Mihiro ya Waondo 17
17
1Wakavetia ghati ya Amfipoli na Apollonia, wakafika Thessalonika, sunagogi ya Wayahudi ioho. 2Paulo akaingia hawo, sandu emanyerre, akateta nawo sabato ndatu ghati ya matamo, 3ekijughua na eking’ola mburi, ti yambe Masihi kuwinywa, na kurukawa ghati ya wefwie; na ti uu Yesu, nimtindia henyu, niye Masihi. 4Wengi wawo wakaitikija, wakakuwika na Paulo na Sila; nawo Wayonani wemwondoka Izuwa weingi muno, nawo wache wabaha si wafaa. 5Wayahudi wesiitikije, wekigurwa ni luneng’o, wakakuuhia wandu wawiwi wa ma‐lturwai, wakawunganya matorano, wakalozesha kiongo; wakaijunguluka nyumba ya Yason, wekikunda kuwaete msongorana wa wandu. 6Wasiwawone, wakambulula Yason, na wandwawo, msongorana wa wabaha wa kiongo, wekiloza ti, Awa wegharusha masanga weza na uko pia; 7naye Yason awatigha awa wose wegolong’a wanga ya maaghanyo ma Kaisari, wekiteta ti hena mfumwa ungi, Yesu. 8Wakarisha wasi matorano na wabaha wa kiongo, wekisikia ivi. 9Wakauha mredeke ha Yason na waghenji wakawashigha.
10Chwii wasiri wakawaingija Paulo na Sila kio mtano Beroya. Wekifika wakaingia na sunagogi ya Wayahudi. 11Awa weokie wedi kukela wala wa Thessalonika, wekiuhia kiteto na ngoro ianguhe, wekiyoa misi yose ghati ya matamo, kwakicha vindu ni huwo. 12Weingi wawo wakaitikija, na wache Wayonani wenye nganyi, na wome si wafaa. 13Nawo Wayahudi wa Thessalonika wekisikia ti kiteto kya Izuwa kyatindwa ni Paulo ghati ya Beroya, wakaza na uko wakawawusha matorano. 14Chwii wasiri wakamwingija Paulo kutonga mtano bahari: Sila na Timoteo wakaikaa uko. 15Wala wemtika Paulo wakamwete mtano Atene: na wekiwauhia Sila na Timoteo aghanyo wamange kuza hakwe, wakatonga.
16Ghati ya Atene Paulo ekiwaindia, ngoro yakwe ikaaka ndeni hakwe, amu ewonie kiongo kyaizua sanamu. 17Akateta ghati ya Sunagogi na Wayahudi nawo wemwondoka Izuwa, na kichindeni misi yose nawo wetorana naye. 18Wandu wa Waepikurio na Wastoiko, mafilosofi, wakamzia. Wengi wakaghamba, Ekundie kuteta kini etomode uu? Wengi wakaghamba, Eokie sa etindie maizuwa magheni: amu emtindie Yesu na luruko lwa wefwie. 19Wakamwuha wakamwete mtano Areopago, wekighamba, Twaidima kutisiwa nikini kulosha uku kusha, kutetwe ni we? 20Amu waete vindu vigheni masikioni hetu: amu ii tukundie kutisiwa vindu ivi nikini. 21(Waatene wose nawo wagheni wetue uko teweokie na kindu kingi kuketa, nde kuteta kana kusikia mburi sha.) 22Paulo akaimuka ghati na ghati ya Areopago, akaghamba.
Unywi Waatene, Nambona unywi ghati ya vindu vyose mwaituka muno maizuwa. 23Amu nikivetia nikiyoa maombo menyu, nikawona kisiko kitamiwe, Hena Izuwa esitisiwike. Ula mumwomba musimtisiwe niye nimtindie. 24Izuwa emaarehie masanga na vyose viohoho, ekioka Mzuri wa wanga na masanga, teikaaye ghati ya nyumba jiarehiwe ni mikono: 25nete teombwaye na mikono ya wandu sa ula esowa kindu, niye ewaingie wose moo na mruki, na vyose; 26akaareha ya sakame mwe mbare yose ya wandu waikae wanga ya masanga mose, ekiaghanya magheri mawo, na mihaka ya kuikaa kwawo; 27wekimwenda Mzuri, wekimkuwara, wambone, ekioka si hae hena mundu ose wa hetu: 28amu ghati yakwe twakia, twatonga, twaoka: sa wavini wenyu weghambie, Amu uswi waana wakwe. 29Tukioka waana wa Izuwa, teituwe kughamba ti Wu‐izuwa wufwanana na thahabu, kana fetha, kana ibwe, liarehiwa na ng’eno na kucha kwa wandu. 30Magheri ama ma utomode Izuwa teyoaye; kake ingeriaha awaaghanya wandu wose handu hose wachwemuti: 31amu ewikie musi, niho enemachilia masanga hena ngalo, hena mundu ula emsawurie; ekiwang’olia wose luitikijo, ekimbusha ghati ya wefwie.
32Wekinasikie kuruka ghati ya wefwie, mondo wakasola; mondo wakaghamba, Tunekusikiawa hena vindu ivi. 33Huwo Paulo akafuma ghati yawo. 34Wome wengi wakagurana naye, wakaitikija; ghati ya awa Dionusio Mwareopago, na mche izina lakwe Damari, na wengi hamwe nawo.
Currently Selected:
Mihiro ya Waondo 17: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
