1 Yohana 4

Nkhoo a Tutë na Nkhoo a Wegheeghe

1Ayanjwi, mutahuvëe mu nkhoo, ëgweeso ihunguhëi nkhoo yasii na goona mbesa njeeso në ya Muungu. Gusoko anyagëdaghu va uregheeghe vakundanëë mung'ë a urëmi uruu. 2Gwa ërëë nyenye mumanyie Mwahu wa Muungu; mu nkhoo nëëgukumwua mwino Yesu Kiristo wajie mung'ë a mwëërë në a Muungu. 3Na mu nkhoo në ëtiumukumuwa Yesu ti a Muungu. Ëyëë në nkhoo a mufëngi wamwa Kiristo, asëë në nyenye mwategheeye mwino arë ëjie, na itungwee ë mu urëmi. 4Ang'ënya në anyui, nyenye mwë wa Muungu, na mwavahumie veeso. Gusoko mweeso në wë mukhatë anyu në müküü nanguu ukëra mweeso në wë mu urëmi. 5Veeso në va mu urëmi, gwa uvii asaa nëvëuyarighitya në a mu urëmi, na urëmi uguvategheeya veeso. 6Sese gwë va Muungu. Wasuu nëumumanyie Muungu ugugutegheeya sese na mweeso në ti wa Muungu atiugutegheeya sese. Gwa ërëë sese gumanyie nkhoo a tutë na nkhoo a wegheeghe.

Muungu unë Uyanjo

7Ayanjwi, sese në gwiyanje mu muntu na muuyakwe; gusoko uyanjo unë wa Muungu. Na mweeso nëuyanjëte vauya ufafiwe na Muungu na umumanyie Muungu. 8Mweeso në atiyanjëte vauya atimumanyie Muungu; gusoko Muungu në uyanjo. 9Mung'ë a uyanjo uruu në uwukweti mweeso wadahie ukunukua mukhatëkhatë itu, uvii Muungu wamutumie Mwanakwe umwedu mu urëmi, gusoko sese gudahe uduva ukëërëa mweeso. 10Uruu unë uyanjo, tiese sese gwamuyanjie Muungu ëgweeso mweeso waguyanjie sese na agamutuma Mwanakwe atendeke njëa irekewa ra mahutye itu.

11Ayanjwi, nësa Muungu waguyanjie sese vii, sese noo inoneye gwiyanje mu muntu na muuyakwe. 12Gutie muntu nëwamughune Muungu mba nduvë. Nësa sese gwiyanjëte mu muntu na muuyakwe, Muungu ugikhaa mukhatë itu na uyanjo wakwe ukhondekekie mukhatë itu.

13Gwa ërëë sese gumanyie mwino sese gugikhaa mukhatë akwe na mweeso mukhatë itu, gusoko mweeso wadahie ugufaa sese Mwahu wakwe mughonjo. 14Na sese gwadahie goona na usudangëa mwino Tata wadahie umutuma Mwanakwe mwino Mutyoi wa urëmi. 15Wasuu nëugukumwua mwino Yesu në Mwana wa Muungu, Muungu ugikhaa mukhatë akwe, na mweeso mukhatë a Muungu. 16Uvii, sese gumanyie na guhuvëe uyanjo në Muungu uwukweti gusoko itu. Muungu në uyanjo na mweeso nëugikhaa mukhatë a uyanjo ugikhaa mukhatë a Muungu, na Muungu ugikhaa mukhatë akwe. 17Mukhatë a ërëë uyanjo wa Muungu ukhondekekie itambëëmwe na see, gusoko sese gudahe uhanga ukhamu gusoko a itiku ra uramwui. Ëyëë në uvii gusoko mwino mweeso urë uvii sese gwë uvii mu urëmi uruu. 18Gutie wova mukhatë a uyanjo, ëgweeso uyanjo nëukhondekekie ugujuncha gunji wova. Gusoko wova ugwendaa itambëëmwe na uramwui, na mweeso nëugoghofa atikhondekekie mung'ë a uyanjo. 19Sese gumuyanjëte Muungu na guvayanjëte woyitu, gusoko mweeso waguyanjie sese songe. 20Nësa muntu gëkaku uguhanya, “Nene nëmuyanjëte Muungu,” na umuhwëëte muunakwe, mweeso në mwegheeghe. Gusoko mweeso në ati muyanjëte muunakwe në mweeso wamughune, ati udaha umuyanja Muungu në mweeso inamwoonaa. 21Na mweeso wagufee sese iraghëëyo ërëë, mwino mweeso nëumuyanjëte Muungu ugufenjiwa amuyanje nane muunakwe noo.

Currently Selected:

1 Yohana 4: RIMRC

Highlight

Copy

Compare