Mihiro ya Waondo 4
4
1Na wekioka wekiteta na wandu, wakohani, na jemadari wa hekalu, na Wasadukayo, 2wakawazia, wekiregija amu weokie wekilosha wandu, na wekitinda hena Yesu luruko lwa wefwie. 3Wakawagera mikono, wakawawika ghati ya kurindwa mtano heyawo, amu kiokie chamagheri. 4Kake weingi wa wala wesikie wakaitikija, kutara kwa wome kukaoka sa maghana makumi masano.
5Ikaoka heyawo, wabaha na waghosi na watami wawo wakawunganyika Yerusalemi; 6na Anna mkohani mbaha, Kayafa, na Yohana, na Iskander, na wose weokie wa iwee la mkohani mbaha. 7Wekinawawike ghati na ghati, wakawujanya, Hena zinya ani, kana hena izina ani, mwakiketa iki? 8Niho Petro ekiizua Ngoma Mshenete, akawawurra, Unywi wabaha wa hekalu, na waghosi wa Israeli, 9kwakicha yoo twawujanywa mburi ya mhiro wedi mundu mnana eketiwe, hena nzia ani ekijwe; 10itisiwike na unywi wose, na wandu wose wa Israeli, ti hena izina lakwe Yesu Masihi wa Nazareti, mumbanike, Izuwa embushijie ghati ya wefwie, hena ye mundu uu eimuka aha mzima msongorana wenyu. 11Uo niye ibwe lidaawe na unywi wajengi, liokie ibaha la ngandeni, 12nete tehena lukio ghati ya ungi: amu teling’olwa izina lingi si ya wanga ghati ya wandu, tuwone kukijwa nalo.
13Wekinayoe kukara kwa Petro na Yohana, wakatwarija ti weokie wandu wesina kuloshwa na wesicheijwa, wakarighiwa; wakawatisiwa, ti weokie hamwe na Yesu. 14Na wekiyoa mundu ehodjwe ekiimuka nawo, teweidima kuteta kindu wanga yakwe. 15Kake wekinawaaghanye kutonga mbai kufuma chila, wakala ngiliwata wenye, wekiteta, 16Tuwaketeze wandu awa? amu ti luwano lurumishwa lwaketwa nawo kyatisiwika na wose wetue Yerusalemi; na totuidima kukikana. 17Kake kisinete kutoranywa ghati ya wandu, tuwaitushe, wasitete na mundu hena izina ili too yoo. 18Wakawaitanga, wakawaaghanya wasitete deng’e nete wasiloshe hena izina lakwe Yesu. 19Kake Petro na Yohana wakatalwa wakawawurra, Kwakicha nikyo kyedi msongorana wakwe Izuwa kumusikija unywi kukela Izuwa, chileni. 20Amu totuidima kusaviteta vila tuviwonie na tuvisikie. 21Nawo, wekinawaitushewa, wakawashigha, wekisowa kindu kya kuwaihija, hena lwa wandu; amu wandu wose wemrumisha Izuwa hena kila kiketiwe. 22Amu mundu evetia miaka makumanne, luwano ulu luketwe wanga yakwe.
23Na wekishighiriwa, wakawazia wandu wa hawo, wakawaliya mburi ya vyose wetetiwe na wakohani wabaha na waghosi. 24Nawo, wekinakisikie, wakambushijia Izuwa ighonda hena ngoro mwe, wakateta, Ee Mzuri, uarehe wanga na masanga na bahari, na vyose viohoho: 25niwe hena Ngoma Mshenete, hena itumbu la apa wetu Daudi muzoro wako utetie,
“Nini Mbare waketa limana,
Na wandu wegheshijia kihaya?
26Wafumwa wa masanga weimuka,
Na wabaha wewunganyika hamwe,
Wanga ya Mzuri, na wanga ya Masihi wakwe.”
27Amu kididi wewunganyika wanga ya Mwana wako Mshenete Yesu, umgerie mafuta, na Herode na Pontio Pilato, hamwe na mbare na wandu wa Israeli, 28waarehe sandu mkono wako na mburi yako yaaghanye kuwoka kiketike. 29Huwo ingeriaha, Mzuri, yoa kuitusha kwawo, uwainge wazoro wako watete kiteto kyako wesina fole, 30ukironga mkono wako uhodje, maluwano na marighio maarehike hena izina la Mwana wako Mshenete Yesu. 31Na wekioka wekiomba, handu wewunganyikeho hakadedemishwa, wakaizua wose na Ngoma Mshenete, wakateta kiteto kyakwe Izuwa wesina fole.
32Na siri yawo weitikija weokie na ngoro mwe na lusaro lumwe, nete tehena etetie ti vindu eokie navyo nivyo vyakwe, kake vyose vyashanganywa. 33Hena zinya nyingi waondo wakang’ola mburi ya kuruka kwakwe Mzuri Yesu. Mvono wingi ukaoka wanga yawo wose. 34Nete teokie eduhuka hawo, amu wose wehete viwanza kana nyumba wakavitagha, wakaete zora yakwe yataghwe, 35wakaiwika maghuni ha waondo, ikaghawangika hena ose sandu eokie ekiduhuka.
36Naye Yusuf, eitangwa na waondo Barnaba (nikyo, likigharushwa, Mwana wa ludindijo), Mlawi, ekioka na mbuwa, akaitagha, 37akaiete fetha, akaiwika maghuni ha waondo.
Currently Selected:
Mihiro ya Waondo 4: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
