Ezequiel 45
45
Ti c'u yepal banomil c'otem ta yu'un ti Diose
(Ez 48.9-20)
1“C'alal ta xich' q'uelel ta yorail ti ta xich' ac'bel banomil jujuvoc' ti nitiluletique, tsots sc'oplal ch'aquic comel o'lol yoxlajunebal (12.50) kilometro ti snatile, lajuneb (10) kilometro sjamlej ti ta xc'ot ta yu'un stuc ti Diose. Seplej ti banomil taje, jsep osil ac'bil ta ventainel. 2Ti bu taje, tsots sc'oplal ch'ac xi comel o'lol yoxibal ciento (250) metro ta xchanjotal ta xtun ta sventa ti ch'ulnae, ti yich'ojuc vo'ob xcha'vinic (25) metro sjamlej yaxaltic ti polol ta joyob ta xbate. 3Ti banomil comem xa ta sventa ti Diose, ta xich' senyail yan o'lol yoxlajunebal cien (12.50) kilometro ti snatile, vo'ob (5) kilometro ti sjamleje, ti xi tsots sc'oplal ti stunele: Ta xc'ot ta yavil ch'ulna ti bu taje. 4Ti banomil taje, ta xc'ot ta sventaic ti paleetic ti buch'u ta xtunic ta xch'ulna ti Diose, ti stac' xnopajic ta tunel ta stojole. Ti bu taje, ta xc'ot ta yavil snaic. Ac'bil ta ventainel sventa ti ch'ulnae. 5Ma'uc no'ox taje, ta xich' ac'bel senyail yan banomil o'lol yoxlajunebal (12.50) kilometro ti snatile, vo'ob (5) kilometro ti sjamleje. Ta xc'ot ta yu'un ti levitaetic ti yac'oj sbaic ta tunel ta ch'ulna yo' oy slumalic ti bu xu' ta xnaquiique. 6Slajeb un, ta sventa ti jteclume, ta xich' ch'aquel o'lol yoxlajunebal (12.50) kilometro ti snatile, o'lol yoxibal (2.50) kilometro sjamlej ta sts'el ti bu ac'bil ta ventainele. Ti banomil taje, ta xc'ot ta yu'un scotol ti jteclum Israele.
Ti banomil ch'acbil com ta sventa ti ajvalile
(Ez 48.21-22)
7“Ta xich' ch'aquel comel xtoc banomil ta sventa ti ajvalile. Jsep ta xcom ta yeloval sloq'ueb c'ac'al, jsep ta xcom ta yeloval smaleb c'ac'al, ta jujujot xocon banomil ti ac'bil ta ventae, xchi'uc ti bu c'otem ta sventa ti muc' ta lum xcaltique. Ti sq'ueloj batel ta yeloval sloq'ueb c'ac'ale, xchi'uc ta jot ti smaleb c'ac'ale, co'ol snatil xocon ta xcom jech c'u cha'al laj yich'ic ch'acbel ti jujuvoc' nitiluletique. 8Ti banomil taje, ta xc'ot ta sventa jpas-mantal yu'un ti Israele yo' mu xac'be svocol jteclumal ti ajvalile. Ma'uc ta stijbe sc'oplal yosilic c'u s'elan ech'em stsaquic ti jujuvoc' nitiluletic yu'un ti Israeletique.
Ti mantal ta xich' albel ti ajvalile
9“Xi ta xcal ti vu'un Diosune: Jpas-mantal yu'un Israel, lajuc sc'oplal, pajeso abaic. Ictao xa abaic ta ilbajinvanej ta spojilanel ti c'usi oy yu'un ti yane. Tuc'uc, lecuc ta q'uelel ti c'usitic ta xapasique. Ictao xa aba ta yelc'anbel yosilic ti jteclumale. Vu'un ta xcal mantal ti Ajvalilune.
10“Ts'acal lec xatunesic ti c'usi ta yalal ta sbise, ti c'usi ta yepal ta sbise, ti c'usi ta nojesbil sts'ants'un ta sbise.#Lv 19.36. 11Sbisol ti sat ts'unobaletique mu yanuc sbisol xchi'uc ti c'usi sts'ants'une. Ti jun homer sbiinoje, yich'oj buluchvinic (220) almul, ich'biluc sc'op un. Ti c'u yepal yich'oj jun bato ti c'usi sts'ants'une, ta xloc' ta bisel lajunch'ac ti sbiinoj homere. Ti jun efa sat ts'unubile, xloc' lajunch'ac ti c'u yepal yich'oj ti jun homere.
12“Ti c'usitic chechbil ta xich' bisele, xi s'elan oye: ti yich'oj jtob (20) gerase, xloc' jun siclo, yich'oj buluchib (11) gramos ti yalale. Ti yich'oj oxvinic (60) sicloe, xloc' jun mina.
13“Xi s'elan stac' pasel c'alal ta xich' aq'uel ti matanaletique: Yich'uc pasel oxvinic (60) ta jbus co'ol yepal ti mi trigoe, mi jchop o ta trigoe, yich'uc aq'uel ti jbus une. 14Co'ol sc'oplal ti aceite x'ayan avu'unique, ta xich' pasel vo'vinic (100) ta ch'ac ti co'ol yepale, yich'uc aq'uel ti jch'ac une. 15Sc'oplal ti chije, ch'ac xi loq'uel jcot ta jujun lajunvinic (200) ti jubemic lec ti oy ta yosilal ti Israele. Ti jaytos taje, ti matanal sat ts'unubal ta xich' chiq'uele, ti c'usi ta xich' svocol ta milel ta sventa ti lajesobil o'ntonale, ti c'usi ta xich' aq'uel ta sventa stubobil ti mulile. Vu'un ta xcal mantal ti Ajvalilune.
16“Scotol jteclum ta sbain ta yaq'uel ta yoc ta sc'ob jpas-mantal yu'un Israel ti matanal taje. 17Ta sbain ta yaq'uel un, ti chon bolometic ti oy ta yoc ta sc'ob ti ta xich' chiq'uel ta sventa ti matanaletique, ti oyuc no'ox ta yoc ta sc'ob ti jchop o ta trigoe, ti ya'lel uva c'alal ta sta sc'ac'alil ti jujun ach' ue, c'alal ta sc'ac'alil ti cuxob o'ntonale, xchi'uc c'alal ta sta sc'ac'alil c'usiuc no'ox q'uinal ta spasic ti israeletique. Tsots sc'oplal yac'uc c'usi ta xich' milel ta scoj ti mulile, xchi'uc ti matanal jchop o ta trigoe, ti c'usitic ta xich' chiq'uele, xchi'uc ti c'usi ta xich' milel ta sventa ti lajesobil o'ntonale yo' jech ch'aybil ta xc'ot smul ti Israele.
Sc'oplal ti q'uin Colele
18“Xi ta xcal ti vu'un Diosune: Ta sliquebal c'ac'al yu'un ti sliqueb ue, ta xavaq'uic ta matanal jcot ch'in tot vacax mi jutebuc xchopolil yo' ta xich' mesel tusel ti ch'ulna ta scoj ti mulile. 19Ti palee ta stunes jutebuc xch'ich'el ti chon bolom laj yich' aq'uel ta milel ta scoj ti mulile. Ta sbon ta yoyal ti'naetic yu'un ti ch'ulnae, xchi'uc ta xchanjotal xchiquin ti altare. Ta sbon ta yoyal ti'naetic ti oy ta yutil amaq'ue. 20Jech ta xich' pasel xtoc ta yucubal (7) c'ac'al yu'un ti ue, ta sventa scoltael ti buch'uuc no'ox mu yaleluc laj spas laj sta ti smule, mi mu'yuc xil c'u s'elan vul ta loq'uele. Mesbil tusbil ta xc'ot ti ch'ulna unbi.
21“Ta xchanlajunebal (14) c'ac'al yu'un ti sliqueb ue, ta xaliquesic ta spasel q'uin Colel, vucub (7) c'ac'al sjalil mu'yuc yich'oj spajubtasobil#Ex 12.1-20; Nm 28.16-25. ti pan ta xave'ique. 22Ta c'ac'al taje, ti jpas-mantale ta xac' jcot ch'in tot vacax ta xich' milel ta scoj ti smul stuque, xchi'uc smul scotol ti jteclume. 23Jujun c'ac'al ti vucub (7) c'ac'al sjalil ti q'uine, ta xich' aq'uel vuc-cot ch'in tot vacax, xchi'uc vuc-cot chij, mi jutebuc xchopolil ta xich' chiq'uel ta sventa ti Diose. Ma'uc no'ox un, ti jujun c'ac'ale, ta xich' aq'uel ta matanal jcot tentsun yich'uc milel ta scoj ti mulile. 24Ti jujucot vacaxe, ti jujucot chije, ta xich' sts'actac ta matanal jtob (20) ta almul jchop o ta trigo, xchi'uc o'lol xchanibal (3.50) litro aceite.
Sq'uinal ti Lambil Axibal Yanal Te'e
25“Jech xtoc, sq'uinal ti Lambil Axibal Yanal Te'e,#Lv 23.33-36; Nm 29.12-38. ta xlic ta yo'lajunebal (15) c'ac'al yu'un ti yucubal (7) ue. Ti jpas-mantale, tsots sc'oplal ta xac' milbil matanal yu'un mulil jech c'u cha'al laj yich' pasel ech' ti vucub c'ac'ale. Co'ol yepal ta xac' ta chiq'uel chon bolometic, co'ol yepal matanal sat ts'unubal xchi'uc matanal aceite.
Currently Selected:
Ezequiel 45: TZC00
Highlight
Copy
Compare
Share
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
