Marko 10
10
1Ekiwuka uko eza ghati ya mihaka ya Uyahudi hena sela ya Yardani, nawa matorano meingi wetonga hakwe, na sawundu emanyerie akawaloshawa.
2Nawo Wafarisayo wekimtongia wakambujanya ti ni kiedi mundu amshighe mche, wekimghesha. 3Naye ekitalua, akawawurra, Nikini emburire Musa? 4Wakateta, Musa akakunda kumtamia karatasi ya kuchwa, na kumshigha Akatalua Yesu, 5akawawurra, Amu ngoro jenyu jidindie emutamie kiteto iki. 6Too kuwoka kwa kulungwa Izuwa ewaareha mume na mche. 7Amu iyo mundu enewashigha wawee na mee, enekundana na mche, 8nawo weri weneoka muri mwe; mtano siwowa weri, nde muri mwe. 9Amu ii Izuwa akilimbikanya, mwana Adamu asikighawe.
10Nawa ghati ya nyumba waanalosha wakwe wakambujanya ya iyo. 11Awawurra, Enemshigha mche wakwe, ekimwowoa ungi, ashinda wanga yakwe; 12na mche ekimshigha mume wakwe, ekiuhwa ni ungi, ashinda.
13Wakamwetie waana awakuware, waanalosha wakawabohia wewaetie. 14Ekiwona Yesu, akaregija akawawurra, Washigheni waana waze hangu, musiwaswije, amu wawo sa awa ni ufumwa wa Izuwa. 15Amin, namburra, esikunda ufumwa wa Izuwa sa mwana, teingia uko. 16Akawashushudirra, akawawika mikono wanga yawo, akawatasia.
17Mtano ekifuma nzieni, mundu ekiza ekisara akamdung’utia, akambujanya, Mlosha wedi, niketeze niwone kuhodja moo wa tendarasi? 18Yesu akamburra, Nikini uniitanga wedi? tehena wedi nde umwe, niye Izuwa. 19Umatisiwe maaghanyo, Usishinde, usikome, usihiwe, usiitikije maongo, usikenge, mughurie nganyi waweeo na mamako. 20Ekitalua, amburra, Mlosha, ama mose namarinda too umwana wangu. 21Yesu ekimyoa, akamkunda, akamburra, Kimwe ukiiwaa. Tonga hako, utaghe una vyose, uwainge wakiwa, nawe uneoka na mali wanga; hayawa, uniratere mi, ukitika msalaba. 22Naye akarumbuta hena kiteto iki, akatonga hakwe na wukiwa, amu eokie na mali mengi.
23Yesu ekiyoa kujunguluka awawurra waanalosha wakwe, Hena kudinda ani wenye mali weneingia ghati ya ufumwa wa Izuwa. 24Waanalosha wakarighiwa hena viteto vyakwe. Yesu ekitaluawa awawurra, Waana, ni kudinda ani uku waitikija hena mali waingie ghati ya ufumwa wa Izuwa. 25Ianguhe ngamela avetie ghati ya iworo la sindano, kukela mumazi kuingia ghati ya ufumwa wa Izuwa. 26Wakarighiwa muno, wekiteta wonawo, Niani eidima kukia? 27Ekiwayoa Yesu ateta, Hena wandu tekiidima kuketika, nde siyo ha Izuwa, amu vyose viidima kuketika ha Izuwa.
28Akawoka Petro kumburra, Yoa uswi twashigha vyose, tukakuratera we. 29Ekitalua Yesu, amburre, Amin namburra, Tehena eshigha nyumba, kana wandwawo, kana warumburie, kana wawee, kana mche, kana waana, kana ngonde, hena lwangu na hena lwa Anjili, 30esiingwa kando ighana ingeriaha magheri ama, nyumba, na wanduwawo, na warumburie na mee na waana na ngonde, hamwe na makinyo, na ghati ya akenya iza moo wa tendarasi. 31Weingi wa kuwoka weneoka wa nyuma, na wa nyuma weneoka wa kuwoka.
32Weokie nzieni wekitonga Yerusalemi, naye Yesu akawarongoria, wakarighiwa, mtano wekiratera wakaondoka. Ekiwauhawa wala ikumi na weri, akawoka kuwawurra vila vinembona, 33ti Tutonga Yerusalemi, naye Mwana wa Adamu eneng’olwa hena wakohani wabaha na watama, nawo wenemchilia kufwa, na wenemng’ola hena mbare, 34na wenemsola, na wenembigha, na wenemtufia mate, na wenemkoma, na musi wa katatu enewuka.
35Wakamzia Yakobo na Yohana waana wa Zebedayo, wekiteta, Mlosha, tukundie utuarehie kila tunekikunda. 36Akawawurra, Mkundie nimuarehie kini? 37Wakamburra, Utuinge tuwone kuikaa mwe mkono wako wa kuume na mwe mkono wako wa kumoso ghati ya ubaha wako. 38Yesu akawawurra, Tomutisiwe mkikundie; muidima kunywa ndemwa mi ninenywa, na kubatizwa na lubatizo mi nabatizwa. 39Wakamburra, Twaidima. Yesu akawawurra, Ndemwa nainywa mi, mumenywa, na lubatizo nibatizwa mi, munebatizwa naunywi; 40nde kuikaa mkono wangu wa kuume kana wa kumoso si hangu ning’ole, nde hawo wearehiwe. 41Wekisikia waikumi wakawoka kuregija na Yakobo na Yohana. 42Kake Yesu awaitanga awawurra, Mutisiwa ti wegheshijiwa kuoka wa kuwoka wa mbare niwo wazuri wawo, na wabaha wawo wena zinya wanga yawo. 43Teineoka huwo henyu: nde ula ekundie kuoka mbaha henyu eneoka mwindi, 44naye ekundie kuoka wa kuwoka henyu eneoka muzoro wa wose. 45Amu naye Mwana wa Adamu tezie aindwe nde ainde, na ang’ole moo wakwe ukombola wa weingi.
46Wakafika Yeriko, naye ekifuma ghati ya Yeriko, na waanalosha wakwe, na matorano weingiweingi, mwana wa Timayo, Bartimayo ebajike meso, eikeesi mbai ya nzia ekiomba. 47Mtano ekisikia ti ni Yesu Mnazareti, akawoka kuiya na kuteta, Mwana wa Daudi, Yesu, unisarie. 48Wakamtetia weingi, ahuje. Akaneta muno kuiya, Ee Mwana wa Daudi, unisarie. 49Ekiimuka Yesu, atete aitangwe. Nawo wamwitanga ebajike meso, wekimburra, Uoke na ngoro, wuka, akuitanga. 50Ekitagha suke yakwe, akawuka akaza ha Yesu. 51Yesu ekitalua amburre, Ukundie kini, nikuarehieze? Ebajike meso amburra, Rabboni, niwone. 52Yesu amburra, Tonga hako, kuitikija kwako kwakukija. Chwi akawona, akamratera Yesu nzieni.
Currently Selected:
Marko 10: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
