1 Vakolindo 10
10
Mutanage ukumuviifya uNguluvi
1Vafuuwa vayanguanye, ndiisaka muludzeelage ukutigila, avakuhwesu pe vaahelanidzaga mu lungʼalangʼala, vonda vaalongodzwaga ni lifunde,#Kuhega 13:21-22 kangi vonda vaahelaniidze pagatinagati ya nyandza. 2Vonda pe vaalongwidzwe ni lifunde ilyo, nu kuhelanidza pagatinagati ya nyandza iyo, vaali ngita vádzabiikwe kuvedza vaniniilidzi va Mose.#Kuhega 14:22-29 3Vonda vaaliye ikyakuliya kiikila ikyahumile kukyanya.#Kuhega 16:4, 31, 35 4Kangi vonda vaanyuwe ululenga luulula ukuhuma mu lutalaawe,#Kuhega 17:1-7; Mbalilo 20:2-13 lwe avapeeliye uNguluvi wugendela wa kilole. Ulutalaawe ulo, aali ye Kilisiti ye aagendaga pamwinga navo. 5Napo kangi, voloofu mu avo vaalimaga idzisamukeeledzaga uNguluvi. Wiimila wa ulo, viifuwaga, imifimba gyawo giiyambalangʼanaga mu lungʼalangʼala.#Mbalilo 14:16, 29-30
6Lino, dzonda idzo dzaalimiike ukwawo wiimila wa kutuwunga, ukuta tulekage ukudoboka amalimo amaviifu ngita kye vaadobokaga aveene. 7Mutanage ukwifuunya ku fihwananguluvi ngita avangi mu avo kye vaalimaga, ngita kye lúsimbiilwe mu Wusimbe uWiimike ukutigila, “Avaanu viikalile paanyi mu kuliya nu kunyuwa, neke viimage vakine mu wudobofu wuviifu.”#Kuhega 32:6 8Kangi tutanage ukulima uwugoni ngita avangi mu avo kye vaalimaga. Neke uNguluvi avatipulage avaanu mbilima makyumi gavili ni dzidatu (23,000) mu kigono kimwinga.#Mbalilo 25:1-9 9Kangi tutanage ukumugemya uKilisiti ngita avangi mu avo kye vamugemiidze, viilumwaga na mayoka, viifuwaga.#Mbalilo 21:4-7 10Kangi mutanage ukwingʼulandza ngita avangi mu avo kye viingʼulandzaga, navo viikomwaga nu munyamwandza umutipudzi.#Mbalilo 16:41-49
11Lino dzonda idzo idzaalimiike ukwawo, dzaasimbiilwe ukuta dzivedzage fihwano fya kutuwunga uneefwe, ye tukwikala mu figono fya wusililo ifi. 12Neke lino, uyo ye akwiwona ukutigila, íimile sipi mu lufuuwo, iigelage ukuta atane ukuguwa. 13Ingemyo idzikuvaadzila, dzílingʼiine ni dzila idzikuvaadzila avaanu avangi mu figono fyonda. Neke kangi uNguluvi muhuuvilwa, nave asivaleka mugemywe ukulutila ingufu dzeenyo. Nda haamu, unyeenye pe mwigemywa, uNguluvi ahadza akuvapeela ingufu ya kwigugumidza, ni ngʼaasi ya kuhumila mu ngemyo idzo.
Ulupavilo wiimila wa Kyakuliya iKiimike
14Nye vende vanguanye! Wiimila wa ulo, mutanage ukwifuunya ku fihwananguluvi! 15Ndiilonga naanye ye muli nu luhala, muhoodzage wunofu dze ndiilonga. 16Umusika gwa Kyakuliya iKiimike, pe twinyuwa kinywelo kya lufuunyo wiimila wa kumuhongedza uNguluvi, ongo, apo tusiihanga idanda ya Kilisiti? Kangi pe twimegula umukaate nu kuliya, ongo, apo tusiihanga umuvili gwa Kilisiti? 17Pakuva umukaate guli gumwinga, uneefwe ye tuli voloofu, tuli muvili gumwinga, ndiweene uneefwe twivonda twihanga umukaate gumwinga.
18Mulolage aVaisilaheli avaahangaga ukuliya ifyakuliya fye váteekiye pa kiteekelelo. Ongo, vasaahangaga pamwinga ukwifuunya kwa Nguluvi?#Lwiwuko 14:22-27 19Lino ndiisaka ukulonga kiki? Ongo, ifyakuliya fye viiteekela ku fihwananguluvi fili nu luwumbulilo luluvedzaga? Ifihwananguluvi fiitanga kikivedzaga? 20Nambi, ndiilonga ukutigila, avangi avo avasimudzeeliye uNguluvi, vasiiteekela uwusembe kwa Nguluvi, nda haamu, viiteekela ku mibepo imiviifu. Sindiisaka muhangage ukwifuunya ku mibepo imiviifu. 21Musiisakulwa ukunywela ikinywelo kya Mutwa Yesu, ni kinywelo kya mibepo imiviifu. Kangi musiisakulwa ukuhanga ukuliya iKyakuliya iKiimike ni kyakuliya kya mibepo imiviifu. 22Twisaka ukulamusa igiila dza Nguluvi? Tuli ni ngufu ukulutila umwene?
Uwuvangwa wa vafuuwa
23Avangi umwenyo viitigila, “Ndiikwidikwa ukulima ifiinu fyonda fye ndiisaka.” Nda haamu, si fiinu fyonda ifili nu luwumbulilo. Nde luvedze mwitigila, “Ndiikwidikwa ukulima ifiinu fyonda fye ndiisaka.” Nda haamu, si fiinu fyonda ifiikangadza ulufuuwo. 24Umuunu atanage ukutemula idzikumuwumbulila yumwene, nda haamu, atemulage idzikuvawumbulila avangi.
25Muliyage inyama dzonda idziigudzwa mu magulilo kitawuudza-wuudza, ukuta mutane ukulemala mu lwikagulo lwenyo.#1 Vakolindo 8:1, 7 26Pakuva mu Wusimbe uWiimike lúsimbiilwe ukutigila, “Inyi ni ifigenda umo fyonda fya Mutwa.”#Ndzimbililo 24:1
27Umuunu ye asili mufuuwa, ngana avalaalike mu kuliya na yuunye mwídikiye ukuhelela, ifyakuliya fyonda fye ávasangiye muliyage kitawuudza-wuudza, ukuta mutane ukulemala mu lwikagulo lwenyo. 28Neke kangi, ngana umuunu avalongele ukutigila, “Ikyakuliya iki váteekiye ku minguluvi,” apo mutanage ukuliya wiimila wa muunu ye ávalongiye, nu wiimila wa lwikagulo lwenyo. 29Sindiilonga idzo wiimila wa lwikagulo lwenyo, nda haamu, wiimila wa lwikagulo lwa muunu ye ávalongiye. Kye kiki ndiwutanidze uwuvangwa wangu wiimila wa muunu uyungi ye iilemala mu lwikagulo lwakwe? 30Ngana ndikumuhongedza uNguluvi wiimila wa kyakuliya kyangu kye ndiiliya, kye kiki umuunu uyungi aandige wiimila wa kyakuliya kye ndímuhongiidze uNguluvi?
31Lino nde kuvedze kuliya, enewuli kunyuwa, enewuli ikiinu kikivedzaga kye mwilima, mulimage dzonda wiimila wa kumupeela indolo uNguluvi. 32Mutanage ukuvakuvadza aVayahudi enewuli avasili Vayahudi, nambe vafuuwa va lukombeso lwa Nguluvi. 33Mulimage ngita kye ndiilima uneene. Ndiigimba ukulima ifiinu fyonda ukuvakeeledza avaanu vonda, apo sindiisakula ukwiwumbulila, nda haamu, ukuvawumbulila avangi ukuta vaanukile uwupoki.
Currently Selected:
1 Vakolindo 10: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
