Ezequiel 39

Ti Goge tsalbil ta xc'ot

1“Yojtot, c'opojan ta jventa ti contra ta xquil ti Goge: ‘Xi ta xal ti Diose: Gog, banquilal ajvalilot yu'un ti Meseque, ti Tubale, ta xcal ti contra xaquile. 2Ta c'un-c'un ta xatal cu'un ti oyot ta namal banomil ta yolon ti yolon xocon sloq'ueb c'ac'ale yo' ta xavul ta vitstic yu'un ti Israele. 3Ta ts'acal un, ta jc'as ti yalcual ayolob ti oy ta ats'et c'obe. Sbusus no'ox yalel ta lum cu'un ti sni'tac ayolob oy ta abats'i c'obe. 4Ta xvalc'uj ti lum ach'el avu'un ta vitstic yu'un Israel jmoj xchi'uc ti avajsoldadotaque, xchi'uc ti jteclumetic nabalic talel ta atojole. Ta xac'ot cu'un ta sve'el c'usi no'ox jti'oval xulemetic, jti'oval te'tical chon bolometic ti bu taje. 5Busul ta xacomic ta osiltic. Jech laj xa cal ti vu'un Diosune. Mu stselbuj ma' ti jc'ope. 6Ta jvoli ta c'oc' ya'i ma' ti Magoge, xchi'uc ti jnaclejetic ti mu'yuc c'usi sna'ic ta muc'tiquil lumetic ti oyic ta sti'il nabe. Va'i unbi, ta sna'ic vu'un ti Ajvalilune. 7Ich'biluc c'otcun ta muc' yu'un ti jteclumal Israele. Mu xcac' que jti' q'uelbil no'ox ta soquel. Ta sna'ic ti muc'tiquil lum jyanlumetique, vu'un ti Ajvalilune, ti ta xcac' ta ilel jlequil cutsilal ta stojol ti Israele. 8J'ech'el mu xch'ay ta be ti jc'ope, ta xc'ot sc'ac'alil. Ti vu'un Ajvalilune, mu lo'iluc no'ox ta xcal.’

9“Ti jnaclejetic ta jteclumetic yu'un ti Israele, ta stamic ta xchiq'uel ta c'oc' ti ep ta tos abtejebaletique, ti macobbailetique, ti yalcual syolobetique, ti sni' syolobique, ti puya'etique, ti lanzaetique. Vucub (7) jabil sjalil ti oy no'ox si'il yu'unic ti c'oq'ue. 10Laj to c'op ma' ti ta xbat sa'ic talel si' ta osiltique, ti ta xbat sbasic talel si' ta te'tique, yu'un ta xtun ta si' yu'unic scotol ti abtejebaletic taje. Ti x'uninbat ta elc'anel ec un ti c'usi ba'yel laj yu'ninic ta yelc'anele. Ti vu'un Ajvalilune, mu lo'iluc no'ox ta xcal.

Ta xich' muquel ti Goge

11“Ta yorail taje, ta jchapanbe smuquinal ta Israel ti Gog ta stenlejal Sbe Jxanviletic ta yeloval ti' nab. Ta xmac liquel, ta xc'ot ta smuquinal Gog xchi'uc scotol ti yajsoldadotac ti bu taje. Ta xac'beic sbiin Stenlejal Smuquinal yajsoldadotac Gog. 12Ta xch'ubaic ta smesel ti muc' ta lume. Vucub (7) u sjalil naca mucvanej ta spasic ti israeletique. 13Batem yo'ntonic naca mucvanej yesinojic scotol ma' ti jnaclejetique, ti stuc xa no'ox laj sta ya'iic ich'bilic ta muq'ue. Ta yorail taje, ta xcac' iluc ti jlequilal cutsilale. Ti vu'un Ajvalilune, mu lo'iluc no'ox ta xcal. 14Mi ech' ti vucub (7) u taje, ta sbainic ta sq'uelel ta xaniel sjunul muc' ta lum jvoc'uc viniquetic, ta smuquel mi oy to bu telel ti baquetic ta banomile yo' lec mesbil ta xcom ti muc' ta lume. 15Buch'u junucal yu'unic ti jvoc' taje, ti oyic ta xaniel ti muc' ta lume, ti laj yil oy bu baque, ta xac'beic senyail, smuquicuc ti jmucvanejetic ta Stenlejal smuquinal Goge xchi'uc ti yajsoldadotaque. 16(Oy jun jteclum xtoc sbiinoj Jvoc' Soldado.) Jech ch'ubabil mesbil c'otuc ec ti muc' ta lume.”

17Xi laj yalbun ti Diose: “Albo ya'i scotol ti mutetique, xchi'uc scotol ti jti'oval chonetique, taluc stsob sbaic ta sjoyobal vitstic yu'un ti Israel ta slajesel ch'ich' beq'uet ti laj jmil ta sventaique. 18Ta sti'beic sbec'tal soldadoetic. Ta sts'uts'beic xch'ich'el jpas-mantaletic ta banomil, jun to s'elan sbec'tal chij, ch'iom chij, mi jubemic tentsun, mi jubemic ch'in vacax ti oy to ox ta lum Basane. 19Ta xlic xchamel xchi'uquic ma' ti xepu' ta sti'ique. Xjovet xa ta xa'iic banomil yu'un ti ch'ich' ta xuch'ic ti laj jchapan ta sventaique. 20Laj jchapanbeic muc' ta ve'el ta sbec'tal ca'etic, ta sbec'tal jcajlejetic ta ca', ta sbec'tal soldadoetic, xchi'uc ta sbec'tal ep ta tos sts'unubal j'ac'-letoetic, yo' ta snojes sbaic bu xa c'alal xu' yu'unique. Ti vu'un Ajvalilune, mu lo'iluc no'ox ta xcal.#Ap 19.17-18.

Stamel sba liquel ti lum Israele

21“Jech ta xcac' iluc cutsilal jlequilal ta stojol scotol ti muc'tiquil lum jyanlumetique. Scotol muc'tiquil lumetic ta xil ta sba ta satic c'u s'elan laj jchapan, c'u s'elan laj jtsits. 22Ta xlic yilic Israel ti vu'un Ajvalilune, Diosun yu'unic ta yorail taje. 23Ti muc'tiquil lum jyanlumetique ta sna'ic, ta scoj smul scolo' Israel ayic ta sbajtical banomil, mu junuc sjol yo'ntonic ta jtojol. Mu'yuc laj jva'an jtec'an jba. Jq'ueloj no'ox tsaleic yu'un ti yajcontraique. Jq'uelojic mileic scotolic ta leto. 24Jech laj jpasbeic jech c'u cha'al loc' ta sa'el yu'unic ti mu'yuc stuq'uil ti sjol yo'ntonique, ti stoyobbailique. Laj jvalopatinic comel.

25“Jech o xal xi ta xcal ti vu'un Diosune: Tana li'e, scotol lum Israel snitilultac ti Jacobe, ta x'ayan liquel syail xc'uxul co'nton yu'unic. Ta jelbe yorailic yo' tsots sc'oplal ich'bil ta muc' ta xic'ot yu'unic. 26C'alal jun xa yo'ntone, mu'yuc xa sibtasel nacal ta slumal stuquic ti Israele, ta xlic q'uexavuc yu'un ti laj spasic laj stoy sbaic ta scontrainelune. 27Yu'un laj jtsobic, laj jvolic talel ti bu tanijemic batel ta jteclumetic ta yosil sbanomil ti scontraique. Ta sta liquel slequilal yutsilal ta sba ta sat ti jyanlumetique. 28Laj jbeq'uic batel ta muc'tiquil lum ti jyanlumetique. Laj jcha'tsobic talel un ta yosil sbanomil stuquic. Mu junuc ta xquicta comel ta yosilal ti jyanlume. Ta xlic sna'ic unbi, vu'un ti Ajvalilune, ti Diosun yu'unique. 29Mu'yuc xa ta xquictaic comel. Laj xa jlamanbe jmuc'ul jtsatsal ta stojol ti Israele. Ti vu'un Diosune, mu lo'iluc no'ox ta xcal.”

Currently Selected:

Ezequiel 39: TZC00

Highlight

Copy

Compare