Malumbo 119
119
MUSI 24 CHAMAGHERI
1Wetasiwe niwo werongeke ghati ya nzia: wesela ghati ya sheria yakwe Mzuri.
2Wetasiwe niwo wegura mburi jakwe: wemwenda na ngoro yose.
3Ee, teweketawo kisina‐ngalo: wesela ghati ya nzia jakwe.
4Utetuaghanyie malosho mako: tumagure muno.
5Nzia jangu jiarehwe: nimagure maitanawo mako.
6Niho sikagurwe ni soni: nineikanimagurie nganyi maaghanyo mako mose.
7Ninekuanjela na ngoro irongeke: nikikulosha mawuchili mako ma ngalo.
8Ninemagura maitanawo mako usinishighe deng’e.
BETH
9Hena kini mbwange eneizerrija nzia yakwe: hena kuirinda hena kiteto kyako.
10Na ngoro yangu yose nakuenda: nisiteke ghati ya maaghanyo mako.
11Nakiwisa kiteto kyako ngoroni hangu: nisikete ng’oki wanga yako.
12Utasiwe we, ee Mzuri: uniloshe maitanawo mako.
13Na miomo yangu namateta: mawuchili mose ma itumbu lako.
14Niizihirwe ghati ya nzia ja mburi jako: sandu ghati ya mali mose.
15Ninekusara ghati ya malosho mako: na ninejiguria nganyi nzia jako.
16Ninekuiseja ghati ya maitanawo mako: sikakiiwae kiteto kyako.
GIMEL
17Ukete kuora hena mzoro wako, nesa nikie: huwo ninekigura kiteto kyako
18Unijughuie meso, nesa niwone: marighio ma kufuma sheria yako.
19Nimi mugheni masangeni: usiniwisie maaghanyo mako.
20Ngoma yangu ibaike hena nyami: iihete hena mawuchili mako misi yose.
21Uwadewera wenye‐mafuti, weseswa: niwo weteka ghati ya maaghanyo mako.
22Uniwushijie nguruna na kudawa: amu najigura mburi jako.
23Njama pia weikee wakateta wanga yangu: kake muzoro wako ekusarie ghati ya maitanawo mako.
24Mburi jako pia ni luisejo lwangu: na wandu wa kuchila kwangu.
DALETH
25Ngoma yangu yagurana na purughushe: uniwushe hena kiteto kyako.
26Nijitete nzia jangu, ukanitalwa: uniloshe maitanawo mako.
27Unioshe mwenye kutwarija nzia ya malosho mako: huwo ninekusara ghati ya marighio mako.
28Ngoma yangu yagwa hena kuemea: unidindije hena kiteto kyako.
29Uniwushijie nzia ya maongo: ureniinga sheria yako na mvono.
30Nisaghure nzia ya luitikijo: namawika mawuchili mako msongorana wangu.
31Nagurana na mburi jako: ee Mzuri, usinigere soni.
32Nineidindikia nzia ya maaghanyo mako: uneikauninetijie ngoro.
MUSI 25 HEYAWO
HE
33Uniloshe, ee Mzuri, nzia ya maitanawo mako: na nineigura mtano kuidiwika.
34Uniinge kutwarija, na nineigura sheria yako: ee, nineigura na ngoro yangu yose.
35Unitike ghati ya nzia ya maaghanyo mako: amu ghati yakwe naisejwa.
36Uniinamije ngoro hena mburi jako: na si hena kulangwa.
37Unigharushe meso masiyoe vindu visiwe: na uniwushe ghati ya nzia jako.
38Ukidindije kiteto kyako hena muzoro wako: nikyo kyakwe ekuondoka.
39Ugharushe hae nguruna yangu, yaniitusha: amu mawuchili mako ni medi.
40Yoa, niokie na nyami hena malosho mako: uniwushe ghati ya ngalo yako.
VAU
41Malusario mako manizie, ee Mzuri: lukio lwako, hena kiteto kyako.
42Huwo nineoka na kumtalwa ula enidewera: amu nakiing’idaki kiteto kyako.
43Na usiuhe deng’e kiteto kya kididi kufuma itumbu langu: amu naing’idaki ghati ya mawuchili mako.
44Huwo nineigura sheria yako misi yose: ndarasi na ndarasi.
45Na ninetonga nisina swijo: amu namaenda malosho mako.
46Na ninejitetia mburi jako msongorana na wafumwa: nisigurwe ni soni.
47Na ninekuiseja ghati ya maaghanyo mako: emo nimakundie.
48Ninewushija mikono yangu hena maaghanyo mako, nimakundie: na ninekusara maitanawo mako.
ZAIN
49Ukikumbuke kiteto hena mzoro wako: amu uniosha mwenye kuing’idaki.
50Ulu nilo ludindijo lwangu ghati ya wasi wangu: amu kiteto kyako kyaniwusha.
51Wenye mafuti weokie wekinisola muno: kake sigharukami kufuma sheria yako.
52Namakumbuka mawuchili mako ma kae, ee Mzuri: nikakudindija.
53Kureghija kubaha kwanigura: amu ya wala wawiwi weishigha sheria yako.
54Maitanawo mako meokie vivino vyangu: nyumbeni ha kuzoka kwangu.
55Nilikumbuke izina lako, ee Mzuri, kio: nikaigura sheria yako.
56Nikaoka na kindu iki: amu nimagurie malosho mako.
CHETH
57Mzuri niye ngata yangu: nighambie ti ninevigura viteto vyako.
58Nikundie lukundo lwako na ngoro yangu yose: unisarie hena kiteto kyako.
59Nikagheshijia nzia jangu: nikamagharusha maghu mangu hena mburi jako.
60Nikasara, nisisheshe: kumayoa maaghanyo mako.
61Nzighi ja wawiwi janichunga mbai jose: kake siiwaami sheria yako.
62Kio ghati ninewuka nikung’olie haika: amu ya mawuchili mako ma ngalo.
63Nimi mughenji wawo wose wekuondoka: na wawo wemagura malosho mako.
64Masanga, ee Mzuri, meizua lusario lwako: uniloshe maitanawo mako.
TETH
65Uketie nezo hena mzoro wako: ee Mzuri, hena kiteto kyako.
66Uniloshe kuchila kwedi na kutisiwa: amu namaitikija maaghanyo mako.
67Kuwoka nisimerishwa wasi nitekie: kake ingeriaha nakigura kiteto kyako.
68Niwe wedi, na waketa vyedi: uniloshe maitanawo mako.
69Wenye mafuti wechwa maongo wanga yangu: ninemagura malosho mako na ngoro yangu yose.
70Ngoro yawo ibandie sa mafuta: kake naizihirwa ghati ya sheria yako.
71Ni kyedi hena mi ti niokie na wasi: nesa nikuloshe maitanawo mako.
72Sheria ya itumbu lako keba hangu: kukela elfu ja thahabu na fetha.
MUSI 25 CHAMAGHERI
JOD
73Mikono yako inilungie ikaniarehia: uniinge kucha, nesa nikuloshe maaghanyo mako.
74Wala wekuondoka weneniwona na weneizihirwa: amu niokie na kuing’idaki ghati ya kiteto kyako.
75Natisiwa, ee Mzuri, ti mawuchili mako mena ngalo: na ti hena luitikijo wanirisha wasi.
76Lukundo lwako, nakusemba, luoke hena kunidindija: sandu utetie na mzoro wako.
77Masario menyoie mako manizie, nesa nikie: amu sheria yako ni luisejo lwangu.
78Wenye mafuti wagurwe ni soni; amu wenighusha na maongo: kake ninekusara ghati ya malosho mako.
79Na wala wekuondoka wanigharukie: na wenejitisiwa mburi jako.
80Ngoro yangu ioke iirowili ghati ya maitanawo mako: nisigurwe ni soni.
CAPH
81Ngoro yangu yasokea hena lukio lwako: kake naing’idaki hena kiteto kyako.
82Meso mangu megwa hena kiteto kyako: magheri naghamba, Ni rini unenidindija.
83Amu niokie sa mkota hena handu ha moshi: kake simaiwaami maitanawo mako.
84Misi ya mzoro wako ni iyo: ni rini uneketa wuchili wanga yawo wenikinya.
85Wenye mafuti weniforia mawongo: wala wesiiratera sheria yako.
86Maaghanyo mako mose mena luitikijo: wenikinya wesina lukake; unighenje.
87Weokie afuhi na kunikoma masangeni: kake simashighami malosho mako.
88Uniwushe hena lukundo lwako: huwo nineigura mburi ya itumbu lako.
LAMED
89Ndarasi, ee Mzuri: kiteto kyako kyawikwa wanga.
90Luitikijo lwako ni hena marika mose: umaduwija masanga, namo meikaa.
91Vyaikaa yoo hena maitanawo mako: amu vindu vyose ni wazoro wako.
92Kwakicha sheria yako teiokie luisejo lwangu: kwakicha nikiteka ghati ya wasi wangu.
93Sikaiwaami ndarasi malosho mako: amu hena ama uniwushie.
94Nimi wako, unikije: amu namaenda malosho mako.
95Wawiwi waniyayia nesa waninyamare: kake ninejigheshijia mburi jako.
96Nawona kuidiwika kwa wuirowili wose: kake aghanyo lako laarama muno.
MEM
97Nize niikundie sheria yako: iokie makusaro mangu hemusi puti.
98Maaghanyo mako meniosha mwenye kucha kukela maring’a mangu: amu misi yose meoho hamwe nami.
99Naidima kutwarija kukela walosha wangu wose: amu mburi jako ni makusaro mangu.
100Natwarija kukela waghosi: amu namagura malosho mako.
101Namaswija maghu mangu ghati ya nzia mbiwi jose: nesa nikigure kiteto kyako.
102Sigharukami kufuma mawuchili mako: amu niwe uniloshie.
103Nize viteto vyako vyanona hena kuchama kwangu: kukela nzoke itumbuni hangu.
104Hena malosho mako nawono kutwarija: hena iyo nasua nzia mbiwi yose.
MUSI 26 HEYAWO
NUN
105Kiteto kyako ni taa hena maghu mangu: kyangaji hena nzia yangu.
106Niketie kiraro, nikakidindija: ti ninemagura mawuchili mako ma ngalo.
107Narishwa wasi muno: uniwushe, ee Mzuri, hena kiteto kyako.
108Uviuhie, nakusemba, ving’olwa vya lukundo vya itumbu langu, ee Mzuri: na uniloshe mawuchili mako.
109Ngoro yangu misi yose mikononi hangu: kake siiwaami sheria yako.
110Wawiwi wenigeria izero: kake sitekami kufuma malosho mako.
111Najiuha mburi jako kuoka uhoja wa ndarasi: amu nijo kuizihirwa kwa ngoro yangu.
112Nainamija ngoro yangu nikete maitanawo mako: ndarasi, mtano na kuidiwika.
SAMECH
113Nashishirrwa na wala wena ngoro mbiwi: kake naikunda sheria yako.
114Niwe handu hangu ha kukuwisa, na ngao yangu: naing’idaki ghati ya kiteto kyako.
115Fumeni hangu, unywi mukete viwiwi: nesa nimagure maaghanyo ma Izuwa wangu
116Uniwushije hena kiteto kyako, nesa nikie: na nisigurwe ni soni amu ya kwing’idaki kwangu.
117Uniimushe, na ninetonga na kiboha: na ninemayoa maitanawo mako misi yose.
118Uwawatie wala wose weteka kufuma maitanawo mako: amu ukeleki wawo ni maongo.
119Uwateshie wawiwi wose wa masanga sa mafuo: hena iyo najikunda mburi jako.
120Muri wangu wadedema hena kukuondoka: na naituka amu ya mawuchili mako.
AIN
121Niketie wuchili na ngalo: usinishighe hena wala weniinyala.
122Umtemianie mzoro wako hena vyedi: wenye mafuti wasiniinyale.
123Meso mangu masokea hena lukio lwako: na hena kiteto kyako kya ngalo.
124Umketie muzoro wako hena lusario lwako: na uniloshe maitanawo mako.
125Nimi muzoro wako, uniinge kucha: nesa nijitisiwe mburi jako.
126Ni magheri makwe Izuwa ma kuhira ndima: amu weiosha sheria yako haya.
127Hena iyo namakunda maaghanyo mako: kukela thahabu, ee, kukela thahabu izerre.
128Hena iyo namatara malosho mako mose kuoka medi ghati ya vindu vyose: na nasua nzia yose ya maongo.
PE
129Mburi jako jaing’asija: hena iyo ngoro yangu yajigura.
130Kujughuka kwa viteto vyako kwang’ola kyangaji: kwang’ola kucha hena wetomode.
131Nijughue muno itumbu langu, nikahemahema: amu nisikie nyami hena maaghanyo mako.
132Ukugharushe hangu, urenisarie: sandu umanyere kuwaketia wala welikundie izina lako.
133Umaaghanye mawato mangu ghati ya kiteto kyako: na owiwi usiniitorie deng’e.
134Unikombole ghati ya kuinyalwa kwa wandu: huwo ninemagura malosho mako.
135Ukiangaje wusho wako wanga ya muzoro wako: na uniloshe maitanawo mako.
136Meso mangu meseja mifuro ya mbombe: amu teweigurawo sheria yako.
TZADDI
137Niwe mwenye ngalo, ee Mzuri: na mawuchili mako merongeke.
138Mburi jako jila ujiaghanyie: nijo ja ngalo na ja luitikijo.
139Kuneng’a kwangu kwanila: amu wazo wangu weviiwaa viteto vyako.
140Kiteto kyako kizerre muno: hena iyo mzoro wako ekikundie.
141Nimi mdongo, na nadawa: kake simaiwaami malosho mako.
142Ngalo yako ni ngalo ya ndarasi: na sheria yako ni kididi.
143Wasi na luwawo lwanigura: kake maaghanyo mako ni kuisejwa kwangu.
144Mburi jako jina ngalo ndarasi: uniinge kucha, na ninekia.
MUSI 26 CHAMAGHERI
KOPH
145Naitanga na ngoro yangu yose: unitalwe, ee Mzuri, ninemagura maitanawo mako.
146Nakuitangia, unikije: na ninejigura mburi jako.
147Nawoka hesimeoke marekero, nikaiya: naing’idaki hena viteto vyako.
148Meso mangu makarongora malukamba ma kio: nesa nikusare ghati ya kiteto kyako.
149Ulisikie ighonda langu hena lukundo lwako: uniwushe, ee Mzuri, hena mawuchili mako:
150Wala weratera owiwi wesongeria: niwo hae kufuma sheria yako.
151Niwe afuhi, ee Mzuri: na maaghanyo mako mose ni kididi.
152Kae nitisiwe ghati ya mburi jako: ti ujiwika ndarasi.
RESH
153Uuyoe wasi wangu, unikije: amu siiwaami sheria yako.
154Unilie mburi, na unikombole: uniwushe hena kiteto kyako.
155Lukio ni hae kufuma wawiwi: amu teweendawo maitanawo mako.
156Malusario mako mabaha, ee Mzuri: uniwushe henu mawuchili mako.
157Wala wenikinya na wazo wangu ni weingi: kake sitongami mbai kufuma mburi jako.
158Niwayoie waketi urenge, nikashiniwa: amu tewegurawo kiteto kyako.
159Uyoe nize nimakundie malosho mako: uniwushe, ee Mzuri, hena lukundo lwako.
160Kutara kwa kiteto kyako ni kididi: na mawuchili ma ngalo mako mose nimo ma ndarasi.
SHIN
161Wafumwa wenikinya wesina lukake: kake ngoro yangu yaviituka viteto vyako.
162Naizihirwa hena kiteto kyako: sa mundu ewona matahwa mabaha.
163Nasua maongo na nashishirrwa namo: kake naikunda sheria yako.
164Kandu kafungate nakuisisa misi yose: amu ya mawuchili mako ma ngalo.
165Wala weikunda sheria jako wena luworo lubaha: na tewenawo handu ha kushereta.
166Niing’idaki hena lukio lwako, ee Mzuri: nikamaketa maaghanyo mako.
167Ngoma yangu yajigura mburi jako: nami nijikundie muno.
168Namagura malosho mako na mburi jako: amu nzia jangu jose msongorana wako.
TAU
169Kiiyo kyangu kize msongorana wako, ee Mzuri: uniinge kucha hena kiteto kyako.
170Kusemba kwangu kuze msongorana wako: unikije hena kiteto kyako.
171Miomo yangu itete luisiso: amu wanilosha maitanawo mako.
172Lumi lwangu lukivinie kiteto kyako: amu maaghanyo mako mose ni ma ngalo.
173Mkono wako uarehike kunighenja: amu namasaghura malosho mako.
174Nisikie nyami hena lukio lwako, ee Mzuri: na sheria yako ni luisejo lwangu.
175Ngoma yangu ikie, na inekuisisa: na mawuchili mako manighenje.
176Nazarazara sa ighonji litekie: umwende muzoro wako, amu simaiwaami maaghanyo mako.
Currently Selected:
Malumbo 119: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
