Vaebulaniya 1

UNguluvi aalongile wugendela mwa Muswamuve

1Pakataali uNguluvi aalongaga na vakuhwesu wugendela wa vavidzi. Aalimaga ewo nyakoloofu, kangi mu ngʼaasi idzili poloofu. 2Neke kangi ifigono fya wusililo ifi, uNguluvi álongile naafwe wugendela mwa Muswamuve. Wugendela mwa Muswamuve uyo, uNguluvi aagavile ikyanya ni nyi, neke amwimikage, ukuta ahaale ifiinu fyonda. 3UMuswamuve uyo, iingʼalavadika indolo dza Nguluvi, kangi iiwoneesa kye agenda uNguluvi. Iihula ifiinu fyonda figinage ukuvedza ngita kye figenda wugendela wa lidzwi lyakwe ilinya ngufu. Nave pe aaviye íitawuwe wusembe wa kuvavaladza avaanu ukuhuma mu ndzanangifu dzaawo, iihelelaga kukyanya, akwikalaga apoono pa luginiyo ku liwoko ilya kundiyo ilya Nguluvi uMukomi uko kukyanya.#Ndzimbililo 110:1

UYesu mukomi ukulutila avanyamwandza

4UNguluvi amuviikile uMuswamuve kuvedza mukomi ukulutila avanyamwandza, ngita kye amupeeliye ilitaawa ilikomi ukulutila ilya vanyamwandza. 5UNguluvi asinaa amulongelaga umunyamwandza ye avedzaga amadzwi ge amulongiye uMuswamuve ukutigila, “Uveeve uli Muswamu-vangu, ineengʼuli ndívedzile Daado.”#Ndzimbililo 2:7 Kangi uNguluvi asaalongile ulwa munyamwandza ye avedzaga pe aatigiye, “Ndilaavedza Daadiye, na yumwene alaavedza Muswamu-vangu.”#2 Samweli 7:14 6Kangi uNguluvi pe aaviye ámutumile uMuswamuve umuvele pe naanyi, aalongile ukutigila, “Avanyamwandza vonda va Nguluvi, viifuunyage kwa Muswamuve uyo.”#Ndzimbililo 97:7 7Iilonga ulwa vanyamwandza ukutigila, “Umwene akuvahambusa avanyamwandza vaakwe vavedzage mepo,#1:7 Mepo Ikiganulo ikingi kiitigila mibepo. na vatovela-ligendwa vaakwe navo akuvahambusa vavedzage ndzenge dza mooto.”#Ndzimbililo 104:4 8Neke kangi ulwa Muswamuve aatigiye,

“Uveeve Nguluvi ulaatema mbeepali na mbeepali,

nu wutemi wa wutwa waako wulaavedza wugolofu.

9Uveeve wiikeela uwugolofu,

nu kuwusuula uwuhosi.

Lwe lwene uNguluvi vaako,

ákuviikile ukuvedza mukomi,

ukulutila avayago vonda

wugendela wa kukubaka amafuta amanofu.”#Ndzimbililo 45:6-7

10Kangi uNguluvi akumulongela uMuswamuve iitigila,

“Uveeve Mutwa pa wutalilo waagavile inyi,

kangi waagavile ikyanya na mawoko gaako.

11Napo kangi, ifya kukyanya ni fya pe naanyi filaatipulwa,

filaasakala ngita mwenda, neke kangi uveeve wiisigala mbeepali.

12Uveeve ulafivilasa-vilasa ifiinu ifyo ngita mwingila,

filaadzuuka ngita mwenda mulovela.

Neke kangi uveeve usiihambuka nambi,

nambe myaka gyako gisiisila.”#Ndzimbililo 102:25-27

13UNguluvi asinaa amulongelaga nambe umunyamwandza ye avedzaga ukutigila, “Wiikale ulubali lwangu ulwa kundiyo,#1:13 Wiikale ulubali lwangu ulwa kundiyo Kwe kutigila, uYesu iitemasa nu Nguluvi. ukufikila pe ndiivedza ndívadelwidze avatavangwa vaako nu kuvaviika paanyi pa ndzayo dzaako.”#Ndzimbililo 110:1 14Avanyamwandza ve va ani? Gye mibepo igikumutovela iligendwa uNguluvi, nave akugituma givatovelage iligendwa avaanu avalaapokwa.

Currently Selected:

Vaebulaniya 1: BEZ

Highlight

Copy

Compare