Lûm 7
7
Kəlâŋ kwùmə̀ yə̀ nə̀ ìnìy iwè yìy
1Awizə̂ yamə, ghà kwu ŋwô fyiə kə lâŋ kìy dzîy nəniy. I dê tsə nə̀ ghà kî zuw kyilə ŋwò ayiə yə mə dziy dzày. Lâŋ kìy kwu kə kədaʼa azoŋə̀ àghù soŋə fə ghu muə nə̀ ghu kamə kə̀ pfə nəway. 2Anə kəlàŋ, i də nə̀, wìyəŋì wə̀ ù niy nəniy ŋəm, u kwu ani də kə nə̀ ŋə̀m ə̀ we anə ghab kə ù ki muə nəniy fə̀ anə mbyì. Abu ŋə̀mə̀ ù ghè wə̀ kwuni pfə tsə nəniy, lâŋ kə ghà kə̀ kam kwu way dàʼa kiy azoŋə̀ wìyəŋi wə̀. 3I dê tsə nə̀ abu ù zù nəŋì tsə nə̀ wìŋəmə̀ ù lìy nə ŋəm nam də kə utaw, ghu tyoŋə we nə̀ à dəə wìyəŋi wə ù bwìy nəniy mwàŋ tìy. Abu ŋəm kwuni pfə dzə̂ nəniy, lâŋ kə ghà kə̀ kàm kwu dzə̀ wày daʼa kiy azoŋə wìyəŋi wə, wìyəŋi wə̀ kàm wày dzə wìyəŋì wə ù bwìy nəniy mwàŋ tìy abu ù niy yə̂ nəniy wìŋəmə̀ ù ŋwò wìy. 4Awizə̂ yamə, i də sòʼò ghi nə̀ ghà. Ghà də ubə̂d uwè u Kə̀litò, à nyìə̀ kwu we gha. I dê tsə nə̀ lâŋ kìy kâm kwu dzə way daʼa kiy azoŋə̀ ghà. Ghà də aghee Kə̀litò wə̀ Zə̀kìy kə zɛmə̀ ŋwò kə anə ipfə ani zəŋi tsə nə̀ ŋgà doʼò tsə aghee kəfàʼ ə Kəzə̀. 5Yəə ŋgà kə nam muə tsə anə yiə yə iwe i ŋgàŋ yìy kə dzîy nəniy, lâŋ kiy zəŋə ŋgaŋ nə̀ ŋgà kəli tsə iliə ani zəŋi ayiə àbɛbə yiy anə gùw tə iwè. Ayiə àbɛbə yə àdzə̀m ŋgà kə zəŋi nəniy a də̀ ani bù ŋgàŋ nə̀ ìpfə yiy. 6Lâŋ kìy kàm kwu dzə̀ way daʼa kiy azoŋə̀ ŋgàŋ nyiə. Ŋgà də yəə à də̀ aghê pfə yiy awò làŋ kə̀ kə kə kwi naa ŋgaŋ yəə à də̀ aghee ndàw tsaʼ. Ŋgà də ŋwô nyiə ani fàʼ fàʼ k-a-zə̀ anə dzə̀d ì fyiə yìy nə̀ ŋgà zuw yə̀ awò Zwàykə̀zwekiy. Ŋgà kamə̀ fàʼà dzə̀ wày anə dzə̀d ə̀ ìwiy yə̀ lâŋ kìy kə dzîy nəniy.
Lâŋ kìy dê bə̀ fyiə kə ibɛb yiy də nəniy
7Ŋgà də ani dzày nə̀ lâŋ kìy də fyiə kə̀ bɛbə kiy ə̀? Hàay, à wày dzə ghii! Abu à kə də wày â làŋ kìy, mə kə dzǐy kyilə dzə̀ wày fyiə kə i bɛbə yiy də nəniy ghe kiy. Abu lâŋ kìy kə də kə̀ dzây nəway nə̀, “Kə̀ liə#7.7 Iliə yə̀ myìŋə̀ ani liə fyiə kə wû nə̀ ghòʼ kìy anə fôŋ. À wày dzə̀ iliə ìdzoŋə̀ yìy. dzə̀ fyiə kə à də nəniy kə wû lìy kìy,” təə Mə mə̀ dziy kyilə dzə̀ wày ndzòʼò ìliə i ghè yə̀. 8Yəə mə kə də wù ù bɛbə̀ wìy, lâŋ kìy kə zəŋi tsə nə̀ mə kəli tsə iliə anə ndzòʼò le tə ufyiə tə tə̀dzə̀m mə kə də kwu way ani kəli iliə ate. Abu lâŋ kìy də way, ibɛb yiy kwu dzə̀ way daʼa kiy. 9Soŋə fə mə kə də kwu way lâŋ kìy, mə də̀ tsə̀ utaw. Abù lâŋ kìy bû nəniy, fôŋ ə swəə miə ani zəŋi ibɛb, ibɛb yiy zəŋi tsə sòʼò mìə̀, mə pfə. 10Mə ba kòʼ tsə nə̀ lâŋ kə̀ kə kə kwu ani zəŋi tsə miə tə̀ mə doʼò tsə utaw, kə kàm nìy bù mìə̀ nə̀ ipfə yiy. 11Ibɛb yiy dyaŋi kəli tsə kəbwôʼ, nə̀ à zəŋi kə kəlâŋ, niɛbi tsə miə, wiy màʼà tsə miə.
12I dê tsə nə̀ lâŋ kìy zwe ŋwò, ayiə yə lâŋ kìy dzîy a zwe sòʼò ŋwò, də̀ tsitsi, dzwàbə sòʼò. 13I yû dè ŋwò nə̀ fyiə kə̀dzoŋə̀ kìy kâm bù nə̀ ìpfə yiy azoŋə̀ mìə̀ ə̀? I way dzə aghii! À kə də̀ ibɛb i kə wiy nəniy miə, nə̀ i nîy kə fyiə kə̀ dzoŋə̀ kìy, wiy tsə miə ate. Ani zəŋi tsə nə̀ a ki də ani kòʼ kəli tsə ibɛb nə̀ à də̀ ibɛb. I dê tsə nə̀, lâŋ kìy fîy ani dè bə̀ yiə ibɛb yiy fyâ nəniy ate.
Ŋgà way dzə ani na ulâŋ u Kə̀zə
14Ŋgà kwu ŋwô nə̀ lâŋ kìy ŋwô bə̀ awò Zə̀kìy, mə kwuni màŋ də̌ wè mbyi. Ghu fê fyi nəniy miə yəə̂ dè kəkwəd awò ìbɛb yiy. 15Mə ba bòʼ kwu dyaŋi way ayiə yə mə zəŋə nəniy, aŋwòə mə zəŋə dzə̀ wày iyiə ì dzoŋə̀ yə̀ mə liə nəniy ani zəŋə, mə fə̀d zəŋə yə̀ ìyiə ì bɛbə yə mə də liə way ani zəŋi. 16Yəə mə də zəŋə kə way ayiə yə mə kwu nə̀ a də tsitsi, mə bɛmə ŋwô nə̀ lâŋ kìy dzwâbə̀ ŋwò. 17I də nə̀ à ba wày dzə miə mə zəŋə nəniy iyiə ì ghà yə̀, à kwuni də̀ ibɛb yə i muə nəniy a zoŋə̀ mìə̀ ì zəŋə nəniy miə nə̀ mə zəŋi ayiə àbɛbə ghà yə̀. 18Mə kwu ŋwô nə̀ iyiə ìdzoŋə̀ ìliy yiy way dzə azoŋə̀ mìə̀, anə i mùə̀ i wû mbyi yam, aŋwòə mə gbaŋə liə ŋwò ani zəŋi iyiə ì dzoŋə̀ yìy, mə wày ani zəŋi yə̀. 19Mə taʼà zəŋə yə̀ wày ayiə àdzoŋə̀ yə̀ mə liə ani zəŋi, mə fələ̀ zəŋə yə̀ kə àyiə àbɛbə yə mə də liə way ani zəŋi. 20Abu mə zəŋi iyiə yə mə də liə way ani zəŋi, i ghà yə dè tsə nə̀ à ba way dzə miə mə zəŋə nəniy iyiə ìbɛbə i ghà yə̀, à kwuni də̀ ibɛb yə i də nəniy azoŋə̀ mìə̀ ì zəŋə nəniy nə̀ mə zəŋi ibɛb ighè yə̀.
21Lâŋ kìy mə dè bə̀ â mìə̀ nə̀ fyiə kəli kiy də ŋwô azoŋə mìə̀ kə fyimə nəniy miə nə̀ mə kə zəŋi dzə̀ ayiə yə mə kwu nəniy nə̀ a də tsitsi. Mə fə̀d zəŋi yə̀ ìbɛbə yiy. 22Anə fôŋ yam mə bɛmə ŋwô nə̀ ulâŋ u kəzə̀ wìy dzwâbə̀ ŋwò. 23Mə kwuni kòʼò làŋ kə̀liy kiy kə ŋwâ nəniy nə̀ làŋ kə̀ mə̀ kwu nəniy anə fòŋ yam. Lâŋ kə ghè kə̀ kwu kədaʼa anə ayiə yə àdzə̀m mə zəŋə nəniy. Kə zəŋə sòʼò nə̀ mə doʼò wè ndàw ntsaʼ awò ìbɛb yiy. 24Mwuli kiy kwoʼo dyaŋə miə anə uwè nam! À nì bii fyi ndiə miə awò gùw ùwè yə̀ ì nìy zê nəniy miə anə ipfə ə? 25Mə nyiə̀ zòŋə̀ k-a-zə̀, ù nì bii fyiə nəniy miə abidzəmə̀ Mwe ə̀ mbyi ə ŋgàŋ Yesu Kə̀litò!
Yəə i də nəniy ghii, mə kî fàʼà àyiə yə lâŋ k-a-zə̀ kìy dzîy anə fôŋ yam, yəə gùw ùwè nam kwuni zəŋə kə nəniy nə̀ ibɛb yiy kəli kədaʼa azoŋə̀ mìə̀.
Currently Selected:
Lûm 7: isu
Highlight
Share
Compare
Copy
Want to have your highlights saved across all your devices? Sign up or sign in
© CABTAL 2023
