Kə̀fàʼ 24

Aghê Dzù yìy dzày àyiə bɛbə yiy anə tuw kə Pôl nə̀ akə̀lə̀ Fɛlìks

1Aghee ulàŋ wìy kə bù nyə̀ bə̀ Pôl awò Fɛlìks, abù ntsukə tsìy tsə ìntà, wù ùlwaʼà ùnè wìy, Ànàniyàs, u ŋwò kə zù a Kàsalìyà nə̀ ŋgəd tə inaʼ tə̀liy tiy, nə̀ wù tə̀ nsaʼ izəd yiy kə də nə̀ à də̌ Tètulùs. Ghu zù fyi kə akə̀lə̀ Fɛlìks wù ùsòŋə̀ wìy, nìy kə utswə̂d wə̀ ghu kwu nəniy nə̀ Pôl, màʼà bə̀ ambvə̀d. 2Yəə ghu twoŋə tsîy nyi bə̂ nəniy Pôl a ndaw, Tètulùs ə biə kwoʼ bə̀ nsaʼ kwùmə̀ yə̀ nə̀ Pôl dzìy nə̀, “A Fɛlìks, wù ù sòŋə̀ wìy, dzələ tə̀ twabə tə wò saʼa nəniy inaʼ yiy ate, tə mə zəŋi, ghè mə kəli ibvay yiy fə̀ anə inaʼ anə ndaŋ k-a-ghab.

Utwab yiə̀ wìy mə zəŋi sòʼò ndə̀mə̀ ndə̀mə̀ tə yiə tiy kwuni fə anə inaʼ i ŋgàŋ.

3A Fɛlìks, wù ùsòŋə̀ wìy, ghè ŋge liə ŋwô ayiə ghè yə̀ àdzə̀m, ghe ŋge dyoʼo sòʼò ŋwò nə̀ wò anə fàʼ kyiə̀. 4Mə liə dzə̀ way ani nyàb màʼà soŋə fyiə anə ndə̀m, mə dziy bwoʼ tsə wô nə̀ wo kiy nə̀ wò kəli tsə fòŋə̀ ìdzòŋə̀ yìy ani zwuli tsə ayiə yə ghè dziy dzày anə kə̀mə̀ fə fə sòŋə. 5Ghè mə kòʼ nə̀ wù wə̀ də̌ wù ùtswə̀d. Ù zəŋə nə̀ aghee Dzû yìy ki ŋwaa kwunə anə iwè anə mbyi idzə̀m. Ù də̀ kəsə anə dzəŋə kə ghu twoŋə nə̀ à də̌ Nàzalèn. 6U kə̀ kaʼ yə̀ sòʼò ani dzày àyiə bɛbə yiy kwùmə̀ yə̀ nə̀ ndàw Kə̀zə̀, ghè ə̀ kwi tsə we. Ghè kə liə ani saʼ we anə àyiə yə lâŋ kələ kiy dzîy.#24.6 Ùŋwàʼà ùliy wiy kwe fwulə tsə mə̀ŋkə̀mə̀ ìn tyìfoŋ zù kwùmə̀ yə̀ anə məŋkə̀mə̀ ìn famə; Ghè kə liə ani saʼ we anə àyiə yə lâŋ kələ kiy dzîy.7Lisìyàs, wù kə̀làŋ unè wìy kwuni bû də̀m nìy ŋwô kə we awò ghə̀d an-a-daʼa. 8Lisìyàs dzìy nə̀ abu wò kwu nəniy utswə̂d ù liy wiy nə̀ wù wə̀, ù bù nə̀ ù ghe wiy a kə̀lə̀ wò tə̀ wò saʼ tsə nsaʼ ì ghè yə̀. 7Lisìyàs, wè kə̀làŋ ə̀ Lûm unè wìy bù nə̀ sǔgôʼ tə we tiy bû də̀m nìy ŋwô kə we awò ghə̀d. 8Lisìyàs dzìy nə̀ abu wò kwu nəniy utswə̂d ùliy wiy nə̀ wù wə̀, ù bù nə̀ ù ghe wiy akə̀lə̀ wò tə̀ wò saʼ tsə nsaʼ ì ghè yə̀. Abu wò bəb zuw dzwâb tsə nəniy ayiə yiy awò wù wə̀, wò kî tòʼò kəli fyi kə iyiə ìsoŋə̀ yə̀ i də nəniy ghè kwi nəniy wù wə̀ ate.” 9Aghê Dzû àliy yə ə ŋwò bɛmə fyiə kə idoŋ nə̀ ìny ayiə yə Tètulùs dzày nəniy àdzə̀m, à də̀ ayiə àsoŋə̀ yìy.

Pôl ə bii fyi kə tuw kə we akə̀lə̀ Fɛlìks

10Wù kə̀tuw wə̀ fòʼ kə kəwo awò Pôl nə̀ ù dzày sòʼò ìdzwə i we. Pôl ə dzày nə̀, “Mə kwu ŋwô nə̀ wò mə saʼ aghee inaʼ yə anə ndə̀mə̀ tə̀ ŋə̀mə̀, mə dyoʼə ŋwò sòʼò ani dzày ìdzwə yam anə sə kyiə̀.

11Ntsukə kamə tsîy fyi dzə̂ nəway in vəm nə̀ ntsukə miy imbè anə yiə yə mə kə zù a Yèlusalèm. Wò də̀ ŋwô ani zə̀àŋì kaw kəli fyi kə. Mə kə zù awote ani zù fwùlì Kə̀zə̀ 12Aghê Dzû yìy kə kə̀ kôʼ dzə̂ nəway miə̀ mə bələ̀ nəniy ayiə yiy nə̀ wù lìy a ndàw Kə̀zə̀. Mə kə kə̀ tyebi dzə̂ wù lìy nə̀ ù kaw utswə̂d ùliy wiy a ndàw dzəŋə kə ghě Dzû moo anə inaʼ. 13Ghu way soʼo ani dè bə̀ dzə̀ tsə̀e ìlìy yìy ani dè tsə nə̀ Mə mə zəŋi iyiə ìbɛbə yiy. 14Mə bɛmə ŋwô nə̀ mə dzwùmə̀ dzə̀lə̀ ìmùə̀ yə̀ Mwe ə̀ mbyi dê na nəniy. Aghee Dzû yìy kwuni dzîy nəniy nə̀ à wày dzə̀ dzə̀lə̀ ìdzòŋə̀ yìy. Mə fwùlə̀ Zə̀ kə nə̀ tě ŋgàŋ asəsə yiy. Kwu sòʼò ìbɛmə ìtaw yiy anə ulàŋ u Musîs. Mə kwu sòʼò ibɛmə ìtaw yiy anə ayiə yə àdzə̀m aghee ntwùm ə̀ Kə̀zə̀ yìy twâ na anə ŋwàʼà k-a-zə̀. 15Mə bvami gaʼ na təŋ kə fòŋ yam nə̀ Zə̀kìy kî zɛmə̀ ŋwò kə ŋwò aghee pfə yiy àdzə̀m àdzoŋə̀ yìy nə̀ àbɛbə yiy, ighəd anə yiə yə aghû yə̀ bɛmə nəniy ate. 16À yù də̀ ighe mə də̀mə̀ ani kòʼ tsə nə̀ imùə̀ yam yiy dòʼò tsitsi anə sə k-a-zə̀ nə̀ anə sə kə ghè dzə̀m.

17Yəə mə doʼò tsə nəniy ndə̀mə̀ tə̀ ŋə̀mə̀ nə̀ mə way a Yèlusalèm, mə tsə̂m tsə nəniy nyiə ani zù awo nə̀ ùkhiy wiy ani fày aghù yam awote nə̀ ùkhiy wiy. Mə sâ nyiə̀ yə̀ sòʼò ùfyiə awote awò Zə̀kìy. 18Ghu kə bù kòʼ mìə̀ a ndàw Kə̀zə̀ nə̀ mə zəŋə àyiə yə. À kə də̌ nə̀ Mə mə zəŋi mà ayiə yə mə kwu ani zəŋi ani zwu dòʼò tsə anə sə k-a-zə̀. Mə kə wày dzəŋi dzə nə̀ àghè liy yiy, à kə də̀ kə miə. Mə kə zəŋə sòʼò wày iyiə ìliy yiy i kə bɛbə nəniy. 19Aghê Dzû àliy yiy kə kwuni də̀ ŋwô awote ghu kə ŋwò bə̂ nəniy anə mbwòʼ ə̀ Esìyà. Ghu mə̀ kwu ani də nyiə fə abu ghu mə̀ kwu soʼo nəniy iyiə ìliy yiy ani dzày â wò mə kə zəŋi bɛb nəniy. 20Moo wò də̀ ani bòʼò bəb yə̀ awò àliy yə ghu də nəniy nyiə fə. Ghu ki dzày bə̂ â wò nə̀ ghu kə kə̀ dzây dzə̂ nə̀ mə zəŋi bɛb ŋwô iyiə ìliy yiy a sòŋə̀ fə ghu kə nîy zû nə̀ mìə̀ a ndàw ghu ìsaʼà yìy. 21Iyiə yə ghu də ani dzày nə̀ mə zəŋi bɛb ŋwô, à də̀ yəə mə kə bviʼi fyi kə mbòŋ mìy a ndàw ìsaʼà yìy dzày tsə nə̀, ‘Ghà saʼa miə zii aŋwòə mə bɛmə ŋwô nə̀ abu aghê nî pfə tsə, ghu nî zɛ̀mə̀ dzwəŋə bə̀ ŋwò anə ipfə.’ ”

22Fɛlìks kə ŋge kwu ŋwô dzə̀lə̀ ìmùə̀ yə̀ Mwe ə̀ mbyi dê na nəniy. U zəŋi tsə nə̀ utswə̂d wə̀ mây. U dzày tsə nə̀, “A ki bu Lisìyà, wù kə̀làŋ ùnè wìy kì bù dzə̂ nəniy, mə ki kəli ayiə yə mə kwu ani zəŋi.” 23U tsày tsə kəlâŋ nə̀ aghee ulàŋ wìy ki kyiŋə tsə Pôl, kəə ghu nə̀ fyìè nia dzə̂ we. Ghu kə twe sòʼò nə̀ afələ we kə bû nyiə̀ we nə̀ ùfyiə wiy.

Pôl kə dzə̀ŋì nə̀ Fɛlìks we nə̀ Dzùsilà

24Ndə̀mə̀ ntsukə tsìy tsə, Fɛlìks nə̀ wìy we Dzùsilà, Dzùsilà kə də̌ yəŋə̀ Dzû, ghu zù anə lòʼo kə ghu na nəniy Pôl ate. Ghu twoŋə fyi bə̀ Pôl, Pôl dzày ghu nə̀ àyiə yiy kwùmə̀ yə̀ nə̀ yəə wù də ani kəli ibɛmə ate azoŋə̀ Yesù Kə̀litò. 25Yəə Pôl kwuni tsîy yə̀ kə nə̀ sə kiy ani dzày àyiə kwùmə̀ yə̀ nə̀ ayiə yə a də nəniy tsitsi anə sə k-a-zə̀, kwùmə̀ yə̀ sòʼò ayiə à kwi uwè wìy nə̀ ù kə zəŋi dzə̀ iyiə ìbɛbə yiy, kwùmə̀ yə̀ sòʼò nə̀ tsuk fə isaʼ fə̀ fə nî bê nəniy, Fɛlìks tsəŋ, dyaŋi dzày tsə nə̀, “Wò də̌ ani zù kə ŋwò nyiə, abu mə kəli fwuli nəniy bwôʼ kìy, mə ki kàm twoŋə tsə wô.” 26Anə sòŋə fə ghè fə̀, Fɛlìks ə kaʼ tsə ani zəaŋə tyoŋə tsə Pôl, dzə̀ŋə̀ nə̀ we aŋwòə u kə mòʼò kə nə̀ Pôl kî nyiə̀ ŋwò i ghe nə̀ ùkhiy ani zwuni.

27Ŋəmə̀ tìy tsìy tsə ìbè, Polsiyùs Festùs ə bù dòʼò tsə wè kə̀tuw anə mbwòʼ ì ghè yə̀ ani nìy yə̀ uwuŋ u Fɛlìks. Fɛlìks liə nə̀ aghee Dzû yìy si ŋge liə we, u nìy kə Pôl fè na nyi yə̀ we a ndàw ntsaʼ.

Currently Selected:

Kə̀fàʼ 24: isu

Highlight

Compare

Copy