ande niso. 18Dau fala e Devle soke dav orba ande aver chibia mai but neko sa tumen, 19a kana sem ande khanlliri mange si mai lache te phenav panch alava te acharen len, ta gia te sikavav averen, neko te phenav des milie alava ande aver chibia.
20Phlalalen, na mislin tumen sargo minone, mai sukar si te aven sargo minone ando bilachipe a bare ande tumaro mislo. 21Ando Pisipe phenel: Ka dav orba gale phuviake ande aver chibia kai ni pinllaren ta katar o mui e llenengo kai si katar aver phuv, ta ni gia ni ka thoven mange sama phenel o Gazda#Is 28.11-12. 22Goleke e chibia si te dikhol iek ezgoda e llenenge kai ni pachan, inai golenge kai si len pachape. A e poroka e Devleki si e llenenge kai si len pachape, na golenge kai ni pachan. 23A te avelape kai sa e llene katar e khanlliri chidiniaon ande iek than, ta sa den orba ande chibia, ta del vareko kai ni acharel o inai le pachape, vou ka mislilpe kai tumen dilailen. 24A saurre te dena orba katar e poroka e Devleki ta del iek lleno kai ni pachal o kai ni acharel, vou ka acharelpe kai si bilacho kana ka asunel gola alava kai si e Devleke. 25Ta gia ka putaol sa leko lio, ta ka blagosil changenchar e Devle ta ka pachal kai chachimaia o Del si tumenchar.
Morabi te avel liubao ande khanlliri
26Phlalalen kana tumen ka chidiniaon, nesave sai llilaben, aver sai sikaven o sai phenen so o Del sikada lenge, aver sai den orba ande aver chibia o sai phenen so die orba ande gola chibia. Ta sa gala ezgode morabi te cherdon te bariardol iek avere. 27Kana ka den orba ande aver chibia morabi te cheren le dui o trin llene, ta te cheren le iek po iek, ta morabi te avel vareko te phenel so phende ande gola chibia kai die orba. 28A te na avela niko ande khanlliri te phenel so phenen ande gola chibia kai die orba, gola llene morabi te achen ta te den orba samo von peke ta e Devleke. 29Isto gia te avena poraukura, morabi te den orba dui o trin, a ogola morabi te thoven sama ta te mislinpe so phendilo. 30A o Del te sikavela vareso iekhe llene kai si besindo kote, ondaka o gua kai dela orba mai anglal morabi te achel. 31Gia iek po iek ka phenen so o Del phenda lenge, te gia saurre ka sikon ta ka barion ando pachape. 32E poraukura morabi te llanen kana si te phenen e poroka e Devleki ta kana morabi te na den orba, 33soke o Del si o Del katar e pas na katar e burkania.
Soke gia sar si sikade te cheren ande sa e khanllira, 34e diskinie morabi te na den orba kana chidiniaon ande khanlliri, soke inai dino lenge te den orba ande khanlliri. Von morabi te aven tala o va pe rromengo, gia sar phenel ando zakono. 35A te mangena te sikon vareso, te puchen pe rromen ande pe chera, soke inai sukar iek diskinia te del orba ande khanlliri. 36Tumen ni cherden e alava e Devleke, ta ni sen tumen e edine llene kai lien len.
37Vareko te mislilape kai si profeta, o pachala kai o Santo Duo cherel buchi lea, ka pinllarel kai e alava kai pisiv tumenge si zakonura e Gazdake. 38A te na pinllarela e alava kai pisiv tumenge, ni o Gazda ni ka pinllarel le.
39Goleke phlalalen, morabi te aven zelne te len e poroka e Devleki, ta na achaven e llenen te den orba ande aver chibia, 40ta ande sa gala ezgode te avel liubao ta te cheren le sar trubulpe.
Currently Selected:
1 Korintios 14: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
