Valoma 5
5
UKilisiti átuteepwidze nu Nguluvi
1Neke, pakuva uNguluvi átwidikiye ukuvedza vagolofu wugendela wa kumufuuwa uYesu, lino tuli nu lutengamaso nave wugendela mwa Mutwa veesu uYesu Kilisiti. 2Wugendela wa lufuuwo lwesu, uKilisiti átuhambwise twingile mu lusungu lwa Nguluvi, kangi twave tukwikala mu lusungu ulo. Mu ulo, tuli nu lukeelo pakuva twihuuvila ukutigila, tulaavedzasa nu Nguluvi mu ndolo dzaakwe. 3Kangi, nde tuvedze tuli mu mumuko, twisigala nu lukeelo pakuva twidzeela ukutigila, imumuko dzikutupeela uwisamutima. 4Uwisamutima uwo we weene uwukutupeela uwukangafu wa numbula, nu wukangafu wa numbula wukutupeela uluhuuvilo. 5Uluhuuvilo ulo lusikutuyeyewusa pakuva twidzeela ukutigila, uNguluvi átwitiye uwende waakwe mu numbula dzeesu wugendela mwa Mubepo uMwimike ye átupeeliye.
6Umusika gwe aahaaguwe uNguluvi pe twali tungaya ngufu, uKilisiti aadzile mu kufuwa wiimila weesu ye tusili vagolofu. 7Ndakyene lutalamu kwa muunu ukwidika ukufuwa wiimila wa muunu umugolofu. Apangi umuunu iigela ukwidika ukufuwa wiimila wa muunu umunofu hiilo. 8Neke kangi pe twali twave vanya ndzanangifu, uNguluvi aawoneesiidze uwende waakwe ukwesu, wugendela wa kumutawula uKilisiti afuwe wiimila weesu.
9Neke lino, pakuva twídiikwe ukuvedza vagolofu wugendela mu danda ya Yesu, ndakyene tuhadza twipokwa wugendela mwa Yesu ukuhuma mu ligooga lya Nguluvi. 10UNguluvi atuteepwidze uneefwe nu mwene wugendela wa kufuwa kwa Muswamuve, pe twali vatavangwa vaakwe. Neke lino, pakuva túteepwidzwe nave, ndakyene tulaapokwa wugendela wa wuumi wa Muswamuve. 11Kangi si luulo hela, nda haamu, pamwinga na ulo, uNguluvi átuhambwise tukeele hiilo, wugendela mwa Mutwa veesu uYesu Kilisiti ye átuteepwidze nu Nguluvi.
UAdamu atuhuliye ifuwa, uYesu átupeeliye uwuumi
12Indzanangifu yiingiye mwe naanyi wugendela wa muunu yumwinga uAdamu, yikuvahulilaga vonda ifuwa. Wiimila wa ndzanangifu iyo, avaanu vonda viifuwa, pakuva vonda válimile indzanangifu. 13UMose pe aali asinaa apeelwa imilagililwe, indzanangifu yaali mooyili mwe naanyi. Neke kangi uNguluvi asavavaliliye avaanu ukuvedza valima-ndzanangifu, pakuva imilagililwe sigyali poogili. 14Napo kangi, ukuvangila uAdamu ukufikila uMose, ifuwa yaali kooyili, nambe ku vaanu avasaalimile indzanangifu ngita uAdamu pa kudzumba uwulagidze.
Lino uAdamu aali kihwananidzo kya Kilisiti ye aadzile mumbele. 15Neke kangi indzanangifu ya Adamu, yisiilingʼaana nu luwonolo lwa lusungu lwa Nguluvi. UAdamu aahulile avaanu voloofu vafuwe wiimila wa ndzanangifu yaakwe, neke kangi wugendela wa luwonolo lwa muunu yumwinga, uYesu Kilisiti, avaanu voloofu váanukiye ulusungu lwa Nguluvi ngaya kigelelo. 16Kangi indzanangifu ya muunu yumwinga uAdamu, yisiilingʼaana nu luwonolo lwa lusungu lwa Nguluvi. Wiimila wa ndzanangifu yimwinga ya Adamu, uNguluvi avahigile avaanu kuvagila ulupedzo. Neke kangi wiimila wa lusungu lwakwe, uNguluvi aviidikiye avaanu ukuvedza vagolofu, nde vavedze vanya ndzanangifu ndzoloofu. 17Ngana indzanangifu ya muunu yumwinga yaahulile ifuwa yiteme avaanu vonda, ndakyene avaanu aviikwanukila ulusungu lwa Nguluvi ngaya kigelelo, na aviikwidikilwa ukuvedza vagolofu, vahadza viitema mu wuumi wugendela wa muunu yumwinga uYesu Kilisiti.
18Neke lino, ngita avaanu vonda kye vaavagiye ukupedzwa wiimila wa ndzanangifu ya muunu yumwinga, ndeeni avaanu vonda viikwidikilwa ukuvedza vagolofu, nu kwanukila uwuumi uwa mbeepali, wugendela wa wugolofu wa muunu yumwinga. 19Kangi, ngita umuunu yumwinga kye aakaanile ukumwidika uNguluvi, akuvahulilaga avaanu voloofu vavedze vanya ndzanangifu, ndeeni umuunu yumwinga ye amwidiike uNguluvi, alavahulila avaanu voloofu viidikilwe ukuvedza vagolofu.
20Imilagililwe gya Mose gyadzile, ukuta indzanangifu dzoongelele. Napo kangi pe dzóongeliye, ulusungu lwa Nguluvi nalo lwiginaga ukoongelela. 21Lino, ngita avaanu kye vaali mu wutemi wa ndzanangifu iyavaleetiye ifuwa, ndeeni wiimila wa kuviidikila ukuvedza vagolofu, vali mu wutemi wa lusungu lwa Nguluvi, uwukuvaleetela uwuumi uwa mbeepali mwa Mutwa veesu uYesu Kilisiti.
Currently Selected:
Valoma 5: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
