1 Yohana 5

Uhumi witu mu u Urëmi

1Mu muntu nëuhuvëe mwino Yesu unë Kiristo wafafiwe na Muungu, na mu muntu nëumuyanjëte mufafi umuyanjëte mwanakwe. 2Gwa ërëë sese gumanyie mwino guvanjëte vana va Muungu, itungo në sese gumuyanjëte Muungu na gukwatëëre maraghëëyo akwe. 3Gusoko uruu unë uyanjo wa Muungu, uvii sese gukwatëëre maraghëëyo akwe. Na maraghëëyo akwe ti makaku ino kunë sese. 4Gusoko wasuu unë ufafiwe na Muungu uguuhumaa urëmi. Na uruu në uhumi në uguuhumaa urëmi, rasëë në sese guhuvëe. 5Nyanyu nëuguuhumaa urëmi ëgweeso mweeso nëuhuvëe mwino Yesu unë Mwana wa Muungu?

Usudangei Nëumughokee Yesu Kiristo

6Uyuu unë mweeso nëwajie gwa majë na gwa saghami, Yesu Kiristo. Ti gwa majë gutufu ëgweeso gwa majë nanë saghami. 7Na Mwahu në masudanga, gusoko Mwahu në wa tutë. 8Gwina masudanga vatatu, girunde, Tata, Ukhani nanë Mwahu Mweru na avaa vatata intu rëmwe. 9Nësa sese gughenyifa usudanga wa antu, usudanga wa Muungu në üküü nanguu. Gusoko uruu unë usudanga wa Muungu mwino mweeso wadahie umusudangëa Mwanakwe. 10Mweeso nëumuhuvëe Mwana wa Muungu ukweti usudanga mukhatë akwe mughonjo. Mweeso në atimuhuvëe Muungu wadahie umutendaa mweeso mwegheeghe gusoko mweeso inahuvëa usudanga në wadahie umusudangëa Mwanakwe. 11Na uruu unë usudanga, mwino Muungu wagufee sese ufanga wa khae na khae, na ufanga uruu wë mukhatë a Mwanakwe. 12Mweeso unë umukweti Mwana ukweti ufanga; mweeso unë ati mukweti Mwana wa Muungu atikweti ufanga.

Ufanga wa Nkhae na Nkhae

13Nene ngamwandëkëa ërëë kunë nyenye unë muhuvëe rina ra Mwana wa Muungu, gusoko nyenye mudahe umanya mwino nyenye mukweti ufanga wa khae na khae. 14Na uruu në ukhamu në sese guwukweti mukhatë akwe, mwino sese guromba intu gëkaku gwa uhonga mafenji akwe mweeso ugugutegheeya sese. 15Na nësa sese gumanyie mwino mweeso ugugutegheeya sese gwa intu gëkaku nëguromba, sese gumanyie mwino guhanga mantu asaa nëguyarombaa kunë mweeso.

16Nësa muntu gëkaku ugumwoona muunakwe ugutenda ihutye nëti ra ikuya, mweeso winjë uromba, na Muungu winjë umufa mweeso ufanga gusoko a avoo unë ihutye ti ra ikuya. Gwina ihutye në ra ikuya; nene ntiuhanya mwino muntu arombe gusoko a rasëë. 17Mahutye oong'e në ihutye, ëgweeso gwina ihutye në ti ra ikuya.

18Sese gumanyie mwino muntu woong'e nëwafafiwe na Muungu atiutendaa ihutye, ëgweeso Mweeso në arë wafafiwe na Muungu, Muungu ugumughojaa mweeso, na muvë uyoo atiumutenyaa.

19Sese gumanyie mwino sese gwë va Muungu, na urëmi woong'e wë mukhatë a nguu ya muvë uyoo.

20Na sese gumanyie mwino Mwana wa Muungu wajie na wadahie ugufaa sese umanyi, umumanya mweeso në wa tutë. Na sese gwë mukhatë akwe unë wa tutë, mukhatë a Mwanakwe Yesu Kiristo. Uyuu në Muungu wa tutë na uyuu në ufanga wa khae na khae. 21Ang'ënya në anyui, ighoji nkhoo yanyu na sanamu.

Currently Selected:

1 Yohana 5: RIMRC

Highlight

Copy

Compare