Yakobo 4

Mwilefyage kwa Nguluvi

1Muhoodzage, imbeedzi na mabaatu umwenyo fiihuma kwiya? Ongo, si mugati mwa wudobofu weenyo uwukwiluwa mugati umwenyo pe mwilima uwuhosi? 2Mwidoboka fye musili nafyo, apo mwikoma nu kwibatwa ni giila. Mwilemwa ukwanukila fye mwisaka, apo mukwiluwa nu kutovana. Fye mwisaka musiikwanukila, pakuva musiinyilika kwa Nguluvi. 3Pe mwinyilika ifyo, musiikwanukila, pakuva mwinyilika mu wugulume uwuviifu. Mwinyilika, ukuta ifyo fye mwikwanukila muveyasihidzage mu wudobofu weenyo.

4Unyeenye ye musili vahuuvilwa#4:4 Musili vahuuvilwa Ikikelo pa kikelo, vadumuli-noolane kwe kutigila, avaanu ávamulekile uNguluvi. pa miiho ga Nguluvi! Musiidzeela ukutigila, ukuyeenda inyi we wukava nu Nguluvi? Neke lino, umuunu ye avedzaga ye iisaka ukuvedza mudzeela va nyi, iivedza mutavangwa va Nguluvi. 5Ongo, mwihoodza uWusimbe uWiimike wiilonga kiyagi hela ukutigila, “Umubepo gwa muunu gwe áviikile uNguluvi mugati umwesu, guli nu wudobofu wa giila”?#4:5 Ikiganulo ikingi kiitigila “Umubepo gwe aaviikile uNguluvi mugati umwesu, gwidoboka ukutigila, tumwendage hela.” 6Pamwinga na ulo, uNguluvi akutoongelehedza ulusungu ngita kye lúsimbiilwe mu Wusimbe uWiimike ukutigila,

“Avakwinunumula, uNguluvi akuvabeedza,

neke kangi avakwiyisa, akuvapeela ulusungu.”#Selengo 3:34

7Neke lino, mwilefyage kwa Nguluvi. USetano mumubeedzage, nave ahadza akuvanyila. 8Muhegelelage kwa Nguluvi, nave ahadza iihegelela ukwenyo. Mutanage ukulima imbiifu, unyeenye vanya ndzanangifu, kangi mumuniniilage uNguluvi ni numbula yonda, unyeenye ye muli na mahoodzo agali pavili. 9Muhuguvalage, muhugumililage nu kuvemba wiimila wa ndzanangifu dzeenyo. Uluheko lwenyo luhambukage luhugumililo, ulukeelo lwenyo luhambukage kiisi mu mahoodzo geenyo. 10Mwiyisage pa miiho ga Mutwa Nguluvi, apo nave ahadza akuviinusa.

Ulukenyelo pa kuvahiga avangi

11Vafuuwa vayangu, mutanage ukwilonga fivi. Umuunu ye akumulonga fivi umufuuwa, enewuli kumuhiga, uyo iivedza álongile fivi nu kubeda imilagililwe gya Nguluvi ukutigila, miviifu. Ngana wiiwona imilagililwe miviifu, apo uveeve usikugiinatila, nda haamu, ukwiviika ngita muhidzi pakyanya pa igyo. 12Yu Nguluvi mwene ye iiviika imilagililwe, kangi ye muhidzi, ye mwene swe ye ali nu ludali lwa kupoka nu kutipula. Lino, uveeve ve ani ye ukumuhiga umuyago?#4:12 Umuyago Uwusimbe uwungi uwa kataali wiitigila umuunu uyungi.

Ulukenyelo wiimila wa lwigiifyo

13Lino muumulikidzage wunofu unyeenye ye mwitigila, “Ineengʼuli enewuli kilaawo twihelela ku wudzenge uwu enewuli wula. Uko tuhadza tukwikala umwaka gonda, twigula nu kugudza nu kwambulila uluwumbulilo.” 14Musiidzeela idzihadza dziihumila kilaawo! Muhoodzage, uwuumi weenyo kye kiki? Wiihwananidzwa nu luuya ulwiwoneka lusika lufupi, kangi pambele lwiyagaanika! 15Kiba mukali mutigilage, “Ngana uMutwa Nguluvi akeele tuvedze vuumi, nu kulima ikiinu iki enewuli kila.” 16Neke kangi unyeenye mukwilumba wiimila wa dze mwihoodza ukutigila, muhadza mwilima. Ukwilumba ndawuli uko kuviifu. 17Lino ye avedzaga ye iidzeela inofu dze iisakulwa ukulima, neke kangi atane ukulima, umuunu uyo iilima indzanangifu.

Currently Selected:

Yakobo 4: BEZ

Highlight

Copy

Compare