2 Vakolindo 5
5
UNguluvi alatupeela imivili imipiya
1Imivili gyesu gili ngita fitinga fye tukwikala pe naanyi. Neke kangi twidzeela ukutigila, pe filaanangika, uNguluvi alatupeela inyumba dza mbeepali kukyanya, isidziidzengwa na vaanu. 2Lwe lwene pe naanyi apa twivembela mu numbula, pakuva tuli nu wusuukwa wa kupeelwa uwiikalo weesu kukyanya, kwe kutigila, tulaafwalidzwa imivili imipiya. 3Pe túfwaliidzwe ewo, tusilaawoneka tuli wufuula. 4Umusika pe tupila ni fitinga ifya musika mudebe, twipumuka nu kuhoyamidzwa. Si kutigila twisaka ukufuula imivili igi igiifuwa, nda haamu, twisaka ukufwalidzwa imivili igisiifuwa, ukuta imivili igi igiifuwa gimilwe ni igisiifuwa. 5UNguluvi ye mwene ye átugelanihidziye ulo, átupeeliye uMubepo vaakwe, ukuta tulukagulage ukutigila, ndakyene ndeeni kye lulaavedza.
6Wiimila wa idzo, umusika gonda tuli nu wukangafu, nde luvedze twidzeela ukutigila, umusika pe tuli ni mivili igi, tuli kutaali nu Mutwa Yesu. 7Pakuva twinana wugendela wa lufuuwo, si wugendela wa fye tukufiwona. 8Ndakyene tuli nu wukangafu, kangi twiwona kiba ngana tukali tugileke imivili igi, tuhelele kwikala nu Mutwa. 9Ngana tukwikala mu muvili, enewuli ukuleka ukwikala nu Mutwa, uwugulume weesu we wa kumukeeledza uMutwa. 10Pakuva twivonda tuli vanya kwima pawutalo pa kideego kya luhigo ikya Kilisiti nu kuhigwa, ukuta nayula aanukile kye iivagila wiimila wa malimo gaakwe manofu, enewuli maviifu ge aalimaga pe aali pe naanyi.
Uwulimila-vangi wa kuteepula
11Lino, wiimila wa luhigo ulo, twidzeela ukutigila, twivagila ukumoogopa uMutwa, lwe lwene twigimba ukuvakwega avaanu avangi vamufuuwage. UNguluvi átudzeeliye wunofu kye tugenda, na yuune ndiihuuvila ukutigila, na yuunye mwidzeela ewo mu lwikagulo lwenyo. 12Tulema ukwidzumila kangi ukwenyo, nda haamu, twisaka ukuvapeela umusika gwa kwilumba wiimila weesu. Neke lino, muhadza mwivedza na madzwi ga kuvapiluhidza avo avakwiginiya mu idzo idziiwoneka pa weelu, ukulutila idzo idzigenda mu numbula. 13Ngana twiwoneka tuli vanya madzimu, tuli ewo wiimila wa Nguluvi, ngana twiwoneka tuli nu luhala lunofu, apo tuli ewo wiimila weenyo. 14Pakuva uwende wa Kilisiti wukutusuungʼilidza kuwutalo, kangi twidzeela ukutigila, umuunu yumwinga aafuwe wiimila wa vaanu vonda, mu ulo avaanu vonda vaafuwe. 15Kangi aafuwe wiimila wa vaanu vonda, ukuta vonda avuumi vatanage ukuvedza vuumi wiimila waawo vaveene, nda haamu, wiimila wa mwene ye aafuwe nu kudzulubuswa wiimila waawo.
16Lino, ukuvangila umusika ugu, tusimukaguwe umuunu ngita kye viilima avaanu va mwe naanyi. Nde luvedze umusika wuli twamukaguwe uKilisiti ewo, neke kangi lino tusimukaguwe ewo. 17Umuunu ye avedzaga ye iivedza mugati mwa Kilisiti, iivedza ágaviilwe wupiya, idza kataali dzíhelaniidze, lino uwumuunu waakwe wupiya! 18Dzonda idzo dziihuma kwa Nguluvi ye ámutumile uKilisiti atuteepule uneefwe nu mwene. Na yuufwe átupeeliye uwulimila-vangi wa kuvateepula avaanu nu mwene. 19Kwe kutigila wugendela mwa Kilisiti, uNguluvi akuvateepula avaanu vonda nu mwene, kingaya kuvavalilila indzanangifu dzaawo. Kangi uNguluvi átupeeliye amalimo ga kuvalongela avaanu imola ya lwiteepulo.
20Neke lino, uneefwe tukumooleka uKilisiti, kangi wugendela weesu, uNguluvi akuvagongoola avaanu viiteepule nu mwene. Lwe lwene tukuvagongoola kwimila mwa Kilisiti ukutigila, mwiteepule nu Nguluvi. 21UNguluvi ámuhambwise uKilisiti, umungaya ndzanangifu, ukuvedza munya ndzanangifu wiimila weesu, ukuta mwa Kilisiti uyo, tuhangage mu wugolofu wa Nguluvi.
Currently Selected:
2 Vakolindo 5: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
