Mihiro ya Waondo 8
8
1Saul akawona ni kyedi akomwe.
Misi ila kukaoka kukinya kubaha wanga ya kanisa ghati ya Yerusalemi; wose wakaghawanyika ghati ya isanga la Uyahudi na Usamaria, nde waondo. 2Wandu wedi wakamtika Stefano, wakaareha maiyo meingi wanga yakwe. 3Naye Saul akawaketia kanisa viwiwi, ekiingia nyumba yose, ekibulula wome na wache akawawika kichungoni.
4Wala weghawanyike wakatonga mbai jose wekitinda kiteto. 5Filipo akasea mtano na Usamaria, ekiwatindia Masihi. 6Wandu wala wakavisikia hena ngoro mwe vindu evitetie Filipo, wekisikia na wekiwona marighio emaarehie. 7Amu maluhungu mawiwi, mekiloza hena ighonda ibaha, wakafuma ghati ya weingi wemahete; na weingi weokie na kuwia na wechingilike wakahoa. 8Luizihirwo lubaha luokie ghati ya kiongo kila.
9Heokie na mundu mwe, izina lakwe Siman, earehe magheri ma kae usawi ghati ya kiongo kila, akawaogha wandu wa Usamaria, ekikuosha eye mbaha. 10Wose wakamsikija, too mdongo mtano mbaha, wekighamba, Mundu uu niye zinya mbaha ya Izuwa. 11Wakamyoa, amu misi miingi awaogha na usawi. 12Wekinamwitikije Filipo ekitinda mburi ya ufumwa wa Izuwa, na izina lakwe Yesu Masihi, wakabatizwa na wome na wache. 13Siman pia akaitikija, naye ekibatizwa akaikaa na Filipo, akarighiwa ekimawona marighio na maluwano mabaha mearehiwe.
14Waondo weoho Yerusalemi wekinasikie ti Wasamaria wekundie kiteto kya Izuwa, wakawaingijia Petro na Yohana. 15Nawo wekinafike, wakawaombia wamwuhie Ngoma Mshenete; 16amu temewaseiya mwe wawo: webatizwe hena izina la Mzuri Yesu tiki. 17Wakawagera mikono, wakauhia Ngoma Mshenete. 18Naye Siman ekinawone ti hena kugera mikono ya waondo weingwa Ngoma Mshenete, 19akawaetie fetha, ekiteta, Uniinge na mi zinya ii, ti ula namgera mikono auhie Ngoma Mshenete. 20Petro akamburra, Fetha yako iteke kimwe na we, amu waghamba ti kiingwa kya Izuwa kyazorwa na fetha. 21Touna we nete ngata nete ifungu ghati ya ndima ii; amu ngoro yako si yedi msongorana wa Izuwa. 22Amu ii chwa‐muti ghati ya owiwi wako uo, uremwomba Izuwa, nesa ngea ushighiwe kusaro la ngoro yako. 23Amu nawona ti uoho ghati ya nyongo ya kuwawiwa na luchungo lwa owiwi. 24Niho Siman akatalwa, akaghamba, Muniombie ha Izuwa, vindu ivi uvitetie visinizie.
25Nawo wekinaidiwe kung’ola mburi na kutinda kiteto kya Mzuri, wakahunduka Yerusalemi, wakaitinda anjili ghati ya viongo viingi vya Wasamaria.
26Malaika wa Mzuri akamburra Filipo ekiteta, Wuka utonge hena kusini, mtano nzia isea kufuma Yerusalemi mtano Gaza, hesina wandu. 27Akawuka akatonga: na yoa, mundu wa Etiopia, eshaniwe mwenye zinya si ya Kandake mfumwa‐wa‐kiche wa Waetiopia, erinda mali yakwe yose, eokie ezie Yerusalemi nesa aombe, 28akaoka ekihunduka akaikaa garini hakwe, akasoma mroti Isaya 29Ngoma akamburra Filipo, Tonga afuhi ukulunge na gari ili. 30Filipo akadindika uko, akamsikia ekisoma mroti Isaya, akaghamba, Kila ukisomie wakitwarija? 31Akaghamba, Naidimaze, mundu asiniwonye? Akakunda Filipo akwee aikae naye. 32Handu ha kitamo ehasomie niho,
“Etikiwe sa ighonji hena kusinzwa;
Na sa kaghonji msongorana wa mwenji wakwe kahuja,
Huwo tejughuaye itumbu lakwe.
33Ghati ya kusejwa kwakwe wuchili wakwe wukawushijwa:
Na niani enetoranya kuwoneka kwakwe?
Amu moo wakwe wawushijwa ghati ya masanga.”
34Eshaniwe akamtalwa Filipo, akaghamba, Mburi yakweni ii mroti eitetie? yakwe mwenye kana ya mundu ungi? 35Filipo akajughua itumbu lakwe akawoka hena kitamo kila akamtindia Yesu. 36Na wekitonga nzieni wakafika hena mbombe: eshaniwe akaghamba, Yoa, mbombe; nikini kyaniswija nisibatizwe? 37Filipo akaghamba, Ukaitikija na ngoro yose, nikyo kyedi. Akatalwa akaghamba, Namwitikija Yesu Masihi ti niye Mwana wa Izuwa. 38Akaaghanya gari liimuke: wakasea wose weri na mbombe, na Filipo na eshaniwe; akambatiza. 39Wekinakwee kufuma mbombe, Ngoma wa Izuwa akamtika Filipo, eshaniwe asimbonewa: akatonga nzieni ekiizihirwa. 40Filipo akawonwa ghati ya Azoto: ekivetia akatinda ghati ya viongo vyose, mtano kufika Kaisariya.
Currently Selected:
Mihiro ya Waondo 8: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
