Munra ta Rom 15
15
1Wa amonina ran we maremare si nina veverag o matev mageregere noragai gate maremare; wa nipea we ge sin wia vires mun nina kel. 2Val sei amen nina ni ge sin wia lai mun i tagvanuana, tama te wia ran munia si a vilit o ima nia. 3O manigiu i Christ gate ge sin wia vires munia kel: nava tama me rave veta, O vavae vasir noragai we vasir iniko me gara ivunak.
4Ape o sava ŋaŋ me rave moai ti me rave siwo mun monina o vatvatogo, si mun o liŋe roŋo malumuaga wa o vavae varagai tape raverave ŋaŋ, nina a taur lai monina o maros nerei apena.
5Wa God, amona nane o liŋe roŋo malumuaga wa o varagai, ni vasoal mun kamiu si kamiu a nom sara tuwale valval kamiu tataga i Christ Jesus; 6o manigiu si mun o toqai tuwale wa mun o valai tuwale kamiu a log ronoga God wa i Taman i Lord inina i Jesus Christ. 7Wa o manigiu o ine tur lavlav vasgot kamiu tama i Christ mulaŋ me lav vasgot veta nina, si a ge ronoga God apena.
8Ape nau we vet si me ge i Jesus Christ sin qeteg gagapalag mona o liŋe teve vaglala ape liŋe nun non God, si a rapai o vavae ligoligog ŋaŋ mun o retamai: 9wa si o sul ŋaŋ we sea a log ronoga God ape non o magarosa; tama me rave veta si,
O manigiu o ine na te gaganag weswes muniko alo vatitne sul ŋaŋ we sea,
Wa te sur o as alo sasama.
10Wa ti vet mulaŋ wa si,
Tur masekeseke veve sul ŋaŋ, tamiu o sul anana.
11Wa mulaŋ wa si,
Tur wievavae i Lord, val sul ŋaŋ we sea,
Wa val veve sul ŋaŋ a wievavae kaloa.
12Wa mulaŋ i Isaia we vet si,
Te toga aŋaisa nagarin Jese,
Wa isei te tira raka si a riga goro o sul ŋaŋ we sea;
Wa o sul ŋaŋ te nonom apesov suria.
13Pa God, anona nane o liŋe maros nerei, ni ge ura kamiu mun o malakalaka nol wa o tamata alo we nomtup, si kamiu a ura sal alo we maros nerei mun o mana mon o Vui we Roŋo.
14Wa inau mulaŋ ratatasik, nau me nom mot veta apen kamiu, si kamiu mulaŋ we liwatvag momiu o lolowia, me ge ura veta kamiu mun o gilgilala nol, wa me mana mulaŋ si a varvatanau kel kamiu. 15Pa nau we rave mano apesov mun kamiu, ratatasik, a takelei, tama nau we ge kamiu si a lolomaran kel, mun o sogov me vasoal ma ti mun nau amon God; 16si na qeteg rowrowovag anan i Christ Jesus amaira sul ŋaŋ we sea, we gagapalag we roŋo ape lea we wia non God, si o gene oloolo tamaira sul ŋaŋ we sea a qeteg tangemarmaros, me vatapu veta alo Vui we Roŋo.
17Wa o manigiu ilone, natanok amen nau nake alo i Christ Jesus si na sotal kel nau ape gene ŋaŋ we tira apen God. 18Ape na tete nom mot mok si na vava ape gene ŋaŋ i Christ gate gagapalag qalo mun nau si a ge o sul ŋaŋ we sea neira a maŋas, alo vavae, wa alo gagapalag; 19mun o mana tape vaglala wa o vasasa ŋaŋ, mun o mana non o Vui we Roŋo; o manigiu si me qeteg raka a Jerusalem, wa me tal siwo niŋa a Ilurikon, nau me maŋasag vunvun moksa o lea we wia non Christ. 20Wa nau me la o tinegaro si na raka sage tamaine alo we maŋasag o lea we wia, gate alo masaoi me log veta nasasan Christ aia, nan nau wa taur mok naimak avune nonsei we sea o sagere ima; 21nava, tama me rave veta,
Iragai gate maŋasag tiqa mun neira ape ineia, neira te ilo mora,
Wa iragai gate roŋotag tiqa neira te lolomaran.
22Wa o manigiu o ine me pupur goro nau vagaqoqo iloke nan wa rasu lai sur kamiu. 23Pa iloke nake ape natanok me tagai alo vanua ŋaŋ iloke, wa ape nalolok me tutun o tau we qoqo veta si na rasu at sur kamiu, 24alo si nau qe taka o vanoga i Spania nau te niŋa at sur kamiu; ape nau we nom nerei si na sir vanua wa we ilo mok kamiu; wa si kamiu a tak nau at aia, si na ta mano ilo weswes lova moai kamiu.
25Pa ilokenake nau we taka mok o vanoga i Jerusalem, we gagapalag mun ra roŋo ŋaŋ. 26Apen ragai ta Makedonia wa ta Akaia me lolowia si a sargag tuwale munra masara amaira roŋo ŋaŋ a Jerusalem. 27Ape neira me lolowia matapura tamaine, wa monragai o pug avunara. Ape si o sul ŋaŋ we sea me taur pul lai amen ragai alo nor o gene ŋaŋ talo Vui, o pug mulaŋ avunara si a gagapalag mulaŋ mun neira alo gene talo visogoi ŋaŋ. 28Pa nau me ge vunvun paso ilone, wa me pul vaglala mun neira ape woai ilone, nau te qara gisraka kel, wa we mule lue amen kamiu i Spania. 29Wa nau we gilala ape nau we niŋa at sur kamiu pa we mulevag o liŋe vawia amon Christ we ura mot.
30Wa nau we tias kamiu, ratatasik, mun i Lord inina i Jesus Christ wa mun o tapeva mon o Vui, si kamiu a tataro lalaktera sara tuwale amen nau mun God ape nau; 31sin ge rowolue wasawasa nau nan ragai a Judea gate nomtup; wa si nok o liŋe gagapalag iloke mun Jerusalem ni qeteg tange marmaros munra roŋo ŋaŋ; 32si na niŋa malakalaka lai at aŋaisa sur kamiu mun o maros non God, wa si na mapsag galtag lai inau saratuwale amen kamiu. 33Wa God, anona o tamata, ni toga amen kamiu nol. Amen.
Currently Selected:
Munra ta Rom 15: MOTA
Highlight
Share
Compare
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
