Éxodo 2
2
Svoq'uebal ti Moisese
1Oy jun vinic ti ja' snitilul ti Levie, laj yic' jun ants ti jmoj snitilul sbaique. 2Laj xchi'in yol yu'un. Ayan jun squerem. Va'i un, ti antse toj c'upil sba laj yil ti squereme. Laj snac' oxib u.#Hch 7.20; Heb 11.23. 3Ja' no'ox un, sta yorail ti mu xa stac' naq'uele. Jech o xal un, laj sa' jun moch meltsanbil ta jchop o ta puj. Laj spac' ta chab ta xuch' ti scayalultac ti moche yo' jech mu x'och ti vo'e. Ts'acal to un, laj stic' ochel ta yut moch ti nene' quereme. Bat yac' ta yut pujtic ta sti'il ti uc'um Niloe. 4Ma'uc no'ox taje, oy jun xvix ti quereme albat yu'un ti sme'e, ac'o sq'uel ta nom ti c'usi ta xc'ot ta stojol ti nene'e.
5Lec xa ox jmuc' ta jal un, ja' o bat atinuc ta uc'um yantsil nich'on ti faraone. C'alal ta xanavic ta sti'il uc'um ti sme' mosovtaque, c'ot ta satic jun moch tiq'uil ta yut pujtique. Ja' yu'un un, laj yalbe mantal jun sme' mosov ti ac'o sloq'ues talele. 6C'alal laj sjamic ti moch yo' ta sq'uelic ti c'usi tiq'uil ta yute, ja' to laj yilic ti ja' jun olol ta x'oc' ti tiq'uil ta yute. C'uxubaj yo'nton yantsil nich'on ti faraone. Va'i un, xi laj yale:
—Le'e, ja' jun hebreo olol.
7Va'i un, xvix ti olole xi laj yalbe ya'i stseb ti faraone:
—¿Mi lec ta xava'i ti chba jsa' talel junuc hebreo ants yo' jech xu' ta xchu'iltas ti olol li'e?
8Xi laj stac' yantsil nich'on ti faraone:
—Batan, sa'o talel.
Ja' yu'un un, ti tsebe bat yic'be talel sme' ti olole. 9Yantsil nich'on ti faraone xi laj yale:
—Ic'o batel ti olol li'e, ts'itesbun, ta jtoj ac'ac'al xtoc.
Sme' ti olole laj yic' batel yo' ta sts'ites. 10C'alal muq'uib xae, bat yac'be yantsil nich'on ti faraone. Jech ti stuque laj sbis ta yol.#Hch 7.21. Moisés,#Ti biil Moisese, “loq'uesel talel”, xi ta xal smelol ti ta hebreo c'ope. Yan ti ta egipcio c'ope, “voc'”, xi ta xal smelol. laj yac'be sbi, yu'un xi laj yale:
—Vu'un laj jloq'ues talel ta uc'um.
Ti Moisese ta xjatav loq'uel ta Egipto
11C'alal vinic xa ti Moisese, oy jun c'ac'al, loc' batel ta svu'lanel ti svinquileltaque. Laj yil ti mu x'ech' svocolic ta tsots abtele.#Heb 11.24. Ja' o laj yil ti ta xmajat yu'un jun egipcio ti svinquilel ta hebreoale. 12Ja' yu'un un, laj sq'uel ta jujujot. Laj yil ti mu'yuc buch'u oye. Laj smil ti egipcioe. Laj smuc ta yi'. 13Ta yoc'omal loc' batel yan velta. Laj yil ti ta smaj sba stuquic chib hebreoe. Ja' yu'un un, xi laj sjac'be ti buch'u ta xmajvane:
—¿C'u cha'al avinquilel no'ox ta xamaj abaic?
14Ti hebreo vinic taje xi laj staq'ue:
—¿Buch'u laj sva'anot ta totil jpojvanej, ta banquilal jchapanvanej cu'uncutic? ¿Mi yu'un ta xamilun ava'i jech c'u cha'al laj amil ti egipcioe?#Hch 7.23-28,35.
C'alal jech laj ya'i ti Moisés ti va'i s'elan taje, xi', yu'un laj ya'i ti vinaj xa sc'oplal cham ti egipcioe. 15Ti jech laj spas taje, ya'binoj xa ti faraón ti laj smil jun egipcio ti Moisese. Laj yal mantal ti ac'o yich' sa'el yo' ta xich' milel ec. Ja' no'ox un, ti Moisese jatav loq'uel. Bat nacluc ta yosilal Madián.#Hch 7.29; Heb 11.27. Ti bu taje, c'ot chotluc ta nopol joc'.
16Ti Reuele, pale yu'un ti jteclum Madiane, oy vucub yantsiquil nich'on. Ti jech c'ac'al taje, ja' o bat spulic loq'uel vo' ta joc' yo' jech ta snojesic ti yavil yuch'ob vo' chijetique, yo' jech ta xac'be yuch' vo' xchij ti stote. 17C'u stu un, tal yan j'il-chijetic. Laj xujic loq'uel. Ja' yu'un un, ti Moisese va'i batel ta spojel. Laj yac'beic yuch'ic vo' ti xchijique. 18C'alal sutic batel bu oy ti stotique, xi jac'batique:
—¿C'usi laj avutic ti ja' to sob lasutic talele?
19Xi laj staq'uique:
—Oy jun egipcio vinic laj spojuncutic c'alal ta xistacoltauncutic loq'uel ti yan j'il-chijetique. Ts'acal to un, laj slupbuncutic loq'uel ti vo'e. Laj yac'be yuch' vo' ti jchijcutique.
20Ti Reuele xi laj yale:
—¿Bu oy ti vinic taje? ¿C'u cha'al laj avictaic comel? Ba iq'uic talel. Ac'o tal ve'uc.
21Jech ti Moisese laj xch'un ti iq'uele. Com nacluc ta sna ti Reuele. Ts'acal to un, ti Reuele laj yac' jun stseb ti Sefora sbie, laj yic' yu'un. 22Ti antse laj yil jcot squerem. Ti Moisese laj yac'be sbi Gersón,#Ti biil Gersone, “jyanlum”, xi ta xal smelol ti ta hebreo c'ope. yu'un xi laj yale: “Ti ta banomil li'e, jyanlumun.”
23Ech' batel ti c'ac'ale, cham ti ajvalil yu'un jteclum Egiptoe. Ac'o mi jech un, ja' no'ox un, ti israeletique staoj yav x'ijetic to ta jic' o'nton yu'un ti oyic ta mosovile. Ja' yu'un un, ti Diose laj yil ti x'ijetic yu'un ti vocole. 24Lic chapanbaticuc ti svocolique. Laj svules ta yo'nton ti strate#Gn 15.13-14. laj spas xchi'uc ti Abrahame, ti Isaaque, ti Jacobe. 25Laj sq'uel, laj yil Dios ti c'u s'elan oyique.
Currently Selected:
Éxodo 2: TZC00
Highlight
Copy
Compare
Share
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
