Malumbo 118
118
1Mwanjeleni Mzuri, amu ni wedi: amu lusario lwakwe lwaikaa ndarasi.
2Israeli aghambe ingeriaha: ti lusario lwakwe lwaikaa ndarasi.
3Nyumba yakwe Harun ighambe ingeriaha: ti lusario lwakwe lwaikaa ndarasi.
4Wala wemwondoka Mzuri waghambe ingeriaha: ti lusario lwakwe lwaikaa ndarasi.
5Ghati ya wasi wangu nimwitangie Mzuri: Mzuri akanitalwa akaniwika na mwanya mbaha.
6Mzuri ni wa hangu, siitukami: nikini mundu eidima kuniarehia.
7Mzuri ni wa hangu ghati ya wala wenighenja: hena iyo ninewona sandu nikundie wanga ya wala wenisua.
8Keba kumwitikija Mzuri: kukela kuitikija mundu.
9Keba kumwitikija Mzuri: kukela kuitikija wafumwa.
10Mbare jose wenijunguluka: kake hena izina la Mzuri ninewanyamara.
11Wenijunguluka, ee, wenijunguluka: kake hena izina la Mzuri ninewanyamara.
12Wenijunguluka sa nyoki; wejimika sa moto wa mivwa: hena izina la Mzuri ninewanyamara.
13Unishukumie niwone kugwa: kake Mzuri enighenje.
14Mzuri ni zinya yangu na kivino kyangu: eidiwa kuoka lukio lwangu.
15Ighonda la luizihiro na lukio lioho ghati ya hema jawo wenye ngalo: mkono wa kuume wakwe Mzuri waketa viaria.
16Mkono wa kuume wakwe Mzuri wakwejwa: Mkono wa kuume wakwe Izuwa waketa viaria.
17Sifwami, nde ninekia: na ninejitoranya ndima jakwe Mzuri.
18Mzuri enibigha muno: kake tening’olaye hena kifwa.
19Unijughuiye mbenge ja ngalo: ninejiingia, ninemwanjela Mzuri.
20Ii niyo mbenge yakwe Mzuri: wenye ngalo weneiingia.
21Ninekuanjela, amu wanitalwa: na waidiwa kuoka lukio lwangu.
22Ibwe lila wajengi welisuie: laidiwa kuoka mtwi wa ngandeni.
23Kuketa uku ni kwa Mzuri: na ni kwa kurighiwa mesoni hetu.
24Musi uu ni ula euarehie Mzuri: tuneizihirwa a tuneisejwa hena musi uu.
25Ukije ingeriaha, twakusemba, ee Mzuri: ee Mzuri, twakusemba, uingije ingeriaha nguwari.
26Atasiwe ula eza hena izina lakwe Mzuri: twamutasia kufuma nyumba yakwe Mzuri.
27Mzuri niye Izuwa, naye etuinga kyangaji: lichungeni itasi na nzighi, mtano na mbembe ja kisiko.
28Niwe Izuwa wangu, ninekung’olia haika: niwe Izuwa wangu, ninekurumisha.
29Mwanjeleni Mzuri, amu ni wedi: amu lusario lwakwe lwaikaa ndarasi.
Currently Selected:
Malumbo 118: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
