Luka 7
7
UYesu akumunaniya umulimila-vangi va mukomi va Valoma
(Matayo 8:5-13; Yohana 4:43-54)
1UYesu aaviye ámalile ukuvawulanidza avaanu amadzwi gonda ago, iihelelaga ku wudzenge wa Kapelenahumu. 2Mu wudzenge uwo, aali mwali umukomi va Valoma va kipuga kya vakolakyanda ligana limwinga (100). Umukomi uyo aali nu mulimila-vangi ye amwendile hiilo. Umulimila-vangi uyo aavawaga mbandu, aali asanga afuwa. 3Umukomi uyo pe aapuliike imola dza Yesu, akuvatumaga avavaha vakeefu va Vayahudi, ukuta vahelele vakamugongoole uYesu, aadze amunaniye umulimila-vangi vaakwe. 4Avavaha avo pe vaafikile kwa Yesu, vakumugongoolaga mbandu viitigilaga, “Umuunu uyu iivagila ukutangwa lwe akukunyilika, 5pakuva akuveenda avaanu veesu. Kangi ye mwene ye atudzengiye uluholanilo lwesu.”
6Neke uYesu ahegage na vavaha avo ahelelage ku nyumba ya mukomi uyo. Pe vasanga vafika pa nyumba iyo, umukomi uyo akuvatumaga avadzeela vaakwe vahelele kwa Yesu vakamulongele ukutigila, “Mutwave, utane ukwifwahidza hiilo, pakuva uneene sindivagiye ukutigila wiingile mu nyumba yangu. 7Ndikwiwona ukutigila, sindivagiye nambe kwadza ukwako. Lino ulonge ilidzwi swe, umulimila-vangi vangu iinana. 8Na yuune ndili paanyi pa wutawulilwe. Kangi ndili navo avakolakyanda avali paanyi apangu. Ngana ndimulongele yumwinga nditigile, ‘Helele,’ iihelela. Uyungi, nditigile, ‘Waadze,’ iikwadza. Nu mulimila-vangi vangu, nditigile, ‘Lime ulu,’ iilima.”
9UYesu pe aapuliike amadzwi ago, iidzumaga mbandu. Neke aliseedukilage ililugu lya vaanu ilyamuniniilaga atigilage, “Ndikuvalongela ukutigila, ndisinaa ndimuwonaga umuunu umunya lufuuwo ulukomi ngita ulu, nambe mu Vaisilaheli vonda!” 10Avaanu avaatumiilwe navo, pe vaapilwike ku nyumba ya mukomi uyo, vakumuwonaga umulimila-vangi áponile.
UYesu akumudzulubusa umuswamuve va mwayuuva umufwile
11Pambele padebe, uYesu na vanyigendwa vaakwe, pamwinga ni lilugu likomi lya vaanu, viihelelaga ku wudzenge wa Nayini. 12Pe vali biihi nu wingililo wa wudzenge uwo, viitaangʼanaga na vaanu viihuma umo, ványamuwe umufimba gwa mwana mugoosi mu lupaasa. Umwana uyo, aali mudiimi munyakimwinga mwa ngʼina. Ungʼina uyo aali mufwile nu mugoosi. Avaanu voloofu ukuhuma umo, vaali pamwinga nu ngʼina uyo.
13UMutwa pe amuweene umufwile uyo, lukumugwilaga ulusungu. Akumulongelaga iitigilaga, “Utane ukuvemba.” 14Neke ahegelelage pa lupaasa, alupamyage, avaanu avalunyamuwe, viikwimaga. UYesu iitigilaga, “Ve mudiimaave! Ndikukulongela, lamuke!” 15Baaho na baaho, ye aafuwe iilamukaga, akwikalaga, iivangaga ukulonga. UYesu akumutawulaga umwana uyo kwa ngʼina. 16Avaanu vonda viikoogopaga hiilo, vakumupeelaga indolo uNguluvi viitigilaga, “Umuvidzi umukomi áadzile ukwesu! UNguluvi áadzile mu kuvatanga avaanu vaakwe!” 17Imola dza malimo ge aalimile uYesu, dziitagalilaga imbali dzonda idza ku Yudeya na mu nyi ídziyipiliime.
Imola ukuhuma kwa Yohana uMudzabisi
(Matayo 11:2-19)
18Avanyigendwa va Yohana uMudzabisi vakumulongelaga imola dzonda dze aalimaga uYesu. Neke avakemeelage vavili mu vanyigendwa vaakwe, 19avatumage kwa Mutwa Yesu vakamuwuudze ukutigila, “Ongo, yuuve ye vaavilile avavidzi ukutigila iikwadza, enewuli tumuhuuvilage uyungi?” 20Avanyigendwa avo pe vaafikile kwa Yesu viitigilaga, “UYohana uMudzabisi átutumile ukwako tukuwuudze ukutigila, ‘Yuuve Kilisiti ye vaavilile avavidzi ukutigila iikwadza? Enewuli tumuhuuvilage uyungi?’ ” 21Ikivalilo kiikyo, uYesu avananiyaga voloofu ifitamwa fyawo, pamwinga na avaali ni mibepo imiviifu. Kangi avananiyaga avabofu voloofu valolage. 22Neke avahigage avanyigendwa avo atigilage, “Muhelelage mukamulongele uYohana dzonda dze mukudziwona nu kudzipulika. Avabofu viilola, avasiigenda viigenda, avanya kinyamuvili viivalala, avadibafu viipulika, ávafuwe viidzulubuswa. Kangi avahangala viidalikilwa iMola iNofu.#7:22 Amadzwi aga we wukwilifu wa wuvidzi wa Isaya 26:19; 29:18-19; 35:5-6; 61:1. 23Áfuunyiliilwe umuunu ye avedzaga ye asikwikuvadza wiimila wa neene.”
24Avanyigendwa va Yohana pe vaaviye váhegile, uYesu iivangaga ukulilongela ililugu lya vaanu imola dza Yohana uMudzabisi iitigilaga, “Pe mukiihelelaga ku lungʼalangʼala, mukiihuuvilaga kulola kiki? Umuunu ngita ludete ulwipugwa ni ngʼaala? 25Lino mukaaheliye kulola kiki? Umuunu ye áfwalile imyenda gya lutogo? Nambi, aviifwala imyenda igyo, vali mu wiinoome, kangi vakwikala mu nyumba dza wutwa, si ku lungʼalangʼala! 26Lino mukaaheliye kulola kiki? Kulola umuvidzi? Eena! Ndikuvalongela ukutigila, uYohana siye muvidzi hela, uyo ye mukomi ukulutila umuvidzi. 27Uyo ye mwene ye dzísimbiilwe mu Wusimbe uWiimike imola dzaakwe ukutigila,
‘Lolage, ndikumutuma umulongodzi-mola vangu akulongole,
ye mwene ye ahadza akukuwuyapila ingʼaasi yaako pawutalo apaako.’#Malaki 3:1 ”
28UYesu akuvalongelaga kangi iitigilaga, “Ndikuvalongela ukutigila, mu vaanu vonda, asinaa ahumilaga umuunu ye aaholiilwe nu mwayuuva ukuvedza mukomi ukulutila uYohana. Neke kangi ye mudebe mu wutwa wa Nguluvi, ye mwene ye mukomi ukulutila uYohana.” 29Neke avaanu vonda pamwinga na vahaki-pembe, pe vaapuliike amadzwi ga Yesu wiimila wa Yohana, viidikilage ukutigila uwugelanihidze wa Nguluvi waali wugolofu, pakuva avo ve veene avaadzabiikwe nu Yohana. 30Neke kangi aVafwalisayo pamwinga na vawulanidzi va milagililwe vasaadzabiikwe nu Yohana, pakuva vaakaanile ukulima ulo lwe aagulwime uNguluvi ukwawo.
31UYesu akuvalongelaga kangi iitigilaga, “Avaanu va kivegalo iki ndivahwananidze na kiki? Viihwanana na kiki? 32Viihwanana na vaana áviikalile ku ligulilo, vakuvakemeela avayaawo viitigila,
‘Túvapembiye ifihaadzi,
musikinile!
Túviimbiye ulwimbo lwa luhugumo,
musihugumiliye!’
33“Muli ewo na yuunye! UYohana uMudzabisi pe aadzile, asaaliyaga imikaate nambe kunyuwa idifwayi, mwitigilaga, ‘Ali nu mubepo umuviifu.’ 34UMuswamuve va Muunu aadzile, iiliya nu kunyuwa ngita kye viilima avangi, unyeenye mwitigilaga, ‘Lolage! Uyu muliya hiilo kangi mugaadzi, mudzeela va vahaki-pembe na vanya ndzanangifu!’ 35Neke kangi uluhalawukagudzi lwa Nguluvi, lwiwoneka lwa ndakyene mu malimo ga vaana vaakwe vonda.”
UYesu akumupyanila umunya ndzanangifu
36Ikigono kimwinga, uMufwalisayo ye aatambulwaga Simoni, amulaaliike uYesu akahange ikyakuliya ukwakwe. Neke uYesu ahelelage ku nyumba ya Mufwalisayo uyo, iikalage nu kuhanga ukuliya ikyakuliya. 37Mu wudzenge uwo, aali mwali umwayuuva yumwinga, ye aadzeelaniike ukutigila munya ndzanangifu. Umwayuuva uyo, pe aapuliike ukutigila uYesu ali mu kuliya mu nyumba ya Mufwalisayo, iihelelaga ni supa ya liganga iyinya mafuta manofu kangi ga magoobeli goloofu. 38Aaviye áfikile, iikwimaga kumbele kwa Yesu, biihi na magulu gaakwe. Iivangaga ukuvemba, amoohodzi gaakwe giidomolelaga mu magulu ga Yesu, kuno iipolosa ni fwili dzaakwe, akuganoonela nu kugabaka amafuta.
39UMufwalisayo uyo, pe aluweene ulo, iihoodzaga mu numbula yaakwe ukutigila, “Ngana umuunu uyu akali avedzage muvidzi, ngali ádzeeliye ukutigila, umwayuuva uyu ye akumupamya nde ali wuli. Akali iidzeela ukutigila munya ndzanangifu.” 40Neke uYesu atigilage, “Simoni, ndili ni lidzwi, ndiisaka ndikulongele.” Nave iitigilaga, “Eena Muwulanidzi, uundongele.”
41UYesu iitigilaga, “Kwali avaanu vavili avaadzigilwaga nu muunu yumwinga. Yumwinga aadzigilwaga dinaali#7:41 Dinaali Aga gaali magoobeli ga Valoma. Idinaali yimwinga yaalingʼiine nu luhombo lwa mulima-malimo mu kigono kimwinga. magana gahaanu (500), uyungi aadzigilwaga dinaali makyumi gahaanu (50). 42Avaanu avo pe vaalemiilwe ukuhomba imidzigilo gyawo, umuunu uyo akuvapyanilaga vatane ukuhomba. Lino mu avo avaadzigilwaga, ye ali kwi ye ahadza akumwenda hiilo umuunu uyo?” 43USimoni akumuhigaga iitigilaga, “Ndiiwona ye uyo ye aapyaniidzwe umudzigilo mukomi hiilo.” UYesu iitigilaga, “Úlongile lwe lwene.”
44Apo, uYesu akumulolaga umwayuuva uyo, akumulongelaga uSimoni iitigilaga, “Úmuweene umwayuuva uyu? Pe ndíingiye mu kaaya yaako umu, uveeve usiimeeliye ululenga ulwa kukalafya amagulu.#7:44 Kukalafya amagulu Gyali mivedzehedze gya Vayahudi ukumupeela umugendzi ululenga, ukuta akalafye amagulu gaakwe ágafuudwike ni lifuuna wiimila wa lugendo. Neke kangi uyu áangʼaliifye amagulu na moohodzi gaakwe, nu kupolosa ni fwili dzaakwe. 45Pe úunyungiye, usiinooniye. Kangi uyu, ukuvangila pe ndiikwingila umu, asilekile ukuunoonela hiilo amagulu. 46Kangi usiimbakile amafuta pa mutuwe,#7:46 Usiimbakile amafuta pa mutuwe Ku Vayahudi, lwali lukaani lwa kumuwoneesa umugendzi uluginiyo. neke kangi uyu áambakile amagulu amafuta matalamu. 47Lino ndikukulongela ukutigila, umwayuuva uyu áwodziidzwe indzanangifu dzaakwe ndzoloofu, pakuva áwoneesiidze uwende wukomi. Nayu muunu ye áwodziidzwe indzanangifu ngʼeefu, uyo iikwenda lukeefu.” 48Neke, uYesu amulongelage umwayuuva uyo atigilage, “Úwodziidzwe indzanangifu dzaako.”
49Neke avo avaaliyaga nu Yesu, vavangage ukwiwuudza vatigilage, “Uyu ye ani iiwodza nambe ndzanangifu?” 50Apo, uYesu akumulongelaga kangi umwayuuva uyo iitigilaga, “Ulufuuwo lwako lúkunaniidze. Uhelelage mu lutengamaso!”
Currently Selected:
Luka 7: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.