Miqueas 7
7
Soquem xcuxlejal ta j'ech'el ti Israele
1Mu xa ono'ox cha'belun un, co'ol xa j'elan jech c'u cha'al junuc jc'uxc'ulajel ti ta xcha'tsob ti c'usi laj xa yich' tsobele, mi ja'uc ta sta ta c'uxc'ultael ti uvae, mi ja'uc ti icuxe c'alal juteb ta yo'nton ta slo' ya'ie. 2Ja' jech ti li' ta banomile, mi ja'uc xa oy viniquetic ti oy stuq'uil snopbenal yu'unic ta stojol ti Diose.#Sal 12.1. Scotolic ja' yac'oj sjol yo'ntonic ti snopojic xa c'usi ora ta sliques ta spasel ti c'usi chopole; ta ono'ox xac'be sba spets'alic ta jujun tal. 3Ti banquilaletique xa'i sbaic ta spasel ti c'usi chopole. Ti j'opisialetique ta sujvanic ti ac'o ac'baticuc ti smotonique. Ti jchapanvanejetique toj lec ta xa'iic ti mich'ob c'abale. Ti buch'utic ich'bil ye sti'ic xa'i sbaique, ta spas ti c'usi xa xal ti yo'ntone, ti ta sbolibtasbe yo'nton ti jteclume. 4Ti c'usi lec xyal o xchi'uquique, ja' jun ch'ix te' s'elan; ti buch'u oy slequil stuq'uil yaloje, ja' xchi'il jun vots ch'ix.
Ja' no'ox un, ta xc'ot sc'ac'alil ti c'usi ora ta x'ich'bat yee, jech c'u cha'al laj scaj'albe sc'ac'alil ti jchabivanej jq'uel-osile. Va'i un, lamal ta xc'ot ta stojolic ti mu xa stac' a'yeluc ta xa'iic ti c'usi ta spasique. 5Mu me toj c'oteluc ta avo'nton ti c'usi ta slo'iltabot ti achi'iltaque; ma'uc me ti ja' apatoj o avo'nton xchi'uc ti buch'u lec xavil abaic xchi'uque. C'alal to ta stojol ti avajnile, q'uelo me aba lec ti c'u s'elan xu' ta xalo'ilaje. 6Ti querem nich'nabiletique, sc'a'epal sat ta xil ti stotique. Ti antsil-olaletique, cajal xa'i sbaic ta scontrainel ti sme'ique. Ti alibaletique, contra ta xilic ti sme'alibique. Ti yajcontraic ta jujun tale, yuts' yalal no'ox sbaic.#Mt 10.35-36; Lc 12.53.
7Ja'uc ti vu'une ta jmala ca'i c'usi ta xal ti Diose; ta jpat co'nton ta stojol ti Dios ti ja' cajcoltavaneje. Ta xa'ibun ti jc'opojel jti'inele.
Ta j'ech'el ta stsalvan ti Israele
8Cajcontra muc' ta jteclum, mu to me xamuyubaj yu'un ti laj avil ti laj jta ti jvocole. Ac'o mi liyal ta lum, ta xlic va'lucun; ac'o mi lamal vul ta jtojol ti ic'uneb ti osil banomile, yu'un ja' saquilal osil cu'un ti Diose. 9Laj jsa' jmul ta stojol ti Diose. Ja' jech xtoc un, cuch cu'un ti sc'ac'al yo'ntone, ja' to ti c'uxi ta xc'ot ta chapel yu'un ti jc'oplale, ja' to jech ta sva'an sba ta jpojel. Ti Diose ta xiyic'un batel ta saquilal osil; ta xiyac'bun quil ti c'u s'elan ta spas canale. 10Ja' jech xtoc ta xil ti cajcontra eque. Ti jech taje, lamal ta xc'ot ta sba ti xq'uexlalile. Xi ta xalolanbune: “¿Bu oy xana' ti Ajvalil ti ja' Dios avu'une?”#Sal 79.10; Jl 2.17. Avi ec une, sbalin to ta xca'i ti ta xquil ta jba ta jsat ti pech'bil ta xc'ot ta teq'uel jech c'u cha'al junuc ach'el ti oy ta bee.
11Ja' jech xtoc un, jteclum Jerusalén, ta xa xc'ot sc'ac'alil yorail ti ta xlic yich' va'anel ta ach' ti amoctaque, ti ta to xjam ech'el ti bu oy ti ats'actaque. 12Ja' no'ox un, ta xc'ot sc'ac'alil ti xi s'elan ta xc'ot ta pasel ti buyuc no'ox ta xlic talel ti avajval ta jujujote: ta xtalic ta lum Asiria, ta xtalic ta lum Egipto, ta xtalic ta lum ti oyic ta sti'il uc'um Niloe, ta xliquic talel xtoc ta lum ti oyic ta sti'il uc'um Eufratese, ta jujujot to jech nab ta xlic talel, c'alal to ta jujujot jech vitstic chlaj licuc talel. 13Ti banomile sts'ijlajan ta xcom ta scoj ti mu'yuc stuq'uilic ti jnaclejetic yu'une, ti vinaj ti ja' ta scoj ti xchopolalique.
14Chabio, tuc'ulano ti ateclumale, Cajval, ti chijetic ti ja' avu'une, ti stuquic ti oyic ta abnaltique, ti joybilic xtoc ta jun ve'ebal banomile. C'otuc ta pasel avu'un xtoc ti ic'o batel ta pulem yaxaltic ti oy ta Basane, xchi'uc ta Galaad jech c'u cha'al laj apas ta vo'nee.
15Ac'bo yilic ti c'usi ch'ayal ta xc'ot o'ntonal yu'une, jech c'u cha'al laj apas ta sc'ac'alil ti laj aloq'ues talel ta lum Egiptoe. 16Ac'o yilic xtoc ti yan muc'tiquil lumetique, ti nijluc chimluc c'oticuc ta q'uexlal ti jech cuchem yu'unic yilele. Co'oluc s'elan c'oticuc jech c'u cha'al junuc uma', jech c'u cha'al junuc jmacal-chiquin. 17Ac'o slo'ic ya'iic pucuc jech c'u cha'al ti pucujil chone jech c'u cha'al ti yan quiletel chonetique. Ac'o niclajeticuc xa loq'uel ta xi'el ta xch'enique, ti batemuc xa xch'ulelic ta xi'ele, ac'o talicuc ta atojol, Cajval, Dios cu'uncutic.
Ti Diose ta xch'aybe smul scolo' ti steclumale
18Mu'yuc xa yan jech c'u cha'al ti vo'ote, Dios, ta xach'ay ti mulil colo'ile, ta xatub ta avo'nton stoyobbail ti vi xa yepal scomelal ti ateclumale, ta xavac' ta ilel ti syail xc'uxul avo'nton ta jtojolcutique. Mu teyuc no'ox staoj yav oy o ti sc'ac'al avo'ntone. 19Yanuc to velta c'uxubajuc avo'nton ta jtojolcutic, tubo ta j'ech'el ti jtoyobbailcutique, teno batel ta snatil nab xtoc ti jmulcutique. 20Staojuc me yav ac'o ta q'uelel ti yutsil slequil avo'ntone, ti syail xc'uxul avo'nton ti laj aval ta vo'ne ta stojol ti jmolmuc'totcutic Abrahame xchi'uc ti Jacobe.#Gn 12.1-3; 17.6-8; 28.13-15; Lc 1.55,73.
Currently Selected:
Miqueas 7: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000