Malumbo 37
37
MUSI 7 CHAMAGHERI
1Usikurishe wasi amu ya wala weketa viwiwi: nete usiwaneng’e wala wevihira visina ngalo.
2Amu afuhi wenetemwa sa mani: na wenenyaruka sa kimeo kiwisi.
3Uitikije hena Mzuri, na ukete vyedi: ikaa isangeni, ureluratera luitikijo.
4Ukuiseje pia ghati ya Mzuri: na enekuinga vila vikundike ngoroni hako.
5Uiwike nzia yako hakwe Mzuri: uitikije hena ye, na eneifisha.
6Eneiosha ngalo yako kufuma sa kyangaji: na wuchili wako sa hemusi.
7Soghoka hakwe Mzuri, umwinde hena kugumiria: usikurishe wasi amu ya ula eketa nguwari nzieni hakwe, amu ya mundu efisha makusaro mawiwi.
8Ushighe kuregija, utane na oro: usikurishe wasi, amu ni hena kuketa viwiwi.
9Amu waketi‐viwiwi wenechika: kake wala wemwinda Mzuri, wenelihoja isanga.
10Amu kutera kadongo, na wawiwi wenesoweka: ee, unehayoa muno handu hakwe, na tekaokaye.
11Kake wahoo wenelihoja isanga: na wenekuiseja na luworo lwingi.
12Wawiwi wela ngiliwata wanga yakwe mwenye ngalo: na emtafunia majegho makwe.
13Mzuri enemsekia: amu ewona ti musi wakwe waza.
14Wawiwi weidiwa kujuta muhandi, na kuhinda wuta: waghushe wakiwa na wala wesowa vindu, wakome wala weirowili nzieni.
15Muhandi wawo uneingia na ngoro yawo wenye: na mawuta mawo menebaika.
16Keba kidongo mwenye ngalo ekihete: kukela wuingi wa wawiwi weingi.
17Amu mikono yawo wawiwi inebaika: kake Mzuri emwimusha mwenye ngalo.
18Mzuri eitisiwa misi ya wairowili: na uhoja wawo uneoka wa ndarasi.
19Tewekaoke na soni magheri ma viwiwi: na misi ya nzaa weneighuta.
20Kake wawiwi weneteka, na maring’a makwe Mzuri weneoka sa marisho medi: weneiting’o, sa moshi weneiting’o deng’e.
21Wawiwi wahakua, wasiihewa: kake mwenye ngalo eketa hena kuora, na eng’ola.
22Amu wala wetasiwe na ye wenelihoja isanga: na wala weseswa na ye wenechiwa.
23Mitongie ya mundu yadindijwa na Mzuri: na eisejwa na nzia yakwe.
24Ekigwa, tekaghushwa deng’e: amu Mzuri emwimusha na mkono wakwe.
25Niokie mdongo, na ingeriaha nakua: kake simewonami mwenye ngalo eshighwa, nete waana wakwe weomba kidjo.
26Hemusi puti eketa na kuora, na ehakusha: na waana wakwe wetasiwa.
27Shigheni viwiwi, keteni vyedi: mureikaa ndarasi.
28Amu Mzuri ekundie wuchili, na tewashighaye washenete wakwe: werindwa ndarasi, kake waana wa mbiwi wenechwiwa.
29Wenye ngalo wenelihodja isanga: na wenetua uko ndarasi.
30Itumbu la mwenye ngalo lakutetia kucha: na lumi lwakwe lwaghamba wuchili.
31Sheria ya Izuwa wakwe ioho ngoroni hakwe: mawato makwe temekashereta nete limwe.
32Mbiwi emyoa mwenye ngalo: na eenda nzia ya kumkoma.
33Mzuri temshighaye mkononi hakwe: nete temchiliaye magheri eingia na wuchili.
34Mwinde Mzuri, na uigure nzia yakwe; na enekukweja ulihoje isanga: wawiwi wekichwiwa, unewona.
35Nimbonie mbiwi mwenye zinya nyingi: ekikuronga sa mti mbisi umea handu hakwe.
36Kake mwe evetie, na yoa, teohoye: ee, nikamwenda, asiidime kuwonwa.
37Yoa nezo mundu eirowili, na yoa ula erongeke: amu kuidiwika kwa mundu ula luworo.
38Kake watekwa, wenenyamarwa hamwe: kuidiwika kwawo wawiwi kunechika.
39Kake lukio lwawo wenye ngalo ni lwa kufuma hakwe Mzuri: niye boma yawo magheri ma wasi.
40Na Mzuri ewaghenja, na ewakija: ewakija ghati ya wawiwi, na ewahodja, amu wemdindikia.
Currently Selected:
Malumbo 37: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
