Mihiro ya Waondo 5
5
1Kake mundu mwe eitangwe Anania, na Safira mche wakwe, wakatagha kiwanza, 2Akakuwisia mondo wa uzoro, mche wakwe ekitisiwa, akaete vyashighajike akavigera maghuni ha waondo. 3Petro akamburra, Anania, nini Shetani akuizuja ngoro, umkenge Ngoma Mshenete, na ukuwisie mondo wa zora ya kiwanza? 4Kikinaoke, sikyo kindu kyako? na kikiidiwa kutaghwa, sikyo mkononi hako? nini wagheshijia kindu iki ngoroni hako? touwachwia‐maongo wandu, nde Izuwa? 5Anania ekivisikia viteto ivi akagwa, akachika ngoro, fole mbaha ikawazia wose wesikia vindu ivi. 6Wabwange wakawukika, wakamchungia suke, wakamtika shighati wakamjika.
7Ikaoka kutera kwa magheri ma saa ndatu, mche wakwe akaingia, asitisiwe kindu ani kyaketika. 8Petro akamtalwa, Niwurra, watagha kiwanza hena zora iyo? Akaghamba, Ee, hena iyo. 9Niho Petro akamburra, Nize mwaarehiana hamwe kughesha Ngoma wa Mzuri? yoa, maghu mawo wemjikie mume wako mbengeni, na menekutika na we. 10Niho akagwa chwii maghuni hakwe, akachika ngoro: wabwange wakaingia, wakambona efwie, wakamtika na shighati, wakamjika hamwe ma mume wakwe. 11Fole mbaha ikawazia wa kanisa wose nawo wose wesikie vindu ivi.
12Na hena mikono ya waondo makaketwa maluwano na marighio mengi ghati ya wandu; nawo weokie wose na ngoro mwe lumunguni hakwe Sulemani. 13Na tehena mundu wa wala weshighajike ekara kukulunga nawo, kake wandu wakawaisisa. 14Waitikiji wakaneta kuongejwa hena Mzuri, weingi na wa kiume na wa kiche. 15Mtano wakang’ola wewadjua nzieni, wakawayeja na mawui na maboho, nesa ngea kivuri kyakwe Petro ekivetia kiwagere mondo kivuri. 16Wakaza na matorano ma viongo vijunguluke Yerusalemi, wekiete wewadjua, nawo werishwa wukiwa na maluhungu mawiwi: wakahodjwa mundu ose.
17Akaimuka mkohani mbaha nawo wose weoho hamwe naye, niyo siri ya wasadukayo, 18wakaizua luneng’o, wakawagera mikono waondo, wakawawika ghati ya lurindo lwa wandu. 19Malaika wa Mzuri akajughua maluwi ma lurindo kio, 20akawang’ola, akateta, Tongeni, mureimuka mureteta ghati ya hekalu viteto vyose vya moo nu. 21Wekisikia wakatonga heyawo kerre ghati ya hekalu, wakalosha. Wekioho mkohani mbaha nawo weokie hamwe naye, wakawaitanga chila na njama wose wa waana wa Israeli, wakaingija kichungoni waetwe. 22Waretumwa wekioho tewewawonie kichungoni, 23wakahunduka wakaliya mburi, wekiteta, Kuchungwa tuhawonie hachungwa nezo, nawo warindi weimuka msongorana wa mbenge: mtano tukinaingie totuwonie mundu eoho. 24Wekisikia viteto ivi mkohani mbaha, na jemadari wa hekalu, na wakohani wabaha, wakaitalwa, vineokaze vindu ivi. 25Mwe eoho akawaliya mburi ti, Wandu wala muwawikie kichungoni, weoho ghati ya hekalu, weimuka wekilosha wandu. 26Wakatonga jemadari hamwe na waretumwa wakawaete, nde si hena zinya: amu weituke wandu, wasiwagere mabwe. 27Wekinawaete wakawawika ghati ya chila. Mkohani mbaha akawawunjanya, 28ekiteta, Totumuaghanye hena aghanyo musiloshe hena izina ili? yoeni, mwaizuja Yerusalemi na malosho menyu, mukakunda kuete sakame ya mundu ula wanga yetu. 29Akatalwa Petro na waondo, wakaghamba, Yatuwe kumwinga isikio Izuwa kukela wandu. 30Izuwa wa waapa wetu embushie Yesu mumkomie mkambanika ghati ya mti. 31Izuwa embikie uo wanga kuoka hena mkono wakwe wa kuume, Mbaha na Mukija, kuareha kuchwa‐muti kwa Israeli na kuwushijiwa kwa ng’oki. 32Na uswi twang’ola mburi ya vindu ivi, naye Ngoma Mshenete, Izuwa ewaingie wala wemwinga isikio.
33Wekisikia wakasomwa ngoro, wakala ngiliwata kuwakoma. 34Akaimuka mwe ghati ya lumungu, Mfarisayo, izina lakwe Gamaliel, mlosha sheria mwenye nganyi hena wandu wose, akaaghanya wawike some waondo kadongo; 35akawawurra, Wome Waisraeli, mukuyoe nize muwaketie wandu awa. 36Amu kuwoka kwa misi ii Theuda ewukie, ekighamba ti niye mundu; wakamratera wandu sa maghana manne: akakomwa; nawo wose wemsikie wakaghawanyika, wasioke kiteto. 37Kutera kwakwe akawuka Yuda Mgalilaya magheri ma kutamwa, akatika wandu nyuma yakwe; naye akateka; wose wemsikia wakaghawanyika. 38Huwo ingeriaha namburra, musiwasongerie wandu awa, muwashighe: mburi ii na ndima ii ikioka ya wandu, inenyamarika: 39kake ikioka ya Izuwa tomuidima kuinyamara; musiwonwe sa wandu webighana na Izuwa. 40Wakamsikija: wakawaitanga waondo wakawabigha, wakaaghanya wasitete hena izina la Yesu, wakawashigha. 41Wakafuma ghati ya lumungu, wekiizihirwa ti weitangwa kuiha hena lwa izina. 42Misi yose ghati ya hekalu na nyumbeni teweshighawo kulosha na kutinda Yesu eye Masihi.
Currently Selected:
Mihiro ya Waondo 5: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
