Luka 5
5
UYesu akuvahaagula avanyigendwa va kutala
(Matayo 4:18-22; Maluko 1:16-20)
1Ikigono kimwinga, uYesu iimile pa ngʼumbungʼumbu ya nyandza ya Genesaleti,#5:1 Nyandza ya Genesaleti Ili lye litaawa ilingi lya nyandza ya Galilaya. na vaanu voloofu vamupilimaga, viifinyana mbandu, viipulikidza ilidzwi lya Nguluvi. 2Pa ngʼumbungʼumbu ya nyandza iyo, uYesu akuwuwonaga uwaato wuvili, avalovi avanya waato uwo vasaali umo, pakuva vaali mu kuhogofya indzafu dzaawo. 3Iikwingilaga mu waato uwaali wa Simoni. Akumunyilikaga uSimoni awuhegeledze padebe kugati ya nyandza ukuhuma ku ngʼumbungʼumbu, neke uYesu iikalage mu waato umo, awulanidzage ililugu lya vaanu.
4Pe aaviye ámalile ukuwulanidza, akumulongelaga uSimoni iitigilaga, “Hegeledze uwaato ku lulenga ulutaali, mukasope indzafu dzeenyo, mulove isomba.” 5USimoni akumuhigaga uYesu iitigilaga, “Mutwave, túlimile amalimo ikilo yonda, sitwambuliye nambe yimwinga. Lino, pakuva uveeve úlongile, apo ndiisopa indzafu.”
6USimoni na vayagwe viisopaga indzafu dzaawo. Pe vaaviye válimile ewo, isomba ndzoloofu mbandu dziigwilaga, indzafu dziivangaga ukudeemuka. 7Neke vavavingilage amawoko avayaawo avaali mu waato uwungi, ukuta vaadze vavatange. Viikwadzaga viimemyaga isomba uwaato wonda wuvili, isomba dzaali ndzoloofu mbandu, nawu waato wiisakaga ukudwivala. 8USimoni Petulo pe aluweene ulo, akwigwisaga pa magulu ga Yesu iitigilaga, “Mutwave, ndikukunyilika uhege apangu, pakuva uneene ndili muhosi.” 9USimoni aalongile ulo, pakuva umwene na vangi vonda avaali pamwinga, vaadzumile hiilo wiimila wa somba ndzoloofu dze válovile. 10Mu waato uwungi vaali moovali uYakobo nu Yohana avaswamuve va Sebedayo, avaahanganaga nu Simoni, navo viidzumaga mbandu. Neke uYesu amulongelage uSimoni atigilage, “Utane ukoogopa Simoni, ukuhuma lino wiivedzaga mulovi va vaanu.”#5:10 Mulovi va vaanu Kwe kutigila, uYesu ahadza akumuhambusa uSimoni avaleetage avaanu vamuniniilage uYesu. 11Pambele viisindikaga uwaato waawo ku ngʼumbungʼumbu ya nyandza, apo vakufilekaga ifiinu fyonda, vakumuniniilaga uYesu.
UYesu akumunaniya umunya kinyamuvili
(Matayo 8:1-4; Maluko 1:40-45)
12UYesu pe aali mu wudzenge wumwinga, umo aali mwali umwadaada umunya kinyamuvili#5:12 Kinyamuvili Kwe kutigila, wutamwa wuwuvedzaga wa ngwembe ya muvili. umuvili gonda. Umuunu uyo pe amuweene uYesu, iiguwaga kinyalileme pa Yesu, nu kumugongoola iitigilaga, “Mutwave, ngana úkeeliye, ndiinyilika uumbaladze.”#5:12 Ndiinyilika uumbaladze Umuunu ye aavedzaga nu wutamwa wuwuvedzaga wa kinyamuvili, aavedzaga lupumba. AVayahudi avaali lupumba, vaapeeliilwe imilagililwe gya kuvaladzwa, ukuta vaanukilwe nu Nguluvi, Valevi 13:1–14:32. 13UYesu iigolosaga iliwoko lyakwe, akumupamyaga,#5:13 Akumupamyaga AVayahudi vaalagiidzwe vatanage ukumupamya umunya kinyamuvili, ukuta vatane ukuvedza lupumba, Valevi 5:3. iitigilaga, “Ndíkeeliye, uvalale.” Umusika guugo, ikinyamuvili kikumuhegaga. 14Neke amukaanidzage umuunu uyo atigilage, “Utane ukumulongela ye avedzaga, kangi uhelelage ukiiwoneese kwa muteekedzi,#5:14 Muteekedzi Uyu aali nu wutawulilwe uwa kulonga ukutigila, umunya kinyamuvili ávaliidzwe, ukuta ahangage na vaanu avangi kangi, Valevi 14:1-32; Lwiwuko 24:8. ukatawule uwusembe wiimila wa kuvaladzwa, ngita kye aalagiidze uMose. Wuvedzage we woolesi ku vaanu vonda ukutigila úvaliidzwe.” 15Kangi imola dza Yesu dziiginaga ukutagalila imbali dzonda. Avaanu voloofu vaalundanaga ukumupulikidza, nu kunanwa ifitamwa fyawo. 16Neke kangi umwene avalekage avaanu nu kuhelela pa kinyele kulapangila.
UYesu akumunaniya umunya liteela
(Matayo 9:1-8; Maluko 2:1-12)
17Ikigono kimwinga, uYesu avawulanidzaga avaanu. Mu avo vaali moovali aVafwalisayo#5:17 AVafwalisayo Lole ku Figanulo. na vawulanidzi va milagililwe, ukuhuma mu mbala dzonda idza ku Galilaya ni dza ku Yudeya, nu mu wudzenge wa Yelusalemu. Ingufu dza Mutwa Nguluvi idza kunaniya avatamwa dzaali nu mwene.
18Neke vaadzage avamwadaada, vámunyamuwe umwadaada umunya liteela mu lupaasa, vasakage ukumwingidza mu nyumba, ukuta vamuviike pe agenda uYesu. 19Kangi viilemwaga ukumwingidza umutamwa uyo pa mulyango, pakuva avaanu vaamemile mbandu. Suwe viikwinukaga mu fikomo ya nyumba, viifikaga kukyanya ku likiingʼa, viilalaatulaga ifigayi. Vakumusolondosaga umunya liteela uyo mu liteefu, pagatinagati pa lilugu kidonya pe agenda uYesu.
20UYesu pe aluweene ulufuuwo lwawo, iitigilaga kwa mutamwa, “Munyalukolo, úwodziidzwe indzanangifu dzaako.” 21Neke avawulanidzi va milagililwe na Vafwalisayo avo vavangage ukwiwuudza veene vatigilage, “Ye ani uyu, ye akumulonga fivi uNguluvi? Sikwali umuunu ye iiwodza indzanangifu, nda haamu, yu Nguluvi mwene hela!” 22Dze viiwuudzaga, uYesu adzidzeeliye, neke avawuudzage atigilage, “Kye kiki mwihoodza ewo mu numbula dzeenyo? 23Luli kwi ulupeefu, ukumulongela umunya liteela ukutigila, ‘Úwodziidzwe indzanangifu dzaako,’ enewuli, ‘Wiime, ugendage’? 24Neke kangi muludzeelage ukutigila, uMuswamuve va Muunu#5:24 UMuswamuve va Muunu UYesu aatambuwe ilitaawa ili ukwisoonela yumwene. Lole ku Figanulo. ali nu wutawulilwe wa kuwodza indzanangifu mu nyi umu.” Neke amulongelage umunya liteela atigilage, “Wiime! Tegule iliteefu lyako, uhelelage ku kaaya yaako.” 25Umusika guugo, iikwimaga pa miiho gaawo, iitegulaga iliteefu lyakwe, iiwuyaga ku kaaya yaakwe kuno akumupeela indolo uNguluvi. 26Neke vonda vadzumage vamupeelage indolo uNguluvi, kuno viikoogopa viitigila, “Ineengʼuli túdziweene idza kudzumwa!”
UYesu akumukemeela uLevi
(Matayo 9:9-13; Maluko 2:13-17)
27UYesu aaviye áhegile apo pe aali, akumuwonaga umuhaki-pembe yumwinga, ye aatambulwaga Levi,#5:27 Levi Ili lye litaawa ilingi ilya Matayo. íikalile pe aalundahidzaga ipembe. Neke uYesu amulongelage atigilage, “Uuniniilage.” 28Apo uLevi iikwimaga, akufilekaga fyonda, akumuniniilaga.
29ULevi akumugelanihidzaga uYesu ulukeelanilo lukomi mu nyumba yaakwe. Kangi paali ni kipuga kikomi kya vahaki-pembe voloofu na vaanu avangi aviikaliise mu kuliya. 30Neke aVafwalisayo na vawulanidzi vaawo va milagililwe, vavangage ukwingʼulandza ku vanyigendwa#5:30 Vanyigendwa Lole Avanyigendwa ku Figanulo. va Yesu vatigilage, “Kye kiki mwiliilasa nu kunywelasa na vahaki-pembe na vanya ndzanangifu avangi?” 31UYesu akuvahigaga iitigilaga, “Avasiivawa umuvili vasiisakula ukuhelela kwa muyavi-migoda, nda haamu, va vatamwa swe. 32Luli ewo, sindaadzile mu kuvakemeela avakwiwona vagolofu, nda haamu, avo avakwiwona vanya ndzanangifu, ukutigila vapelage.”
UYesu iiwulanidza ingʼaasi imiya
(Matayo 9:14-17; Maluko 2:18-22)
33Avaanu avo vakumulongelaga uYesu viitigilaga, “Avanyigendwa va Yohana na vanyigendwa va Vafwalisayo vali ni mivedzehedze gya kwiviikila ngʼaani#5:33 Kwiviikila ngʼaani Lole Ukwiviikila ngʼaani ku Figanulo. nu kulapangila kwa Nguluvi. Kye kiki avanyigendwa vaako viiliya nu kunyuwa ifigono fyonda?” 34UYesu akuvahigaga iitigilaga, “Ongo, ávalaaliikwe ku noolane, vakwiviikila ngʼaani wuli pe vali pamwinga nu mutoodzi?#5:34 Mutoodzi UYesu akwisoonela yumwene. Mwilemwa ukuvakaanidza ukuliya. 35Neke kangi umusika gulaadza umutoodzi gwe alaahedzwa, apo pe peene pe valiiviikila ngʼaani.” 36Akuvalongelaga ikihwananidzo ikingi iitigilaga, “Sikwali umuunu ye iideemula ikipabiko mu mwenda umupiya, ukuta apabikile mu mwenda umulovela. Ngana alime ewo, iideemula umwenda umupiya, ni kipabiko ikyo kisiihwanana nu mwenda umulovela. 37Kangi sikwali umuunu ye iisopa idifwayi imiya mu bogolo idza ngwembe indovela. Ngana vasope, ibogolo dziipwefuka, idifwayi yiikwitika, ibogolo nadzo dziikwanangika. 38Nda haamu, avaanu vaavisopa idifwayi imiya mu bogolo imiya. 39Kangi sikwali umuunu ye iisakula ukunyuwa idifwayi imiya, pe iivedza ányuwe tandi indovela, pakuva viitigila idifwayi indovela iyo ye nofu hiilo.”#5:36-39 Kwe kutigila, umuunu ye akumuniniila uNguluvi, kuno iikolaatidza imivedzehedze gya kataali, iiyaga mbandu.
Currently Selected:
Luka 5: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.