1 Kronikas 28
28
O Salomon thovelpe po than e Davideko
1O David chidia ando Jerusalem sa e gazda katar o Israel, e gazda katar e viche, e gazda katar e boñikura, e kapitanura katar e milie ta katar stotine boñikura. E llene kai dikhena e ezgode katar e phuv, e ezgode katar o charo ta leke chave ta e llene mai preche.
2Ondaka o David ustilo pe porrne ta phenda:
Asunen man, phlalalen ta mo foro. Me mangava te vazdav iek cher te sai achel andre e arka katar o alav e Devleko, ta te avel o cher katar o trono amare Devleko. Andem sa e ezgode te sai vazdav le. 3A o Del phenda mange:
Tu ni ka vazde mange cher te blagosin mo anav, soke san lleno kai marelpe ta mundardan bute llenen. 4A o Del e Israeleko esvirisarda man maskar sa mi familia te thovel man o charo katar o Israel ostade. Soke o Del esvirisarda e vicha katar o Juda te gazdaril, ta katar e vicha e Judaeki esvirisarda me familia, ta maskar me phlal esvirisarda man te avav o charo e Israeleko. 5Ta akana maskar e but chave kai dia man o Del, o Del esvirisarda me chave e Salomone te besel po trono katar e charoina e Devleki po Israel. 6Ta i o Del phenda mange:
Cho chavo o Salomon ka vazdel mange mo cher ta me sobe, soke me esvirisardem le te avel mo chavo, ta me ka avav leke iek dad. 7Te cherela so phenel mo zakono ta e ezgode kai phendem sar cherda le llik akana, ka cherav te avel leki charoina ostade.#2 S 7.1-16; 1 R 5.3; 1 Kr 17.1-14.
8Akana, angla sa o foro katar o Israel, angla e mai preche llene e Devleke ta angla amaro Del kai asunel amen, guruven sa so phenel o zakono e Devleko, tumaro Del, te avel gaia phuv ostade tumari, ta te muken la tumare chavenge. 9A tu Salomon, chavo murno, lla pala o Del che dadeko ta radisar leke sa che liea ta sa che zoriaia, soke o Del dikhel o lio ta llanel e mislura katar suako lleno. Te rodea le, ka malave le. A te mukea le, vou ka mukel tut ostade. 10Na bristar kai o Del esvirisarda tut te vazde iek cher te avel leko santuario. ¡De tut zor, ta thov tut te chere le!
11Ondaka o David dia pe chave e Salomone o lil kai phenel sar ka cherdol o udar e chereko, e sobe, e sobe kai si upre, e sobe kai si andre, ta o than santisimo. 12Ta i dia le o lil kai phenel sar ka cherdol e sobe katar o cher, e sobe kai sea te aven truial o barvalipe, ta e sobe katar e ezgode chinade e Devleke, 13ta e sobe katar e popura, e levitura ta e llenenge kai ka radin ando cher e Devleko, ta e sobe katar e ezgode kai radin lenchar ando cher e Devleko.
14Ta dia le o sunakai ta o rup te cheren sa e ezgode sunakune ta rupune prema so saia te phariaven sa e ezgode chinade po rado e Devleke. 15Ta dia le sunakai ta rup te cheren e kandelabrura ta e lampare sunakune ta rupune. Dia le prema o pharipe katar suako iek. 16Isto gia dia le sunakai ta rup prema so saia te phariaven te cherel e stalia sunakune ta rupune, kai saia te thoven o marrno dino e Devleke. 17Ta sunakai ta rup te cherel e beliuske, e tasura ta e tasura bare, suako iek prema so phariavena. 18Ta i dia le sunakai prema so saia te phariavel o altar katar o taimano, o bordon katar e kerubinura sunakune, kai pe pakhenchar ucharena e arka katar o alav e Devleko.
19Sa gala ezgode sea pisime katar o va e Devleko mange, ta cherda man te acharav sar saia te cheren sa o rado.
20Ondaka o David phenda pe chaveke e Salomonoke:
¡Le chuke zor, ta cher cho rado! ¡Na dara, soke o Del o Gazda, mo Del, ka avel tuia! Vou ni ka mukel tut lligo ni ka gotovi te vazde o cher e Devleko. 21Kate si e popura ta e levitura kai ka cheren o rado katar o cher e Devleko. Ta i but llene ka pomozin tut ando rado, llene kai llanen sukar te cheren po rado. E gazda ta sa o foro kai ka pomozin tut, ka achen telal tala che va.
Currently Selected:
1 Kronikas 28: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
