Luka 2
2
Ukuholwa kwa Yesu Kilisiti
(Matayo 1:18-25)
1Mu musika guugo gwe aaholeliilwe uYohana uMudzabisi, uKayisali Agusiti umutemi va Valoma#2:1 UKayisali Agusiti umutemi va Valoma Umusika ugo, inyi ndzoloofu dzaali mu wutemi wa Valoma, kwe kutigila nayi nyi ya Isilaheli yaali mu wutemi wuuwo. Lole ilamani ku wusililo wa kitabu iki. Kayisali lyali litaawa lya wutemi wa Valoma. Ibooma yaakwe yaali ku Loma. iilagidzaga ukutigila, avaanu vonda va nyi dza wutemi waakwe, vasimbwage. 2Ukusimbwa uku kwali kwa kutala, kwahumiye mu musika uKilenyo pe aalongodzaga umugoola gwa Silya. 3Neke avaanu vonda vahelelage kusimbwa, nayula ku wudzenge kwe lwahumiye ulukolo lwakwe.
4Nayu Yosefu aahegile ku wudzenge wa Nasaleti uwaali ku Galilaya, iihelelaga ku wudzenge wa Betelehemu ya Yudeya, kwe aaholeliilwe umutwa Dawudi, pakuva uYosefu aali va lukolo lwa Dawudi. 5Pe aaheliye kusimbwa, aali pamwinga nu Maliya ye amubaanyile, kangi munya wuvaha. 6Pe vali ku Betelehemu, gwifikaga umusika gwakwe ugwa kuhola umwana. 7Iiholaga umwana muvele umudiimi, akumupilingidzaga imyenda gya waana. Neke amugonekage mu libaani ilya kuliila isenga, pakuva vaagayile apoono pa kugona, inyumba dza vagendzi dzaamemile vaanu.
Avadiimi na vanyamwandza
8Ikilo iyo, vaali koovali avadiimi aviikalaga kudaasi, biihi ni Betelehemu, viidiimilidza indiimwa dzaawo. 9Neke umunyamwandza va Mutwa Nguluvi avahumilage, nadzi ndolo ukuhuma kwa Mutwa Nguluvi dzivamulikilage imbali dzonda, viikoogopaga mbandu. 10Umunyamwandza uyo akuvalongelaga iitigilaga, “Mutane ukoogopa! Lolage, ndívaleetiye imola inofu iyihadza yikuvapeela avaanu vonda ulukeelo lukomi. 11Imola inofu ye iyi, ineengʼuli áholiilwe uMupoki mu wudzenge wa Dawudi, wiimila weenyo, uyo ye Mesiya,#2:11 Mesiya Ilitaawa ili pamwinga ni litaawa Kilisiti, gonda gali kiganulo kimwinga. Lole UKilisiti ku Figanulo. Mutwa. 12Ikimanyilo ukwenyo kye iki. Muhadza mukumuwona kyali, vámupilingiidze imyenda gya waana, ágonile mu libaani ilya kuliila isenga.”
13Umusika guugo, malugu malugu ga vanyamwandza va kukyanya giihumilaga, giihangaga nu munyamwandza uyo ukumulumba uNguluvi giitigilaga,
14“UNguluvi kukyanya apeelwage indolo,
nu lutengamaso luvedzage mu nyi
ku vaanu ve ákeeliye avapeele ulufuunyo.”
15Avanyamwandza pe vaaviye váhegile ukuhelela kukyanya, avadiimi avo viilonganaga viitigilaga, “Lino tuhege tuhelele ku Betelehemu, tukalole ulo úluhumiye lwe átulongiye uMutwa Nguluvi.” 16Viihelelaga kisaatu ku Betelehemu, vakumuwonaga uMaliya nu Yosefu, ni kyali ágonile mu libaani ilya kuliila isenga. 17Pe vamuweene umwana uyo, viitagalidzaga ku vaanu imola ye vaalongeliilwe nu munyamwandza wiimila waakwe. 18Vonda pe vaapuliike imola ye válongeliilwe na vadiimi avo, viidzumaga. 19UMaliya adziviikaga dzonda idzi mu numbula yaakwe, adzihoodzehedzaga. 20Pambele avadiimi avo viipilukaga kuno vakumupeela indolo nu kumulumba uNguluvi mu dzonda dze válolile nu kupulika. Dzaahumiye ndeeni ngita kye vaalongeliilwe nu munyamwandza.
UMwana iipeelwa ilitaawa
21Pe kyaviye kífikile ikigono ikya munaana (8) ukuhuma umwana pe iiholwa, vakumusingaga,#Valevi 12:3 vakumupeelaga ilitaawa Yesu. Ilyo lye litaawa lye aapeeliilwe nu munyamwandza, umusika ungʼina pe asinaa avedza nu wuvaha.
UYesu iisindikwa kwa Mutwa Nguluvi
22Pe gwaviye gúfikile umusika ugwa kuvaladzwa#2:22 Umusika ugwa kuvaladzwa UMose avalongiye aVaisilaheli ukutigila, umwayuuva pe áholile umwana, iikalage figono makyumi gatayi (40) kitapamya kiinu ikiimike, enewuli ukwingila mu tembeli ya Nguluvi. Pe fídzumbile ifigono ifyo, pe peene pe avaladzwage, Valevi 12:2-4. kwa Yosefu nu Maliya, ngita uNguluvi kye aalagiidze mu milagililwe gya Mose,#2:22 Milagililwe gya Mose Lole Imilagililwe gya Mose ku Figanulo. viihelelaga nu mwana ku Yelusalemu kumuhuufya kwa Mutwa Nguluvi. 23Vaalimile ewo ngita kye lwasimbiilwe mu milagililwe gya Mutwa Nguluvi ukutigila, “Umwana ye avedzaga umuvele umudiimi, agotolwage kwa Mutwa Nguluvi, avedze mwimike.”#Kuhega 13:2, 12 24Kangi viihelelaga kutawula uwusembe, ukuta vavaladzwe, ngita kye gyali milagililwe gya Mutwa Nguluvi ukutigila, vatawulage ingundya indzelu dzivili, enewuli ndzanangundya dzivili idzinya lunyakifu.#Valevi 12:8
25Mu figono ifyo, aali kwali umuunu yumwinga ku Yelusalemu ye aatambulwaga Simyoni. Umuunu uyo aali mugolofu, iifuunyaga mbeepali kwa Nguluvi nu kuhuuvila uwupoki wa Vaisilaheli. Kangi aalongodzwaga nu Mubepo uMwimike. 26UMubepo uMwimike aali ámuvilatuliye ukutigila, asiifuwa ukufikila pe iivedza ámuweene uMesiya va Mutwa Nguluvi. 27Neke uMubepo uMwimike amulongodzage uSimyoni kuhelela ku tembeli. Avavaha va Yesu vaaviye vámusindiike mu lipaala lya tembeli, vakumulimilaga ngita kye lwalagiidzwe mu milagililwe. 28USimyoni akumunyamulaga umwana uyo, akumupagataga akumulumbaga uNguluvi iitigilaga,
29“Mutwave, ve Mukomi va fyonda, amalimo gaako gákwiliye,
lino, uundeke nde mulimila-vangi vaako ndifuwe mu lutengamaso,
pakuva úlimile ngita kye waahuuviidze.
30Amiiho gangu gáwuweene uwupoki waako,
31we úgelaniidze wuwoneke pa miiho ga vaanu va fipelela fyonda.
32Uyu iivedza lumuli lwa kukuvilatula ku avasili Vayahudi,
kangi iileetaga indolo ku vaanu vaako aVaisilaheli.”#Isaya 42:6; 49:6
33Dze aalongaga wiimila wa mwana, udaada nu ngʼina vaadzumaga. 34Neke uSimyoni avafuunyililage, amulongelage uMaliya atigilage, “Umwana uyu áviikiilwe nu Nguluvi wiimila wa vaanu voloofu mu nyi ya Isilaheli ukutigila, avo avakumubeedza vayagage, neke kangi avakumufuuwa avo vapokwage. Akuvapavilaga voloofu kangi aveene vakumukaanaga, 35apo idza mugati mu numbula dzaawo dzilaavedza pa weelu. Ukukaanwa kwakwe, na yuuve kulakuhulila uwuvafi wukomi, ngita úhomiilwe ni limaage.”
36Kangi aali kwali umuvidzi umwayuuva ye aali mugogolo ye aatambulwaga Ana. Uyu aali mwalive Fwanweli, va mu kipelela kya Aseli. Pe aaviye ágomiilwe iikalile nu mugoosi vaakwe myaka mufungʼati (7), neke umugoosi vaakwe afwidzage. 37Iisigalaga mufwile nu mugoosi, iifikaga imyaka makyumi munaana ni gitayi (84). Umusika gonda ugo aavedzaga mu tembeli, iifuunyaga kwa Nguluvi ikilo nu muunyi wugendela wa kulapangila nu kwiviikila ngʼaani. 38Umusika guugo, uSimyoni pe iilonga nu Yosefu nu Maliya, umuvidzi uyo iihegelelaga apaawo. Neke avangage ukumuhongedza uNguluvi, alongage imola ya mwana uyo ku vaanu vonda avaahuuvilaga ukwadza kwa Kilisiti, ye alavakombodza aVaisilaheli.
39UYosefu nu Maliya pe vaaviye vámalile imivedzehedze gyonda ngita kye gyali mu milagililwe gya Mutwa Nguluvi, viiwuyaga ku wudzenge waawo wa Nasaleti uwaali ku Galilaya. 40Uko umwana uyo iikulaga, iikoongelelaga ingufu nu luhalawukagudzi, nu lusungu lwa Nguluvi lwivedzaga nu mwene.
UYesu mu tembeli
41Imyaka gyonda avavaha va Yesu vaahelelaga ku Yelusalemu musika gwa kyaka kya Paasaka.#2:41 Kyaka kya Paasaka Lole Ikyaka kya Paasaka ku Figanulo. 42Pe ali ni myaka ginyikyumi ni givili (12), iihelelaga na vavaha vaakwe ku Yelusalemu ku Paasaka, ngita kye gyali mivedzehedze gyawo. 43Ifigono fya Paasaka pe fyaviye fíhelaniidze, avavaha vaakwe viivangaga ulugendo lwa kuwuya ku kaaya kitadzeela ukutigila, umwana uYesu ásigiye kuuko ku Yelusalemu. 44Pe vali mu ngʼaasi, vaahoodzaga ukutigila ali pamwinga na vayagwe mu kipuga, viigendaga ulugendo lwa kigono kimwinga. Neke vavangage ukumutemula mu vanyangʼolo na mu vadzeela. 45Pe vaalemiilwe ukumuwona, viipilukaga kangi ku Yelusalemu kuno vakumutemula.
46Pe fyaviye fídzumbile ifigono fidatu, vakumuwonaga mu lipaala lya tembeli, íikalile na vawulanidzi va milagililwe,#2:46 Vawulanidzi va milagililwe Lole Avawulanidzi va milagililwe ku Figanulo. akuvapulikidza nu kuvawuudza imbuudzo. 47Vonda avamupulikidzaga, vaadzumaga mbandu uluhala lwakwe ni miluso dzaakwe. 48Na vavaha vaakwe pe vamuweene, viidzumaga mbandu. Neke ungʼina amulongelage atigilage, “Mwana vanguave, kye kiki útulimiye ulu? Lolage! Uneene nu daado twítuuniidze mbandu ukukutemula.” 49UYesu akuvahigaga iitigilaga, “Kye kiki muunemuliige? Musikiidzeelaga ukutigila uneene ndili munya kuvedza mu nyumba ya Daada?” 50Kangi lwe avalongelaga, avavaha vaakwe vasalufikile.
51Neke awuyage na vavaha vaakwe ku Nasaleti, aali muunu munya kuviidika. Ungʼina adziviikaga dzonda idzo mu numbula. 52UYesu iikulaga umuvili nu luhalawukagudzi, akuvakeeledza uNguluvi na vaanu.
Currently Selected:
Luka 2: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
