1 Hena Wakorintho 15
15
1Namutisiwija, wandwetu, anjili niitindie henyu, nayo muiuhie, na ghati yakwe mwaimuka. 2Na hena lwa iyo pia mwakijwa: namutisiwija hena viteto ani niitindie henyu, mukiigura nezo, musiteitikije wesho. 3Amu nimng’olie kuwoka kila nikiuhie pia, ti Kristo efwie hena ng’oki jetu, sandu matamo meteta: 4Na ti ejikwe: na ti erushijwe musi wa katatu sandu matamo meteta; 5na ti emfumirie Kefa; ikwade wala ikumi na weri; 6Ikwade akawafumiria wandu wa hetu sa maghana masano kandu kamwe, wa awa weingi weoho mtano ingeriaha, kake mondo weshinjia; 7ikwade akamfumiria Yakobo; 8ikwade waondo wose; na kuidiwika, akanifumiria mi pia, sa mwenye kuwoneka hena magheri esemo. 9Amu mi ni mdongo wa waondo, nisiinarwe kuitangwa mwondo, amu nilikinyie kanisa la Izuwa. 10Kake hena mvono wa Izuwa nioho sandu niikee: na mvono wakwe uwikwe wanga yangu si wesho; kake ninetie kuhira muno kukela woo wose: nde si mi, nde mvono wa Izuwa uokie hamwe nami. 11Na kwakicha ni mi kana wala, ni huwo twatinda, na ni huwo muitikije.
12Na Kristo ekitindwa ti erushijwe kufuma wefwie, nize weghamba wandu ghati yenyu ti tehenaho luruko lwa wefwie? 13Kake kwakicha tehenaho luruko lwa wefwie, nete Kristo terushijweye: 14Na kwakicha terushijweye, kutinda kwetu ni kuhaya, luitikijo lwenyu pia ni luhaya. 15Ee, na uswi twawonwa kuoka wang’oli‐mburi wa maongo wakwe Izuwa; amu twamng’olia mburi ti emrushije Kristo: naye temrushijeye, kwakicha wefwie tewerushwawo. 16Amu kwakicha wefwie tewerushwawo, nete Kristo terushwaye: 17Na kwakicha Kristo terushijweye, luitikijo lwenyu ni luhaya; mtano ingeriaha muoho ghati ya ng’oki jenyu. 18Niho na wala pia weshinjia ghati ya Kristo weteka. 19Kwakicha ghati ya moo uu tiki twaing’idaki ghati ya Kristo, twaoka wa kusariwa kukela wandu wose.
20Kake ingeriaha Kristo aterushwa ghati ya wefwie, malumbulo mawo weshinjie. 21Amu sandu hena mundu kifwa kizie, hena mundu pia luruko lwa wefwie. 22Amu sandu ghati ya Adamu wose wafwa, huwo pia ghati ya Kristo wose weneingwa moo. 23Kake ose hena mitongie yakwe mwenye: Kristo malumbulo; ikwade wala wakwe Kristo, hena kuza kwakwe. 24Ikwade kuidiwika, eneikaemng’olie ufumwa Izuwa, eye Apa; eneikaeidiwe kutesha kuitoria kwose na luidimo lose na zinya. 25Amu tena huwo kuitoria, mtano eneikaemawike maring’a makwe mose si ya maghu makwe. 26Mring’a wa kuidiwika eneteshwa ni kifwa. 27Amu, Eviwikie vyose si ya maghu makwe. Kake ekighamba, Vyose vioho si, ni raa ti ula tetetwaye eviwikie vyose si yakwe. 28Na vyose vikiidiwa kuwikwa si yakwe, niho na Mwana mwenye pia enewikwa si yakwe ula eviwikie vyose si yakwe, nesa Izuwa aoke vyose ghati ya vyose.
29Kwakicha si huwo, weneketaze wala webatizwe hena wefwie; kwakicha wefwie tewerushwa deng’e, nini webatizwa hena woo? 30Nini uswi pia tuoho ndengeni saa yose? 31Musi hena musi nafwa, ee, hena kukuisisa kwenyu, wandwetu, eko nina ghati ya Kristo Yesu Mzuri wetu. 32Ikioka hena mikayie ya wandu nibighane na nyama jikaeha hala Efeso, mbucha ani hangu? Kwakicha wefwie tewerushwa, tule na tunywe, amu yawo twafwa. 33Musikengwe: sighari mbiwi yanyamara mitongie yedi. 34Amkeni hena ngalo, na musikete ng’oki: amu mondo tewena lutwarijo lwa Izuwa: nateta iki nimugere soni.
35Kake mundu eneghamba, nize wefwie werushwa, na na muri ani weneza? 36Utomode we, kila ukihanda mwenye tekiingwa moo, kisifwe. 37Na kila ukihanda, touhandawe muri ula uneoka, nde ndembe nduhu, ngea ngano, kana ya mbare ingi: 38kake Izuwa eiinga muri sandu ekundie, na mbeu yose mwemwe muri wakwe mwenye. 39Nyama yose si nyama mwe: kake hena nyama mwe ya wandu, nyama ingi ya nyama, na nyama ingi ya ndeghe, na ingi ya nguluma. 40Henawa miri ya wanga, na miri ya masangeni: kake kirumi kya ila ya wanga ni kimwe, na kirumi kya ila ya masangeni ni kingi. 41Hena kirumi kimwe kya nzano, na kirumi kingi kya mweji, na kirumi kingi kya ndondo; amu ndondo mwe yalelana na ndondo ingi ghati ya kirumi. 42Ni huwo pia luruko lwa wefwie. Uhandwa ghati ya kunyamarika; urushwa ghati ya kusanyamarika; 43uhandwa ghati ya nguruna; urushwa ghati ya kirumi; uhandwa ghati ya unana; urushwa ghati ya zinya; uhandwa muri wa lukishoni: 44urushwa muri wa ngoma. Hena muri wa lukishoni, na henawa wa ngoma. 45Huwo pia itamiwe, Mundu wa kuwoka Adamu earehike mwenye moo: Adamu wa kuidiwika ngoma yainga moo. 46Kake kila kya ngoma si kila kya kuwoka, nde kila kya lukishoni; na ikwade kila kya ngoma. 47Mundu wa kuwoka ni wa masanga, wa teri; mundu wa keri ni wa wanga. 48Sa ula wa teri, huwo na wala pia ewo wa teri; na sa ula wa wanga, ni huwo na wala pia ewo wa wanga. 49Na sandu tutikie fwana ya ula wa teri, tunetika pia fwana ya ula wa wanga.
50Na naghamba iki, wandwetu, ti nyama na sakame tejiidima kuuhoja ufumwa wa Izuwa: nete kunyamarika tokukuhoja kusanyamarika. 51Yoa, namburra mbiso: Totuneshinjia wose, kake tunegharuka wose: 52Hena mtungo mwe, hena kukonya kwa ijiso, hena lughunda lwa kuidiwika: amu lughunda luneiya, na wefwie wenerushwa wesina kunyamarika, na tunegharuka. 53Amu uu wa kunyamarika touna huwo kudoka kusanyamarika, na uu wa kufwa touna huwo kudoka kusafwa. 54Kake uu wa kunyamarika uneikaudoke kusanyamarika, na uu wa kufwa uneikaudoke kusafwa, niho kineoka kiteto kitamiwe, kifwa kyamijwa na kulela. 55Kifwa we, kulela kwako kuohi? kifwa we, luzina lwako luohi? 56Luzina lwa kifwa ni ng’oki: na zinya ya ng’oki ni sheria: 57Kake Izuwa aanjelwe, etuinga kulela hena Mzuri wetu Yesu Kristo. 58Hena lwa iyo, wandwetu wakundwa, muduwe, musidedemishwe, mukineta misi yose ghati ya ndima ya Mzuri, mukioka mwatisiwa ti ndima yenyu si haya ghati ya Mzuri.
Currently Selected:
1 Hena Wakorintho 15: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
