Kə̀fàʼ 25

Pôl ə dzìy nə̀ ghu nîy zû nə ìghe akə̀lə̀ Kaʼisà

1Ntsukə kə tsìy tsə inti anə yiə yə Festùs bù doʼò bə̂ nəniy tuw kiy anə mbwòʼ, u ŋwò tsə a Kàsaliyà zù a Yèlusalèm. 2Ŋgəd tə aghè àlwaʼa yiy nə̀ ŋgəd tə ghě Dzû aliy yiy nìy bə̀ ayiə yə ghu kwi nəniy Pôl ate dzày yə̀ awò we. Ghu bwoʼ sòʼò dòŋ kə mbwòʼ kə̀ nə̀ wo kiy, 3a we nə̀ ù fày ghu ani nìy bù nə̀ Pôl a Yèlusalèm. Ghu kə ghii dzìy aŋwòə ghu kə byay na ani zù bvə̀ dòʼò tsə Pôl anə dzəd tə̀ ghu wiy maʼà we. 4Festùs ə kwuni dzày yə̀ a ghu nə, “Pôl kì dyoʼò kə a ndàw ntsaʼ a Kàsaliyà, mə kî kwùlə̀ zè ŋwò awote nə̀ ùwe nam wiy. 5Ghà zəŋi tsə nə̀ ŋgəd təli tə̀liy tiy dzwùmì bə̂ mìə̀ a Kàsalìyà. Bəə à də̀ nə̀ Pôl zəŋi ŋwô iyiə ìbɛbə ìliy yiy, ghu ki nîy kwoʼ bə̂ nsàʼ ìghè yə̀.” 6Festùs ə dòʼò koŋə yə̀ ndə̀mə̀ ntsukə awote nə̀ ghu yəə à də̀ məntsukə infamə, kwùmə̀ kwoʼo yə̀ məntsukə invəm â we ani ŋwò zù a Kàsaliyà. Tswutswu wə, u zù a ndàw ìsaʼà yìy, dòʼò tswi tsə anə kwe kə̀ saʼa kiy, dzày yə̀ nə̀ ghu nîy bû nə̀ Pôl. 7Yəə Pôl bù nəniy, aghee Dzû yə̀ ghu kə ŋwô bə̂ nəniy a Yèlusalèm ə dzɛ̀mə̀ na kə we, kaʼ ani dzày nə̀ ù mə ŋge zəŋi ayiə ə bɛbə yiy anə ndə̀m ghu kwuni wày dzə ani dzày bə̀ dzə̀ ndzòʼò àyiə bɛbə yə Pôl zəŋi nəniy. 8Pôl ə kwuni dzày sòʼò ìdzwə i we nə̀, “Mə kamə kə̀ zəŋi dzə̂ iyiə ìbɛbə ìliy yiy kwùmə̀ yə̀ nə̀ ùlàŋ u ghě Dzû yìy, moo nə̀ ndàw Kə̀zə̀, moo nə̀ wè tuw kə mbwòʼ kìy.” 9Festus kə liə ani taʼ nə̀ ŋgəd tə ghě Dzû tìy, u bəb yə̀ â Pôl nə̀, “Wò liə ŋwô ani zù a Yèlusalèm tə̀ mə zû saʼ ani kəli fyi kə nə̀ nsaʼ yə aghû yə̀ nìy kwoʼ bə̂ ì də̀ ŋwoə ìsoŋə̀ yìy?” 10Pôl ə bə̀lì kə a we nə̀, “Mə wee tiy fə̀ anə sə kə wè tuw kə mbwòʼ ù də nəniy yəə à də̀ Kaʼisà fə anə lòʼo kə ghu kwu ani saʼa miə ate. Ghà kwu ŋwô nə̀ mə kamə kə̀ zəŋi bɛb dzə̂ ìyiə ìliy yiy nə̀ àghě Dzû. 11Abu à də nə̀ mə zəŋi iyiə ìbɛbə ìliy yiy, i dê nəniy nə̀ ghu kwu ani wiy màʼà mìə̀, mə way dzə ani twe ani pfə. Bəə à kwuni də̀ nə̀ ayiə yə aghee Dzù dziy mə zəŋi ŋwò nə̀ à də ayiə guw yiy, wè lìy kwu dzə̀ way daʼa kə̀li kiy ani nìy kə miə ù nyiə̀ yə̀ awò ghu tə̀ ghu wiy miə. Mə bwoʼo kə̀wo nə̀ Kaʼisà saʼ miə.” 12Abù Festùs səay tsə nəniy ayiə yiy nə̀ àghě ndàw ìsaʼà yə̀, u dzày yə̀ â Pôl a we nə, “Wò mə bwoʼ wo kiy awò tuw kə mbwòʼ Lûm nə̀ ù saʼ wô, wò zè kə akə̀lə̀ we.”

Festùs ə tyi dzày yə̀ nsàʼà Pôl awò Àglipà

13Ntsukə tsìy tsə in səkiy kə ghii, mwê ìnaʼ Àglipà nə̀ àzə̀ ə̀ we ùyəŋi Bènîs, ghu bwì zù a Kàsaliyà ani zù twoŋə zuw Festùs yəə u kə kwùlì bù dòʼò tsə nəniy tuw kə mbwòʼ kìy. 14Abù ghu dzə̂ doʼò tsə tsukə məlìy mìy awote, Festùs ə nìy dzày yə̀ ayiə ə Pôl awò mwê ìnaʼ Aglipà a we nə, “Wè lìy də̀ fə Fɛlìks kə fê na nəniy a ndàw ntsaʼ ŋwò na səə tsə we awote. 15Abù mə zû a Yèlusalèm, ŋgəd tə aghè àlwaʼa yiy nə̀ ŋgəd tə inaʼ tə ghě Dzû tǐy nìy kwoʼ bə̀ nsàʼ ì ghè yə̀, dzìy nə̀ mə saʼ wiy maʼà we. 16Mə dzày yə̀ a ghu nə, i way dzə anə biə kə Lûm nə̀ a si niy kə wù wə̀ ù kaw nəniy utswə̂d wìy à nyiə̀ yə̀ we anə wo kə ghu yə̀ ghu swamə bə̂ nəniy we. Ù kwu ani bù dzə̀ anə sə kə ghu yə̀ ghu swamə nəniy we, ù dzày sòʼò ìdzwə i we ani dè tsə nə̀ ù kamə zəŋi bɛb dzə̂ ìyiə ìliy anə ayiə yə ghu kwi nəniy we ate. 17Abù ghu sî bù nəniy fə akə̀lə̀ mìə̀, mə kə̀ fə̂d nəway ikwe yiy. Tswutswu wə̀, mə dòʼò yə̀ anə kwe kə̀ saʼa kiy dzày yə̀ nə̀ ghu nîy bû nə̀ we. 18Abù ghu kwuni təmi kə ani dzày ayiə yə wù wò zəŋi byɛbi nəniy, ghu kə̀ ba dzay fyi kə dzə̂ iyiə ìbɛbə yə wù wə̀ zəŋi nəniy anə yiə yə mə kə moʼò. 19Ghu kə fə̀d kaʼ yə̀ ani bə̀d àyiə anə ibɛmə yə ghu kə kwu kwùmə̀ yə̀ nə̀ Zə̀kìy. Ghu bə̀lə̀ sòʼò ayiə kwùmə̀ yə̀ nə̀ wù wə̀ ghu kə twoŋə nə̀ à də̀ Yesù. Pôl ə kwuni dzìy yə̀ aghu nə̀ ù nam də̀ utaw. 20Yəə mə kə də kwu way utwab wiy ani kaw kəli fyi kə ayiə àsoŋə̀ yìy, mə dzày yə̀ â Pôl nə̀ bəə ù liə mə ki twum yə̂ we a Yèlusalèm, ghu saʼ we awote. 21Pôl ə kwuni bwoʼ bə̀ kə̀wo nə̀ mə ba na tsə kə ighe a ndàw ntsaʼ, tə̀ Kaʼisà kî tsə̀m bə̂ ani saʼ nsàʼ ìghè yə̀. À yu də̀ ighe mə kə dzây tsə nəniy nə̀ ghu na tsə kə we fə̀ ani zù kwùm soŋə fə mə kî twumə zê nəniy we ate akə̀lə̀ Kaʼisà.” 22Àglipà ə dzày yə̀ awò Festùs a we nə, “Mə ba liə ani zuw yə̀ sòʼo ayiə ə we à dziy yiy anə utswùŋì wam.” Festùs ə dzày yə̀ a we nə, “Wò kì zuw ŋwò àyiə we à dziy yiy tswutswu.”

23Abù tswutswu wə, Àglipà we nə̀ Bènîs ə zù bù nə̀ ghu toʼò kwoʼo bə̀ iwe anə yiə àsoŋə̀ yìy, ghu tsìy nyi yə̀ anə samkpà kə ghu kə kwi tsə̂ nəniy dzəŋə kiy ate nə̀ àghě təsǔgôʼ à nê yìy, nə̀ ŋgəd tə inaʼ tiy. Festùs ə dzày yə̀ nə̀ ghu nî bû nə̀ Pôl. 24Festùs ə dzày tsə nə̀, “A mwê ìnaʼ Àglipà, nə̀ gha yə adzə̀m ghà lwe doʼò nəniy fə ndaw, kòʼò nənìy wù wə̀ ndə̀mə aghě ə Dzû anə inaʼ i Yèlusalèm nə̀ à yu fə anə inaʼ, ghu bù akə̀lə̀ mìə̀ dzày bə̀ ayiə yə ghu kwi nəniy wù wə̀ ate, dzìy nə̀ a kpe ani wiy maʼà wù wə̀. 25Mə kamə kwuni kôʼ iyiə ìbɛbə yə ù zəŋi nəniy yəə ù nì pfə dyaŋi ate. Anə yiə yə ù kə bwoʼ bə̂ soʼò wokiy nə̀ ghe zê kə a Lûm tə̀ Kaʼisà saʼ we, mə ba kòʼ tsə nə̀ i dzwàbə̀ ŋwò â mìə̀ ani twum zù we awote. 26Mə kwu ayiə mə də ani twà dzày â Kaʼisà nə̀ wù wə̀ zəŋi bɛb ŋwô. À yù də̀ ighe mə nîy fyi bə̂ nəniy we anə sə kəli. Mə ba nìy fyi bə we bòʼ wò a Àglipà tə̀ a ki bu a saʼ kôʼ tsə nəniy, mə ki kəli tsə ayiə yə mə dziy twâ tsə anə kəŋwàʼà. 27Aŋwòə i way dzə tsitsi awò mìə̀ ani twum yə̀ wù yəə à də̌ wè ndàw ntsaʼ awò Kaʼisà nə̀ ghu kamə kə̀ saʼ nəway we ani kòʼ tsə nə̀ ayiə yə ghu kwi nəniy we ate a də a àsoŋə̀ yìy.”

Currently Selected:

Kə̀fàʼ 25: isu

Highlight

Compare

Copy