Vaebulaniya 12

Ukwiga ikyoledzi kya Yesu

1Lino, pakuva túpiliimwe ni lilugu likomi lya vaanu avaawoneesiidze kye vamufuuviilwe uNguluvi, tuhedzage fyonda ifikututanidza mu lufuuwo, ni ndzanangifu idzikutungʼangʼaanila. Na yuufwe ngita umuunu ye iinyila mu ngwila iya lunyilo, tugimbage ukwigugumidza, ukuta tufike uwusililo wa dzonda dze aaviikile uNguluvi kuwutalo ukwesu. 2Tunyilage umusika pe twikangadza amiiho geesu kwa Yesu, ye akutulongodza ukumufuuwa uNguluvi na ye iikwilidza ulufuuwo lwesu ukufikila ku wusililo. Wiimila wa lukeelo pa miiho gaakwe iigugumiidze, asaaweene kiinu inyoni iya fuwa pa kipindulihidzo, lwe lwene íikalile apoono pa luginiyo ku liwoko ilya kundiyo pa kideego kya wutwa kya Nguluvi.

3Muhoodzage uYesu kye iigugumiidze ulwa valima-ndzanangifu avamubeedzaga, ukuta mutane ukufulugala nambe kufuwa inumbula.

UNguluvi akuvawunga avaana vaakwe, ukuta vamwidikage

4Umusika pe mwigimba ukudzilema indzanangifu, mwiwukage ukutigila, musinaa muhomana amagoha ukufikila pe mwikwita idanda yeenyo. 5Ongo, múseemiilwe mbandu amadzwi agakuvasungʼanidza unyeenye, ngita udaada kye akumulongela umuswamuve? Amadzwi ago giitigila,

“Muswamu-vanguave, ngana uMutwa akuwundze, upulikidzage wunofu,

kangi utanage ukufuwa inumbula pe akukukenyela.

6Pakuva uNguluvi akumuwundza umuunu ye avedzaga ye akumwenda,

kangi akumupedza yula ye akumwidikila ukutigila, muswamuve.”#Selengo 3:11-12

7Lino mwigugumidzage umusika uNguluvi pe akuvawundza nu kumwidika. Akuvalimila ewo, pakuva unyeenye nye vaana vaakwe. Umwana yuki ye asiiwundzwa nu daadiye? 8UNguluvi akuvawundza avaana vaakwe vonda ukumwidika. Ngana asikuvawundza, apo mudzeelage ukutigila, musili migendela pa luvandza nambe vaana vaakwe va ndakyene. 9Pamwinga na idzo, uneefwe twavaginiyaga avadadiisu va mwe naanyi avatuwundzaga ukuviidika. Ongo, tusiivagila hiilo ukuwiidika uwutawulilwe wa Nguluvi uDadiisu ye ali kukyanya, ukuta tuvedzage nu wuumi uwa mbeepali? 10Avadadiisu va pe naanyi vakutuwundza ukuviidika mu musika mudebe pe viiwona lwinogela. Neke kangi uNguluvi akutuwundza wiimila weesu, ukuta tuhange nave ku wiimike waakwe. 11Sikwali umuunu ye iikeela pe iiwundzwa, ukuta iidikage, nda haamu, iihuguvala. Neke kangi pambele ku vala ávawundziidzwe nu kupulikidza, lukuvaleetela uwugolofu nu lutengamaso mu miikalile gyawo.

12Neke lino, mukangadzage amawoko geenyo ágalelewiike na mafugamilo geenyo amatenda.#Isaya 35:3 13“Mugendage mu ngʼaasi ídzigolwike,”#Selengo 4:26 ukuta avanya wulemwa mu lufuuwo lwawo vatanage ukuguwa, nda haamu, vakangalage.

14Mugimbage ukwikalasa na vaanu vonda mu lutengamaso. Kangi muvedzage viimike, pakuva sikwali ye alamuwona uNguluvi kitavedza mwimike. 15Mwiyangalilage ukutigila, atanage ukuvedza pwali umuunu ye asikuluginiya ulusungu lwa Nguluvi nu kulwambudza. Kangi mwiyangalilage ukutigila, atanage ukuvedza pwali umuunu ye iikula ngita midela imikali. Uyu akuvaheniya nu kuvalamya avaanu voloofu. 16Kangi mwiyangalilage ukutigila, atanage ukuvedza pwali umugoni, enewuli ye asikumuginiya uNguluvi ngita uEsawo. Uyo aagudziidze ilipwela lyakwe ilya wuvele wiimila wa kaliyo kamwinga hela.#Wutalilo 25:29-34 17Pambele pe aasakaga ukwanukila ilipwela lyakwe ilya kufuunyililwa, ngita kye mwidzeela udaadiye aakaanile ukumufuunyilila. UEsawo asaafuunyiliilwe, nde luvedze aanyiliike hiilo nu kuvemba, pakuva umusika ugwa kupela gwali gúhelaniidze.#Wutalilo 27:34-35

Ikidunda ikiikoogofya ni kidunda kya lukeelo

18Unyeenye musinaa mufika pa kidunda ikya kupamya, ikiikwaka umooto, kangi íkigubiikwe ni kiisi, ilyosi ni kipulavaana, ngita aVaisilaheli pe vaafikile pa kidunda Sinayi.#12:18 Kidunda Sinayi Umusimbi iilekeengʼasa ulwiteepulo ulwa vaanu nu Nguluvi wugendela wa lufingo ululovela ulwaviikiilwe pa kidunda Sinayi, Kuhega 19–20, nu lwiteepulo wugendela wa lufingo ulupiya. 19Kangi musinaa mufika apoono aVaisilaheli pe vaapuliike isawuti dza lukwalimba, ni lidzwi likomi lya Nguluvi iliikoogofya.#Kuhega 19:16 Avakuhwesu pe vaapuliike, vamugongoolile uMose ukutigila, uNguluvi atane ukulonga navo kangi.#Kuhega 20:18-19 20Vaalongile ewo, pakuva uNguluvi aali álagiidze ukutigila, “Nde fivedze ifingʼooko enewuli umuunu ye iipamya ikidunda iki, iivagila ukutowa na maganga ukufikila pe iifuwa.”#Kuhega 19:12-13 Pe vaapuliike ululagi ulo, viibiitwe hiilo ni kitulo. 21Dzonda idzo idzaahumiye, dzoogwifye hiilo, nayu Mose nave iitigilaga, “Ndiikoogopa nu kuhilila mbandu.”#Lwiwuko 9:19

22Nda haamu, unyeenye múfikile pa kidunda Sayuni, pa wudzenge wa Yelusalemu iya kukyanya. Uwo, we wudzenge wa Nguluvi ye ali muumi, kangi uko, kuli vanyamwandza mbilima mbilima ávalundiine mu lukeelo. 23Unyeenye múfikile pa lukombeso#12:23 Lukombeso Lole Ulukombeso ku Figanulo. lwa vaanu ve akuvakemeela uNguluvi ukutigila, avaana vaakwe vavele, amataawa gaawo gásimbiilwe kukyanya. Múfikile pa miiho ga Nguluvi umuhidzi va vaanu vonda. Múfikile kukyanya kwe koovali avaanu avagolofu, ve ávakwiliidze uNguluvi. 24Kangi múfikile kwa Yesu ye iiteepudza avaanu nu Nguluvi mu lufingo ulupya. Múfikile ku danda ya Yesu iyiitiike pa kipindulihidzo, iyiileeta ulufuunyo hiilo ukulutila idanda ya Hebeli, iyiitiike nayo.#Wutalilo 4:10

25Mwiyangalilage, mumupulikidzage uNguluvi pe iilonga. Avakuhwesu vasaasugile ulupedzo#Vaebulaniya 3:16-18 pe vaakaanile ukumupulikidza uNguluvi ye avawungile pe naanyi apa. Na yuufwe ndakyene, tusilaasuga ukupedzwa ngana twikaana ukumupulikidza uNguluvi ye akutuwunga ukuhuma kukyanya. 26Umusika ugo uNguluvi pe iilonga,#Vaebulaniya 12:19 ilidzwi lyakwe lyatendiimye inyi. Neke kangi lino, áhuuviidze ukutigila, “Ndihadza ndiitendemya inyi kangi, si nyi yeene hela, nda haamu, na kukyanya nako.”#Hagayi 2:6 27Ilidzwi ilyo “kangi,” liiwoneesa ukutigila, ifiinu fyonda ifyagaviilwe mu lidugulu, fihadza fiitendemywa nu kuhedzwa, ukuta fisigale fila ifisiitendemywa.

28Neke lino, tumuhongedzage uNguluvi pa kutupeela uwutwa uwusiitendemywa. Apo twifuunyage wugendela wa kumukeeledza, mu lwiyiso nu luginiyo. 29Pakuva uNguluvi veesu ali ngita mooto ugwinyaanya fyonda!#Lwiwuko 4:24

Currently Selected:

Vaebulaniya 12: BEZ

Highlight

Copy

Compare