Vagalatya 2

UPawulo iikwidikwa na vatume

1Pe gyaviye gíhelaniidze imyaka ginyikyumi ni gitayi (14), ndiiheleengʼasaga kangi nu muyangu uBalanaba ku Yelusalemu.#Malimo ga Vatume 15:2 Ndikumunyamulaga nayu muyiisu uTito aheleengʼase naafwe. 2Umusika ugo ndaaheliye, pakuva uNguluvi aambilatuliye ukutigila, ndihelele. Ndavaweene avatume veene ávadzeelaniike ukutigila, valongodzi va lukombeso uko. Apo ndikuvalongelaga iMola iNofu ngita kye ndikuvadalikila avaanu avasili Vayahudi. Ndaasakaga ndidzeele ukutigila, víidiingʼiine naane ukuta amalimo ga kuvadalikila avasili Vayahudi ge ndiilima, kangi na ge ndaalimaga, gatane ukuvedza gaahela. 3Viidiingʼiine naane kangi mu lukaani lwa wusinge,#Malimo ga Vatume 15:1-21 nayu Tito uyo ye asili Muyahudi ye aali pwali pamwinga naane, asaagagiiliidzwe ukusingwa.#2:3 Ukusingwa Lole Uwusinge ku Figanulo. 4Ulukaani lwa wusinge ulo, lwahumiye pakuva aVayahudi wuli avaali vafuuwa va wudesi viiyingiidze kinyele umwesu. AVayahudi avo, vaasakaga ukupodza uwuvangwa weesu we tuli nawo mwa Kilisiti Yesu, nu kutuhambusa kuvedza vasutu va migendzehedze gyawo. 5Sitwidiingʼiine navo nambe padebe, ukuta muginage ukwikala mu ndakyene ya Mola iNofu.

6Ndakyene avo aviidzeeleka ukutigila valongodzi, vasaali ni miya idza kuundongela. Nu kwangu uneene, sindiiwona kiinu ngita kye vagenda, pakuva uNguluvi asiiwona luunu idza mwivala. 7Nda haamu, valukaguwe ukutigila, uNguluvi aanyaaguwe ukuvadalikila avasili Vayahudi iMola iNofu, ngita uPetulo kye aali áhaaguliilwe ukuvadalikila aVayahudi. 8Pakuva uNguluvi aalimile amalimo mugati umwesu twivonda, ukuta tuvedze vatume, uPetulo ku Vayahudi, uneene ku vaanu avasili Vayahudi. 9Avatume avo, uYakobo, uKefwa#2:9 UKefwa Wiimbe uwooledzi ku Vagalatya 1:18. nu Yohana, avaadzeelaniike ukutigila valongodzi, pe valukaguwe ukutigila, uNguluvi mu lusungu lwakwe, áameeliye amalimo ga mutume, vakutwibataga amawoko uneene nu Balanaba, ukuwoneesa vátwidikiye. Apo twidiingʼiine tuhelelage kulima amalimo ku vaanu avasili Vayahudi, aveene vahelelage ku Vayahudi. 10Lwe vatunyiliike lwe lumwinga hela, ulwa kuviiwuka ukuvatanga avahangala, lwe lwene lwe ndiipifukilaga ukululima.

UPawulo akumukenyela uPetulo

11Pambele uKefwa aafikile ku lukombeso lwa wudzenge wa Andyokya, nu musika ugo ndamukaaniidze pa weelu, pakuva aanguwe. 12Ndaalimile ewo, pakuva uPetulo aaliyaga na vafuuwa avasili Vayahudi, neke kangi abihilage nu kwiyefya na avo, pe vaafikile aVayahudi vamwinga avaatumiilwe nu Yakobo. Avoogwipe aVayahudi avaasimiilidzaga ukutigila, avafuuwa vonda vasingwage. 13AVayahudi avafuuwa avangi vamuniniiliye uPetulo mu wukedusi waakwe, ukufikila pe vakumuheniya uBalanaba nave. 14Nda haamu, pe ndaaweene vasiininiila indakyene ya Mola iNofu, ndikumulongelaga uKefwa pa weelu ukutigila, “Uveeve uli Muyahudi, neke kangi wiilima ngita muunu ye asili Muyahudi. Lino, kye kiki ukuvagagiilidza avafuuwa avasili Vayahudi ukuniniila imivedzehedze gya Vayahudi?”

Avaanu vonda viipokwa wugendela wa lufuuwo

15Uneefwe tuli Vayahudi va kuholwa,#2:15 Vayahudi va kuholwa Ndeeni ewo, aVayahudi viiwonaga vagolofu wiimila wa kuvedza ni milagililwe gya Mose, na vaanu avasili Vayahudi vanya ndzanangifu wiimila wa kuvedza vangaya milagililwe. kangi lwilongwa ukutigila, tusili vanya ndzanangifu ngita avasili Vayahudi. 16Napo kangi, twidzeela ukutigila, uNguluvi asikumwidika umuunu ukuvedza mugolofu, wiimila wa kwinatila imilagililwe gya Mose.#2:16 Imilagililwe gya Mose Lole ku Figanulo. Nda haamu, akumwidika umuunu ukuvedza mugolofu pa miiho gaakwe, ye akumufuuwa uYesu Kilisiti. Ndeeni, uneefwe, pamwinga na avasili Vayahudi, túmufuuviilwe uKilisiti Yesu ukuta twidikilwe ukuvedza vagolofu, wugendela wa kumufuuwa umwene, si wugendela wa kwinatila imilagililwe, pakuva sikwali umuunu ye ahadza iikwidikilwa ukuvedza mugolofu pa miiho ga Nguluvi, wugendela wa kwinatila imilagililwe.#Ndzimbililo 143:2

17Neke kangi pe tukumufuuwa uKilisiti wiimila wa kwidikilwa ukuvedza vagolofu, lwiwoneka ukutigila, uneefwe Vayahudi pamwinga na avasili Vayahudi, tuli vanya ndzanangifu. Ongo, kwe kutigila, uKilisiti akutuhulila ukulima indzanangifu? Nambi naludoodo! 18Ngana ndiipilukila ukwinatila imilagililwe gya Mose gye ndagilekile,#2:18 Ikikelo pa kikelo, Wone ndidzenge kangi kila kye ndaamamuwe. apo ndiikoolela ukutigila, ndiidzumba imilagililwe igyo. 19Kungaya kumukeeledza uNguluvi wugendela wa milagililwe igyo, lwe lwene ndaafuwe ukuhuma ukugiinatila, ukuta ndiikalage ndikumukeeledza uNguluvi. 20Uneene ndítoveleliilwe pamwinga nu Kilisiti, na liilino ndili muumi, neke kangi siye neene, nda haamu, ye Kilisiti ye ali muumi mugati umwangu. Imiikalile gye ndikwikala lino, ndikwikala pa kumufuuwa uMuswamuve va Nguluvi ye aandzendile, akuwutawulaga uwuumi waakwe ukuumoka. 21UNguluvi akutwidikila ukuvedza vagolofu wiimila wa lusungu lwakwe. Sindiilemwa ukulukaana, pakuva ngana umuunu ali nu ludali ulwa kwidikilwa wugendela wa kwinatila imilagililwe gya Mose, apo uKilisiti aafuwe lwahela!

Currently Selected:

Vagalatya 2: BEZ

Highlight

Copy

Compare