Lûm 11

Zə̀kìy kamə twe maʼà dzə̂ àghee we yiy, Islàel

1Mə bəbə bə̀ â ghà nə̀, Zə̀kìy mə̀ twe màʼà Islàel, aghě wè yìy ə̀? Mə dziy bə̀ ŋwò awò ghà nə̀ Zə̀kìy kamə kə̀ twe maʼà dzə̂ aghee wè yìy. Ùwee nam, mə də sòʼo wè Islàel, wàwà Ablàhâm, mə fyi anə isəd i ndaw i Bendzamèn. 2Zə̀kìy kamə kə twe maʼà dzə̂ nəway aghee we yə ù kə khu sây na nəniy. Ghà kwu way ayiə yə a twâ doʼò anə ŋwàʼà k-a-zə̀, anə lòʼò kə kə Èlaydzà kə dzîy yə̂ awò Zə̀kìy nə̀ aghee Islàel yìy ŋge bɛbə ŋwò. 3Ù kə dzày tsə nə̀, “A Mwe ə̀ mbyi, ghu mə wiy màʼà aghee ntwum yiə̀ yìy bə̀lì màʼà sòʼò tà kə̀ ghu kə sâ nyiə̀ tsə̂ nəniy ufyiə wiy ate â wò. À dòʼò sə kə miə nyiə, mə bɛmə nəniy â wò. Ghu khu dzəd ani wiy màʼà sòʼò mìə̀.” 4Zə̀kìy kə dzày nə̀ìndiə â we ə? Zə̀kìy kə dzày tsə a we nə, “Mə mə nù na aghê təkaam isèmbe ghu də kamə fwulì nəway zə̀ kə Bâl kìy.” 5I də sòʼò ighəd nyiə, sə fə ghè liy fiy nam dòʼò sə ŋwô Zə̀kìy sây na bòʼ fòŋə̀ we fòŋə̀ we ìdzòŋə̀ yìy. 6Zə̀kìy sây ghu bòʼ fòŋə̀ we ìdzòŋə̀ yìy, à wày dzə anə fàʼ kə̀ ghu fâʼ nəniy. Bəə Zə̀kìy mə̀ sììy àghû yìy bòʼ fàʼ kə̀ ghu fâʼ nəniy, a mə də nə̀ fòŋə̀ we ìdzòŋə̀ yə̀ ù dê nəniy ì də̌ kə̀ŋwôŋwò.

7Ì yû myìŋə̀ nə̀ aghee Islàel kə kə̀ kəli dzə̂ fyiə kə ghu kə khu nəniy. À kə də̀ kə sə fə ghù fə̀ Zə̀kìy kə sây nəniy, ghu kə kôʼ nəniy fyiə kə ghu kə khu nəniy ghe kiy. Àliy yə kwuni kwu ukwəli u təfòŋ. 8Ighəd ayiə yə ŋwàʼà k-a-zə̀ kìy dzîy nəniy nə̀, “Zə̀kìy kə zəŋi tsə, ghu ŋge lyaʼà, ghu wày ani zuw kəli ayiə, bù kwùm tsə zii, asə ə ghu yiy fɛ̂b dòʼò ŋwò, utswuŋi u ghu wiy kwôʼ doʼò soʼò nəniy.” 9Devìd kə dzày sòʼò nə̀,

“Mə gwuŋə̀ nə̀ ufyiə wə uzəŋə nəniy nə̀ ghu ki dyòʼo u dòʼò tsə fəntsaʼ â ghu.

Mə gwuŋə̀ nə̀ ghu ki tyàŋì bvə̂ ate, ghu kəli soʼò mfəm anə ayiə yə ghu kə zəŋi nəniy.

10Mə gwuŋə̀ nə̀ asə ghu yiy fɛ̂b doʼò anə ayiə yə ghu də wày ani kòʼ tə̀ loʼo.

Mə gwuŋə̀ sòʼò nə̀ dzəm tə ghu tiy zôʼ dòʼò təŋ yə̂ â ntswə̀d mìy anə nsòŋə indzə̀m aŋwòə ntswə̀d mə̀ ghu miy dələ̀ ŋwò.”

11Mə namə bəbə nə̀,

“Yəə aghee Islàel yìy kə bvə̂ tsə nəniy, ghu kə bvə̀ anə ayiə yə ghu kə də wày ani kàm ŋwò təmi kə idoŋ ə̀?

Hǎy! À wày dzə ghii, aŋwòə ibɛb yə ghu kə zəŋi nəniy, i kə zəŋi tsə nə̀ Zə̀kìy bii fyi ŋwô àghù yə̀ ghu kə də wày aghee Dzû, ani zəŋi tsə nə̀ aghee Dzû ki ghoʼo ghu. 12Yəə aghee Dzû kə zəŋi tsə ibɛb yiy, Zə̀kìy lwì yə̀ àghě mbyi nə̀ ndə̀mə̀ ùlwì wìy, yəə aghee Dzû kə də̂m kê dzə̂ ani kəli ulwì wə̀ Zə̀kìy kə liə ani nyə̀ awò ghu. Zə̀kìy kwuni nyə̀ yə̀ ùlwì u ghè wə̀ awò àghù yə̀ ghu də wày aghee Dzû. Abu aghee Dzû yìy kyemì bə̂ nəniy â Zə̀kìy, ghu də ani kəli tsìy fyi ulwì ughè wə̀!”

Zə̀kìy kə bii fyi aghû yə̀ ghu də wày aghee Dzû

13Mə dzəŋə̀ bə̀ nyə̀ nə̀ ghà, gha yə ghà də wày aghee Dzû. Yəə mə də nəniy wè ntwùm ə̀ Yesù, Zə̀kìy twum nəniy miə awò àghû yə̀ ghu də wày aghee Dzû Mə liə fàʼ kam nə̀ fòŋ yam i dzə̀m. 14Mə moʼò ani zəŋi tsə aghee inaʼ yam tə̀ ghu ki ghoʼo gha, ani zəŋi tsə nə̀ Zə̀kìy ki bii fyi soʼò ghu. 15Yəə Zə̀kìy kə twe maʼà tsə nəniy aghee Islàel yìy, u zəŋi tsə nə̀ aghee liy yə anə mbyi nə̀ ghu doʼò àfələ we. Ani buu Zə̀kìy nîy na dzwoŋi bə̂ nəniy ghu nə̀ ghu də tsitsi anə sə kə we, à ni də yəə ghu nə̀ zɛ̀mə̀ ŋwò dzwəŋə bə̂ aghê àpfə yiy anə ipfə.

16Bəə ghu nyiə̀ yə̂ nəniy boʼ k-a-ba kiy awò Zə̀kìy, i dê tsə nə̀ ghu mə ghii nyə̀ mà ba kə dzə̀m awò Zə̀kìy. Bəə ghu nyiə̀ yə̂ aghaŋə fəkàʼ yìy awò Zə̀kìy, i ghii dè tsə nə̀ ghu mə nyə̀ kâʼ fə ghè fə̀ nə̀ ŋkwè tìy awò Zə̀kìy. 17Aghee Islàel yìy də yəə à də̀ kâʼ fə Olìf fə̀dzoŋə̀ fìy ghu zuu na nəniy anə uswum nə̀ Zə̀kìy mə kwuni fàlì ŋwòə ŋkwè tə̀liy tiy ate anə kàʼ fə̀ dzoŋə̀ fə̀. Ù zù fàlì bə̀ kə̀ŋkwè anə kàʼ fə Olìf fə̀ ŋwò fìy a mbvən bù zòŋ na nyi bə̀ anə kàʼ fə Olìf fə̀ dzoŋə̀ fə̀ ghu zuu na nəniy anə uswum. Gha yə ghà də wày aghee Dzû, ghà də yəə à də̌ ŋkwè kə fəkàʼ fə̀ ghu fàlì bə̂ nəniy ambvən, ghà kyilə nəniy mwi mə ì ŋwò kwoʼo bə̂ anə ghàŋə tə kàʼ fə̀ dzoŋə̀ fə̀, fə də nəniy anə uswum. 18Ghà kə môʼ dzə̀ nə̀ ghà tsîy fyi ŋwô aghee liy yə Zə̀kìy kə falì ŋwò fyi bə̂ nəniy ghu yəə à də̌ uŋkwè u ŋkàʼ. Ghà kə kwiʼi dzə̀ iwee yiy, ghà kəli tsə nə̀ àwày dzə gha, ghà fîy nəniy ghaŋə tə fəkàʼ fìy, à kwuni də̀ ghaŋə tə fəkàʼ tə fîy nəniy gha yə ghà də yəə à də̀ tə̀ŋkwè.

19Ghà nyiə̀ nə moʼo nə̀, “Zə̀kìy kə fàlì ŋwò ŋkwè tə̀ ani zəŋi tsə nə̀ ghè bû doʼò anə lòʼo kə ŋkwè tə ghè tə̀ kə də nəniy ate.” 20À də̌ ìsoŋì nə̀, Zə̀kìy maa fàlì ŋwò fyi ghu aŋwòə ghu kə kə̀ bɛmə nəway â Kə̀litò. Ghà fə ghii dòʼò bə̀ yəə ghà kə kəli tsə ibɛmə yiy â Kə̀litò. Ghà kə kwuni mòʼ dzə̀ nə̀ ghà ŋge tsìy fyi ŋwò wù lìy wìy. Ghà kwuni kwu ani nìy tsə iyɛmì. 21Abu Zə̀kìy kə də kə̀ sə̂m nəway ani fàlì ŋwò aghee Islàel yə̀ ghu kə də yəə à də̌ uŋkwè wə̀ kâʼ fìy kə nɛmə fyi kə nəniy nə̀ ùghe wiy, ghà fə mòʼò nə̀ ù kì fàlì ŋwò wày ghà yə̀? Ù kì sə̂m dzə̀ wày ani fàlì ŋwò ghà abu ghà kî də kàm kwu way ibɛmə yiy â we. 22Ŋgà kwu ani kəli tsə nyiə nə̀ Zə̀kìy kwu fòŋə̀ ìdzòŋə̀ yìy, ŋwìy sòʼò. Ù kə ŋwìy nə̀ àghù yə̀ ghu kə bvə̂ tesəə nəniy. Ù kì dè fòŋə̀ we ìdzòŋə̀ yìy awò ghà abu ghè tsə̂ŋ kwu kə ani gaʼ na fôŋ təli tiy azoŋə̀ we. Bəə à də wày aghi, ù kî fàlì ŋwò sòʼò ghà. 23Bəə aghee Dzû kî kàm kəli dzwoŋi tsə nəniy ibɛmə yiy awò Zə̀kìy, Zə̀kìy ki nîy zôŋ na dzwoŋi bə̂ ghu. Zə̀kìy kwu ŋwô daʼa kiy ani nìy na dzwoŋi bə̀ ghu akə̀lə̀ we. 24I də nə̀, gha yə ghà də wày aghee Dzû, ghà də yə à də̌ ùŋkwè u kàʼ fə Olìf fə̀ ghu falì bə̂ nəniy a mbvən, bù zòŋ na nyi yə̀ anə kàʼ fə Olìf fə̀ ghu zuu na nəniy.#11.24 Wù wày dzə ani zù fàlì bə̀ ŋkwè kə kàʼ fə olìf a mbvən wò bû zôŋ na nyi bə̂ anə kàʼ fə Olìf fə̀ ghu zuu na nəniy anə uswum, tə̀ kə ki tsəŋə niyemə yə kə ŋwô anə yiə yə kə də ani mu utam. Bəə Zə̀kìy də ani zəŋi ghii nə̀ ghà, i dê tsə nə̀ à kì də̀ iyiə ìbvay yiy awò Zə̀kìy ani nìy zòŋ na nyi dzwoŋi bə̀ ùŋkwè u kàʼ fə olìf fə̀ ghu kə falì ŋwò nəniy anə kàʼ fə Olìf fə̀ ghu kə zuu na nəniy anə uswum.

Zə̀kìy nî bii fyiə ŋwò aghee Islàel yìy

25Awizə̂ yamə, nù kə iyiə kə̀ liy kiy də ŋwô mə liə nə̀ ghà kəli tsə aŋwòə iyiə i ghè yə̀ də̌ ani fày ghà nə̀ ghà kə môʼ dzə̀ nə̀ ghà ŋge kwu utwab. I də nə̀ ndə̀mə̀ aghee Islàel mə twe ani bɛmə awò Kə̀litò. Ghu nî tsə̀ŋə̀ twe kə we ghii zù kwùm anə sòŋə fə Zə̀kìy nî bii fyiə mià tsə nəniy aghû yə̀ àdzə̀m ghu də wày aghee Dzû ani bu ghu kəli tsə nəniy ibɛmə yiy azòŋə̀ we. 26Zəkìy nî bii fyiə àghě Islàel anə yiə yə i twâ doʼò anə ŋwàʼà k-a-zə̀ nə̀,

“Wè lìy nì fyiə bə̀ a Zayòn ani bii fyi ŋgaŋ.

Ù nî zəŋi tsə nə̀ awiwa Dzàkôb yìy nyəli maʼà àyiə àbɛbə yiy.

27Mə ni nyi kə ŋkà mə̀ nə̀ ghu

ani bu mə nîyzə̂ dzə̂ bɛb tə ghu tiy.”

28Zə̀kìy faʼà nə̀ aghee Islàel yìy yə à də̌ aghû yə̀ ù bà nəniy, ghu bâ soʼò nəniy we aŋwòə ghu mə twe ani bɛmə ntwùm ìdzòŋə̀ yə̀ kwùmə̀ yə̀ nə̀ Yesù Kə̀litò. I mə kwuni nyə̀ gha nə̀ bwòʼ kìy nə̀ Zə̀kìy bii fyi gha, gha yə ghà də wày aghee Dzû. Zə̀kìy maa kwuni sày aghee Islàel yìy, ù nam liə ŋwoə ghu bòʼ fyiə kə ù kə tɛb na nəniy awò nə̀ tě ghu asəsə yiy. 29Zə̀kìy kwunə kòʼò tsə̀ dzə̀ way fòŋ ə̀ we azoŋə̀ aghù yə̀ ù sày na nəniy, lwì tsə sòʼò ghu. 30Səsə, gha, yə ghà də wày aghee Dzû ghà kə ŋwunə ŋwò â Zə̀kìy. Zə̀kìy mə kwuni dè gha nə̀ fòŋə̀ we ìdzòŋə̀ yìy nyiə aŋwòə aghee Islàel yìy kə twe ani zuw awò we. 31Yəə aghee Dzû də zuw way awò Zə̀kìy nyiə, i mə zəŋi nə̀ Zə̀kìy dê mwuli kə we kə̀ kwoʼo kiy awò ghà. I kî zəŋə tsə sòʼò nə̀ ghu kəli dâŋ tsə̂ mwuli k-a-zə̀ kə̀ kwoʼo kiy. 32Zə̀kìy mə zəŋi nə̀ aghê dzə̀m doʼò tsə yəə à də̀ aghee ndàw ntsaʼ aŋwòə ghu zuw way awò Zə̀kìy ani zəŋi tsə nə̀ ghe nì də ani kwoʼ nə̀ mwuli kiy azoŋə̀ ghu.

Ŋgà kwu ani kyalə yə Zə̀kìy

33À də ndiə ani tyi dzày mà yəə Zə̀kìy kwumə nəniy ate? À də ndiə ani tyi dzày mà yəə utwab u Kə̀zə̀ wìy kwûm nəniy ate? À də ndiə ani tyi dzày àyiə yə Zə̀kìy tsəmə̀ nəniy ayiə yiy ate ə? À də̌ ndiə ani kòʼ kəli tsə ayiə yə Zə̀kìy faʼà nəniy ayiə we yiy ate? 34Ighəd anə yəə ŋwàʼà k-a-zə̀ kìy dzîy nəniy nə̀,

“À də ndiə ù kwu nəniy imôʼ i Mwe ə̀ mbyi yìy ə?

Moo à də ndiə ani tswù yə̀ we ə?”

35“À fwììy nyə̀ kòʼ dzə̀ ndiə we nə̀ fyiə kiy

anə yiə yə ù də ani tsə dzwoŋi bə̂?”

36I də nə̀ à kə zəŋi Kəzə̀ ufyiə wə fə anə mbyi ùdzə̀m. Ù kə zəŋi abidzɛ̀mə̀ ùwee u we wiy. Ufyiə udzə̀m də sòʼò bòʼ we. Ŋgà kwu ani kyalə Zə̀kìy anə nsòŋə indzə̀m. I də kə ghii.

Currently Selected:

Lûm 11: isu

Highlight

Compare

Copy