Zacarías 6
6
Jam ba satil ta yilel ti chancot carreta yu'un ti ac'ob-letoe
1Jam jba jsat no'ox xtoc, laj quil ti vul ta loq'uel chanib carreta yu'un ac'ob-leto ta o'lol yu'un chib vitsetic ti xlaplun no'ox ti sc'anale. 2Ti sba carretae jochbil ta tsajal ca'etic. Ti xchibale jochbil ta ic'al ca'etic. 3Ja'uc ti yoxibale jochbil ta saquil ca'etic. Yan ti ta xchanibale jochbil ta ca'etic ti sac pojantic sba tsajale.#Zac 1.8; Ap 6.2-5.
4Xichi laj jac'be ti ánjel ti yacal ta xilo'ilaj xchi'uque: “Yojtot, ¿c'usi xa ono'ox smelol ti vi s'elan le' une?” 5Xi laj stac'bun ti ánjele: “Le'e, ja'ic ti buch'utic sbainojic ti ic' ti ta xloc' talel ta xchanjotal banomile,#Ap 7.1. ti liquemic talel ta stojol ti Dios yu'un scotol ti banomile. 6Ti carreta ti jochbil ta ic'al ca'etique, stamoj batel sbeic ta stuq'uil muc' ta jteclum ti oy ta yolon ti yolon xocon sloq'ueb c'ac'ale. Ti carreta ti jochbil ta saquil ca'etique stamoj batel sbeic ta stuq'uil muc' ta lum ti oy ta stuq'uil smaleb c'ac'ale. Ti carreta ti jochbil ta ca'etic ti sac pojantic sba tsajale stamoj batel sbeic ta stuq'uil muc' ta lum ti oy ta stuq'uil yolon ti yac'ol xocon sloq'ueb c'ac'ale.”
7Ja'uc ti carreta ti jochbil ta tsajal ca'etique, mu no'ox ta yocuc ta xa'iic ta xaniel sbejel ti banomile. Va'i un, xi albatic yu'un ti ánjele: “Xaniic sbejel ti banomile.” Ja' jech laj spas ti stuquique.
8Laj taj une, xi lic yavtaun ti ánjele: “¡Q'uelo avil, ti jvoc' ti batic ta muc' ta lum ti oy ta stuq'uil yolon ti yolon xocon sloq'ueb c'ac'ale, bat spasic ti c'u s'elan xu' yu'unic ta slamajesbel sc'ac'al yo'nton ti Dios ta stojol ti muc' ta lum taje!”
Ti Josuee ta xich' ac'bel sronail sjol
9Xi laj sc'oponun talel ti Diose: 10“Xi s'elan xatsobbe jujuti'uc sna'obilic ti buch'utic sutic xa talel ti bec'bil to ox batic ta jteclum Babiloniae, ja' ti Heldaie, ti Tobiase, xchi'uc ti Jedaiase. Mi laj taj une, ta sc'ac'alil, batan no'ox me ta sna ti Josías ti ja' xnich'on ti Sofoniase. 11Va'i un, ti c'u yepal laj ata ta tsobel ti platae, ti oroe, meltsano ta ronaetic. Ti mi chapaj une, lapbo junuc ti banquilal pale Josué ti ja' xnich'on ti Josadaque. 12Xi xavalbe ya'ie: ‘Xi ta xal ti Dios ti scotol xu' yu'une: Ti vinic ti sbiinoj Q'uelomile,#Ba q'uelo c'usi ta xal 3.8. ti ta xvul ta loq'uel ta snitilul stuque, ja' ta xcha'va'anbe xch'ulna ti Diose. 13Ta xcha'va'anbe xch'ulna ti Diose. Ta sta xtoc ti stuc no'ox cajal ta xc'ot sc'oplal jech c'u cha'al junuc ajvalil. Ta xlic chotiuc ta muc'ul chotlebal yo' ta spasvan ta mantal. Ti ta xocon ti bu chotole, ta xchoti ec ti palee. Mu'yuc c'op yu'unic ti xchibalique. 14Ja'uc ti ronaetic com ta xch'ulna ti Diose, ja' ta xc'ot ta sna'obilic ti cajal ta xc'ot sc'oplalic ti Heldaie, ti Tobiase, ti Jedaiase, xchi'uc ti Josias ti ja' xnich'on ti Sofoniase.’ ”
15Yo' ta xana'ic ti ja' tacbilun talel yu'un ti Dios ti scotol xu' yu'une, ta xc'ot ta pasel ti ta xtalic jnamal-lumetic yo' ta scolta sbaic ta xcha'meltsanel xch'ulna ti Diose. Ti va'i s'elan taje, ja' to me ta xc'ot ta pasel ti mi laj xachiquintabeic lec sc'opojel ti Dios avu'unique, mi ta xach'unbeic ti c'usi ta xale.
Currently Selected:
Zacarías 6: TZC00
Highlight
Copy
Compare
Share
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
