Malimo ga Vatume 15
15
Ululundano ku Yelusalemu
1Umusika uPawulo nu Balanaba pe vaali ku Andyokya, aVayahudi wuli ukuhuma ku Yudeya vaafikile ku Andyokya. Viivangaga ukuvawulanidza avafuuwa vayaawo avasili Vayahudi ukutigila, “Ngana musinaa musingwa ngita kye gigenda imilagililwe gye atulekiye uMose, mwilemwa ukupokwa.” 2Neke baaho uPawulo nu Balanaba viibeedzage hiilo na Vayahudi avo. Pambele ulukombeso lwa ku Andyokya, lwikwidiingʼanaga ukutigila uPawulo, uBalanaba na vafuuwa vakeefu vahelele ku Yelusalemu, ukuta vakapodze ulukaani ulo ku vatume na vavaha va lukombeso lwa uko. 3Neke ulukombeso lwa Andyokya luvatumage. UPawulo na vayagwe viihegaga, viihelanidzaga mu nyi ya Foyinike ni Samalya vakuvalongela avaanu imola, ndawuli avasili Vayahudi kye vakaafuuviilwe nu kumupitukila uYesu. Imola idzo dzikuvakeeledzaga mbandu avafuuwa vayaawo.
4Vaaviye váfikile ku Yelusalemu, vaanukiilwe na vafuuwa, avatume na vavaha va lukombeso. UPawulo na vayagwe vakuvagotolelaga dzonda dze akaalimile uNguluvi wugendela waawo. 5Neke kangi avafuuwa vamwinga va kiwungu kya Vafwalisayo#15:5 Vafwalisayo Lole AVafwalisayo ku Figanulo. viimage, vatigilage, “Nde luvedze wuli, avo avasili Vayahudi viisakulwa vasingwage nu kulongelwa ukutigila, vakolaatidzage imilagililwe gyonda gya Mose.”
6Avatume na vavaha va lukombeso avo, viikemeelaga ululundano lwa kukomandza, ukuta valulole wunofu ulukaani ulo. 7Avaanu avo pe vaaviye válongiine mu musika mutaali, uPetulo iikwimaga, akuvalongelaga iitigilaga, “Nye vayanguanye! Unyeenye mwidzeela ukutigila, pakataali uNguluvi aanyaaguwe ukuhuma umwenyo, ndidalikage iMola iNofu ku vaanu avasili Vayahudi, ukuta vayipulike nu kuyifuuwa. 8UNguluvi ye iidzeela dzonda idzili mu numbula dza vaanu, áwoneesiidze ukutigila, áviidikiye avasili Vayahudi pa kuvapeela uMubepo uMwimike, ngita kye átupeeliye na yuufwe. 9UNguluvi asaaviikile uluhaagu luluvedzaga ukwesu na veene, pakuva avavaliidze navo inumbula dzaawo wiimila wa lufuuwo. 10Lino suwe! Kye kiki mukumugemya uNguluvi, pa kuvatwika avanyigendwa ikitegulo iki kya kuniniila imilagililwe, kye vaalemiilwe ukunyamula avakuhwesu na yuufwe kítulemile? 11Neke kangi uneefwe twifuuwa ukutigila, wugendela wa lusungu lwa Mutwa veesu uYesu, twipokwa ngita kye viipokwa aveene.”
12Neke avaanu vonda avaalundiine apo vadzikage, vamupulikidzage uPawulo nu Balanaba, pe vakuvalongela ulwa fimanyilo fya filole ni fidzumo fyoloofu, fye aahuufyaga uNguluvi ku avasili Vayahudi kugendela mwa veene. 13Vaaviye vámalile ukulonga, uYakobo iihigaga iitigilaga, “Nye vayangu! Muumulikidze! 14USimoni#15:14 USimoni UYesu amupeeliye ilitaawa ilingi ukutigila, Petulo. átulongiye ndawuli uNguluvi kye avagudilaga avaanu avasili Vayahudi pa kutala, mu avo akuvahaagulaga avangi vavedzage vaanu vaakwe. 15Amadzwi ago giikwidikwa, ngita kye gaasimbiilwe mu fitabu fya vavidzi ukutigila,
16‘UMutwa Nguluvi aalongile ukutigila,
“Pe galaavedza gáhelaniidze ago, ndihadza ndiipiluka,
nu kudzenga kangi inyumba ya Dawudi íyiguwe.
Ndiidzenga kangi ilihaame,
nu kuyiimya.
17Apo avaanu avangi vonda,
avaanu va nyi dzingi ve ndikavakemeeliye vavedzage vangu,
valamutemula uMutwa Nguluvi.”
Iilonga ewo uMutwa ye aalimile
18idzi dzaadzeelaniike ukuhuma kataali.’#Amosi 9:11-12 ”
19UYakobo iiginaga ukulonga ukutigila, “Neke lino, ulwiwonelo lwangu kwe kutigila, avasili Vayahudi aviipituka ukuvedza vaanu va Nguluvi, tutane ukuvafwahidza. 20Nda haamu, tuvasimbile ihaate iya kuvalongela ukutigila, viiyefyage nu wugoni, vatanage ukuliya ifyakuliya fye váteekiye ku fihwananguluvi, kangi vatanage ukuliya inyama ya fingʼooko fye vábudile, nambe kuliya idaaho.#Valevi 17:13-14 21Viinatilage imilagililwe igyo, pakuva mu ndzenge dzonda ukuvangila kataali, aVayahudi vaadalikaga imilagililwe gya Mose, nu kwimba mu nyolanilo ifigono fyonda ifya Sabato.”
Ihaate ku vafuuwa avasili Vayahudi
22Neke avatume, avavaha nu lukombeso londa lwa Yelusalemu, lwidiingʼanage ukutigila, vavahaagule vakeefu mu vayaawo, avanya kuheleengʼasa nu Pawulo nu Balanaba ku Andyokya. Vakuvahaagulaga avaanu vavili, yumwinga aali Yuda, ilitaawa ilingi Balisaba, uyungi aali ye Sila, avaali valongodzi va lukombeso. 23Vakuvatumaga ni haate íyisimbiilwe ukutigila,
“Uneefwe ye tuli vatume na vavaha va lukombeso, kangi vafuuwa vayeenyo, tukuvahungila nye vayiisu ye musili Vayahudi, ye mugenda ku wudzenge wa Andyokya, inyi ya Silya, ni ya Kilikya. 24Túpuliike ukutigila, avayiisu wuli ukuhuma ukwesu, vávalongiye imola dza kuvafwahidza nu kudzihuguvika inumbula dzeenyo. Avaanu avo sitwavatumile uneefwe. 25Neke lino, túpuliingʼiine mutima gumwinga ukutigila, tuvahaagule avaanu nu kuvatuma ukwenyo, pamwinga na vende veesu uBalanaba nu Pawulo. 26Avo viitawuwe mbandu uwuumi waawo ukumulimila uMutwa veesu uYesu Kilisiti, nambe nde kuvedzage kufuwa wiimila waakwe.
27Neke lino, tukuvatuma ukwenyo uYuda nu Sila, ve veene avanya kuvalongela dze túvasimbiye unyeenye. 28Lúmukeeliidze uMubepo uMwimike na yuufwe ndeeni, tutane ukuvatwika ikitegulo ikingi, nda haamu, imilagililwe igi gye mwisakulwa ukugininiila: 29mutanage ukuliya ifiliyo fye váteekiye ku fihwananguluvi, mutanage ukuliya idaaho, nambe nyama ya fingʼooko fye vábudile, mwiyefyage nu wugoni. Ngana mukwiyefya mu idzo, apo mwilima wunofu. Twitaangʼanaga.”
30UPawulo na vayagwe pe vaaviye víilagile ku vatume na vavaha, viihelelaga ku Andyokya. Viilundasaga ikiwungu kyonda ikya vafuuwa uko, vakuvapeelaga ihaate iyo. 31Pe vaaviye víimbile, navo yikuvakeeledzaga umutima. 32UYuda nu Sila avaali vavidzi, navo vakuvalongelaga avafuuwa vayaawo imola ndzoloofu idza kuvanyaamadza nu kuvakangadza. 33Pe viikalile uko musika, avafuuwa va ku Andyokya vakuvatawulaga vahelelage mu lutengamaso, neke vapilukage ku avo ve vavatumile. [34Neke kangi uSila awonage lunofu ukwikala kuuko.]#15:34 Amadzwi aga simoogali mu wusimbe uwungi uwa kataali. 35UPawulo nu Balanaba viisigalaga ku Andyokya, avo na vaanu avangi voloofu, vaawulanidzaga nu kudalika ilidzwi lya Mutwa Yesu.
UPawulo nu Balanaba viilekana
36Fyaviye fíhelaniidze figono fikeefu wuli, uPawulo akumulongelaga uBalanaba iitigilaga, “Tupiluke ku ndzenge uko, kwe tukiidalikaga ilidzwi lya Mutwa Yesu, ukuta tukalole kye viikwendelela avafuuwa vayiisu.” 37UBalanaba aasakaga vamunyamule nayu Yohana Maluko. 38Neke kangi uPawulo asaaweene lunofu ukuheleengʼasa nu Yohana Maluko, pakuva uyo avalekile ku Pamufilya, kangi asaaginile ukulimasa amalimo navo. 39UPawulo nu Balanaba vakwibeedzaga hiilo ukufikila pe viilekana. UBalanaba akumutegulaga uYohana Maluko, viihovaga imeli, viiheleengʼasaga ku Kipulo. 40UPawulo akumuhaagulaga uSila, avafuuwa vayaawo vakuvalapangililaga ulusungu lwa Mutwa Yesu, neke ahegasage nave. 41Aahelanidzaga mu migoola gya Silya ni gya Kilikya, iikangadza ingʼombeso.
Currently Selected:
Malimo ga Vatume 15: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
